De conformidade co establecido no Decreto 1/2010, do 8 de xaneiro, polo que se regula o Rexistro Único de Demandantes de Vivenda da Comunidade Autónoma de Galicia e a adxudicación das vivendas protexidas, así como as acollidas a programas de acceso á vivenda con axudas públicas, e no Decreto 253/2007, do 13 de decembro, de réxime xurídico do solo e das edificacións promovidas polo Instituto Galego da Vivenda e Solo, a Comisión Provincial de Vivenda da Coruña,
ACORDA:
Iniciar o proceso de selección de adxudicatarios/as de vivendas de promoción pública en segundas ou posteriores adxudicacións no concello de Santiago de Compostela, expediente C-2002/010 (Belvís), que se desenvolverá de conformidade coas seguintes bases:
Primeira. Obxecto do procedemento
1. O procedemento ten por obxecto adxudicar, logo dos seu correspondente proceso de selección de adxudicatarios/as, as sete vivendas de promoción pública do concello de Santiago de Compostela que se indican a continuación e as vivendas da mesma promoción singular que estean de novo á disposición do IGVS ao longo do período de vixencia destas bases, consonte o establecido na base sétima.
Vivenda |
Enderezo |
Superficie |
Nº cuartos |
C2002010:2 |
Camiño da Ameixaga, bloque 1, P 24-1º esq. |
81,96 |
3 |
C2002010:4 |
Camiño da Ameixaga, bloque 1, P 24-2º esq. |
81,96 |
3 |
C2002010:18 |
Camiño da Ameixaga, bloque 2, P 11-1º esq. |
63,89 |
2 |
C2002010:26 |
Camiño da Ameixaga, bloque 2, P 7-1º esq. |
63,89 |
2 |
C2002010:34 |
Camiño da Ameixaga, bloque 3 , P 8-3º esq. |
64,53 |
2 |
C2002010:38 |
Camiño da Ameixaga, bloque 3, P 6-2º esq. |
80,61 |
3 |
C2002010:47 |
Camiño da Ameixaga, bloque 4, P 12-3º dta. |
80,61 |
3 |
Todas as vivendas dispoñen de rocho e garaxe.
2. A promoción de que se trata foi cualificada como promoción singular ao abeiro da disposición adicional terceira do Decreto 257/2004, do 29 de outubro. O réxime xurídico é o das vivendas cualificadas en núcleo histórico.
3. Para realizar as adxudicacións elaborarase unha lista, integrada por todas as persoas inscritas no Rexistro Único de Demandantes de Vivenda, para a quenda xeral, elixidas polo procedemento previsto nestas bases.
Segunda. Requisitos dos beneficiarios/as
1. Poderán resultar adxudicatarias das vivendas as persoas, nacionais ou estranxeiras, maiores de idade ou menores emancipadas, con plena capacidade de obrar que reúnan os seguintes requisitos:
a) Atoparse inscritas no Rexistro Único de Demandantes, na data desta resolución de inicio, na sección 1ª ou 2ª, subsección alugamento, do Rexistro de Demandantes, para o concello de Santiago de Compostela como concello preferente.
b) Pertencer ao colectivo ao cal van destinadas as vivendas desta promoción: demandantes de entre 18 e 35 anos.
c) Acreditar ingresos ponderados por unidade familiar ou convivencial, no último exercicio fiscal vencido, entre 1 e 3,5 veces o índice público de rendas de efectos múltiples (IPREM).
d) Formar parte dunha unidade familiar/convivencial de ata seis integrantes, en atención ás características das vivendas ofertadas.
e) Residir ou traballar no concello de Santiago de Compostela, agás no caso de emigrantes que desexen retornar e que acrediten residir fóra de Galicia por un tempo non inferior a cinco anos.
f) Carecer calquera membro da unidade familiar ou convivencial de vivenda en calidade de propietario/a, agás que se dea algunha das seguintes circunstancias:
– Acreditar que a vivenda da que se dispón sexa inhabitable, insuficiente ou inadecuada nos termos do artigo 10.IV do Decreto 253/2007. Se resulta adxudicatario/a queda obrigado a ofertar ao IGVS a dita vivenda.
– Habitar unha vivenda suxeita a expediente de expropiación ou desafiuzamento xudicial ou administrativo non imputable ao interesado, ou ben ocupar aloxamentos provisionais como consecuencia de situacións de emerxencia ou remodelación que impliquen a perda da vivenda.
g) Non atoparse en ningunha destas circunstancias, referidas a calquera membro da unidade familiar ou convivencial:
– Que xa fosen titulares de VPP e a perdesen como consecuencia dun procedemento de desafiuzamento, resolución de contrato tramitado polo IGVS ou a allease por calquera causa, coa excepción de cambio de residencia por motivos laborais, ou outros xustificados, a xuízo da Comisión Provincial.
– Que sexan titulares de bens inmobles de natureza rústica ou urbana suxeitos ao imposto sobre bens inmobles que teñan un valor catastral superior a 30.000 euros.
2. Sen prexuízo do antedito, será requisito para a adxudicación da vivenda manter a vixencia da inscrición ao longo de todo o proceso de selección, de maneira que a falta de renovación da inscrición, de resultar obrigado a iso nos termos do artigo 15 do Decreto 1/2010, en calquera momento anterior ao acordo de adxudicación definitiva, determinará a perda do dereito ao acceso á vivenda.
Terceira. Réxime de adxudicación
1. A vivenda adxudicarase en réxime de arrendamento para satisfacer as necesidades dos colectivos especificados.
O réxime de adxudicación manterase durante toda a vixencia do réxime legal de protección sen que sexa posible o cambio de réxime de alugamento a compra.
2. De conformidade co artigo 74 da Lei 8/2012, a Comisión Provincial de Vivenda poderá, en calquera momento anterior á aprobación da lista definitiva de adxudicatarios e de espera, afectar vivendas deste proceso para a súa adxudicación en réxime de arrendamento, a persoas que formen parte dos colectivos aos cales van destinadas as vivendas da promoción, polo procedemento previsto no artigo 47 e seguintes do Decreto 253/2007.
Cuarta. Condicións xerais de carácter económico
O contrato de arrendamento terá unha vixencia de cinco anos prorrogables por períodos anuais e estará prohibido, en todo caso, a cesión ou subarrendamento, total ou parcial. A contravención desta prohibición dará lugar á resolución do contrato de arrendamento, con independencia das sancións que procedan.
A renda inicial anual será a que resulte de aplicarlle o 3% ao que sería o prezo de venda da vivenda e anexos, determinado de acordo co establecido no Decreto 253/2007.
A eficacia da adxudicación estará condicionada á sinatura do correspondente contrato de arrendamento, logo do pagamento por parte do adxudicatario da fianza correspondente.
Quinta. Procedemento de selección
1. O procedemento de selección tramitarase consonte o establecido nos artigos 22 a 30 do Decreto 1/2010.
2. A selección efectuarase mediante sorteo, que se celebrará ante notario o día 24 de abril de 2018 agás indispoñibilidade do fedatario autorizante; neste caso, publicarase a data definitiva do sorteo na páxina web do IGVS, cunha antelación mínima de tres días naturais.
No sorteo elixiranse, por orde correlativa, sete persoas para integrar a lista provisional de adxudicatarios/as. As restantes persoas integrarán a lista provisional de espera segundo a orde correlativa que resulte do sorteo.
3. Unha vez rematado o sorteo procederase á publicación da lista provisional de adxudicatarios/as e de espera. Realizados os trámites previstos nos artigos 24 e 25 do Decreto 1/2010, a Comisión Provincial de Vivenda ditará resolución aprobatoria da lista definitiva de adxudicatarios/as e de espera.
Sexta. Publicidade, reclamacións e recursos
1. A resolución de inicio do procedemento de adxudicación publicarase no DOG e nela indicarase o medio onde se efectuarán as sucesivas publicacións, entendendo por sucesivas publicacións as das listas provisional e definitiva de adxudicatarios/as e de espera.
A publicación das listas provisional e definitiva de adxudicatarios/as e de espera realizarase nos taboleiros de anuncios do concello, no da área provincial do Instituto Galego da Vivenda e Solo e na páxina web do organismo.
A publicación substituirá as notificacións persoais de conformidade co previsto no artigo 45 da Lei 39/2015, do 1 de outubro, do procedemento administrativo común das administracións públicas.
2. Tras a publicación da lista provisional na forma indicada, as persoas solicitantes que se consideren prexudicadas no seu dereito disporán dun prazo de dez días para presentar reclamacións ante a Comisión Provincial de Vivenda, que deberá adoptar a resolución que proceda no prazo máximo de tres meses.
3. Contra a aprobación da lista definitiva de adxudicatarios/as e de espera, logo da súa publicación nos termos sinalados no número 1, poderase interpor recurso de reposición de conformidade co establecido no artigo 123 da Lei 39/2015.
Sétima. Vixencia das listas definitivas
As listas definitivas deste proceso de selección manterán a súa vixencia ata que teña lugar algunha das seguintes circunstancias:
– Que se cumpra un ano desde a aprobación de tales listas.
– Que se produza a súa caducidade automática ao resultar esgotadas por non quedaren integrantes aos cales ofertar as vivendas.
– Que sexan aprobadas novas listas definitivas noutro proceso no cal se inclúan as vivendas vacantes deste.
Oitava. Aceptación ou renuncia
De conformidade co disposto no artigo 28.2 do Decreto 1/2010, do 28 de xaneiro, unha vez que sexa determinada pola Área Provincial do IGVS a vivenda que lle corresponde a cada adxudicatario/a e que lle sexa notificada tal determinación, a persona interesada deberá aceptar ou renunciar á adxudicación no prazo de 10 días e, no caso de aceptala, deberá presentar nese mesmo prazo a documentación requirida.
A Coruña, 22 de marzo de 2018
José Antonio Álvarez Vidal
Presidente da Comisión Provincial de Vivenda da Coruña