Examinada a solicitude de conciliación formulada polos representantes dos MVMC de Lodoselo e de Perdigueiro e Veiga, resultan os seguintes
Feitos:
Primeiro. Con data do 28 de setembro de 2009 as comunidades propietarias dos MVMC de Lodoselo e de Perdigueiro e Veiga presentaron un escrito no que solicitan a aprobación dun acto de deslindamento levado a cabo entre estas.
O citado acto foi celebrado no Xulgado de Paz de Sarreaus o día 18 de setembro de 2009, logo de autorización das asembleas xerais respectivas.
Segundo. O Servizo de Montes remitiu ao Xurado Provincial a documentación relativa ao citado acto, co obxecto de que se ditase resolución aprobatoria, de acordo co previsto no artigo 53 da Lei 7/2012, do 28 de xuño, de montes de Galicia.
A descrición do lindeiro é a seguinte:
Comeza a descrición no lugar denominado Marco dos Valentes, punto que denominaremos MO1. Posteriormente e con dirección oeste dirixímonos ao Regueiro da Bouza onde situaremos MO2, o dito punto que localizado entre o Carreiro Ladrón e o camiño que baixa ao Viso partindo o piñeiral en dúas partes iguais, a partir de aquí e continuando no mesmo lugar de Regueiro da Bouza cambiamos a dirección do lindeiro para dirixirnos ao camiño que baixa ao Viso a escasos metros do anterior, punto que denominaremos MO3. A partir de aquí, definimos o lindeiro cunha liña recta que une este punto co punto MO4 e dirección sur, situado na devasa onde o lugar segue tendo o nome de Regueiro da Bouza, moi preto do lugar denominado Pozo Fondo. O seguinte punto da marxe sitúase no lugar chamado A Penediña, que denominaremos MO5, desde aquí con dirección oeste vai ata MO6 que está onde entronca a devasa que vén da Penediña ca pista que vai a Freande. O seguinte punto é MO7, situado ao oeste do anterior, no lugar denominado O Viso, e o último punto situado máis ao oeste tamén no lugar do Viso é o que denominamos MO8, e aquí remata o lindeiro entre comunais e comeza cos particulares.
Consideracións legais e técnicas:
Primeira. Esta resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 30/1992, do 26 de novembro, de réxime xurídico das administracións públicas e do procedemento administrativo común.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento a seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, o xurado provincial en man común acordou por unanimidade o día 23 de febreiro de 2017:
Aprobar o acto de conciliación acadado entre as comunidades propietarias dos MVCM de Lodoselo e de Perdigueiro e Veiga, do concello de Sarreaus, de acordo co exposto no feito segundo.
Contra esta resolución, que pon fin á vía administrativa, poderase interpoñer recuso potestativo de reposición perante o Xurado Provincial de Clasificación de Montes Veciñais en Man Común de Ourense no plazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta resolución, de acordo co disposto no artigo 12 da Lei 13/1989, nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 17 de agosto de 2018
Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense