De conformidade co establecido na disposición adicional quinta do Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, e con base nos criterios reitores para a mobilidade interna no ámbito de atención especializada aprobados pola mesa sectorial o 23 de decembro de 2009, modificados polo Acordo do 31 de xaneiro de 2014 e tras as negociacións mantidas coas seccións sindicais CC.OO., CESM-O’Mega, CIG, CSIF, USAE e UXT, asináronse, o 13 de setembro de 2018, as bases da convocatoria do concurso de mobilidade interna do persoal estatutario fixo das categorías de persoal sanitario diplomado, sanitario de formación profesional e de xestión e servizos no Complexo Hospitalario Universitario da Coruña.

A Xerencia de Xestión Integrada da Coruña, con base nas competencias atribuídas polo Decreto 43/2013, do 21 de febreiro (DOG núm. 47, do 7 de marzo), polo que se establece a estrutura orgánica do Servizo Galego de Saúde, modificado polo Decreto 111/2013, do 4 de xullo (DOG núm. 140, do 24 de xullo), e na Orde do 5 de xullo de 2012 (DOG núm. 139, do 20 de xullo), sobre delegación de competencias en órganos centrais e periféricos do Servizo Galego de Saúde,

RESOLVE:

Anunciar a convocatoria do procedemento de mobilidade interna do persoal estatutario fixo das categorías de persoal sanitario diplomado, sanitario de formación profesional e de xestión e servizos no Complexo Hospitalario Universitario da Coruña.

As bases íntegras da presente convocatoria estarán expostas nos taboleiros de anuncios do Complexo Hospitalario e na páxina web do Espazo do Profesional.

As solicitudes para participar no presente procedemento axustaranse necesariamente ao formulario electrónico existente na oficina virtual do profesional (Fides/procesos/mobilidade voluntaria interna) e, tras a súa formalización electrónica, unha vez impresa, deberá presentarse no Rexistro da EOXI ou en calquera dos rexistros referidos no artigo 16 da Lei 39/2015, do 1 de outubro, do procedemento administrativo común das administracións públicas, e demais lugares previstos no artigo 10 do Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia.

O prazo de presentación de solicitudes será de 15 días naturais a partir do día seguinte ao da presente publicación, segundo o seguinte calendario:

Persoal de xestión e servizos: 15 días naturais desde o día seguinte á publicación.

Persoal sanitario de formación profesional: 15 días naturais contados desde o día seguinte ao remate do prazo correspondente ás categorías de xestión e servizos.

Persoal sanitario diplomado: 15 días naturais contados desde o día seguinte ao remate do prazo correspondente ás categorías de persoal sanitario de formación profesional.

A Coruña, 8 de outubro de 2018

Luis Verde Remeseiro
Xerente de Xestión Integrada da Coruña