De conformidade co disposto nos artigos 72, 104 e seguintes da Lei 29/1998, do 13 de xullo, reguladora da xurisdición contencioso-administrativa, e en cumprimento da propia sentenza, faise público que a Sección Quinta da Sala do Contencioso-Administrativo do Tribunal Supremo, con data do 12 de xuño de 2018, pronunciou a Sentenza 983/2018, ditada no recurso de casación 263/2017, sentenza que na súa parte dispositiva literalmente di:
«1º. Estimar o recurso de casación número 263/2017, interposto pola representación procesual de «Cámping Mougás, S.L.», contra a Sentenza ditada o 27 de outubro de 2017 pola Sala do Contencioso-Administrativo do Tribunal Superior de Xustiza de Galicia, Sección Segunda, no recurso contencioso-administrativo 4534/2009.
2º. Revogar e deixar sen efecto a sentenza impugnada e, con estimación parcial do recurso contencioso-administrativo deducido contra o Acordo do Consello da Xunta de Galicia, do 30 de xullo de 2009, polo que se aproba o proxecto sectorial de incidencia supramunicipal «Proxecto sectorial do parque de tecnoloxía alimentaria de Mougás, Oia-Pontevedra», anular o dito acordo por desconforme a dereito.
3º. Sen custas».
A citada sentenza foi declarada firme.
Santiago de Compostela, 16 de novembro de 2018
Mercedes Rodríguez Moreda
Directora xeral de Pesca, Acuicultura e Innovación Tecnolóxica