A Orde do 13 de xuño de 2018 pola que se establecen as bases que rexerán a concesión de subvencións a entidades de iniciativa social para a promoción de actuacións de servizos sociais comunitarios e inclusión social e se procede á súa convocatoria para os anos 2018, 2019 e 2020 (cofinanciada parcialmente polo Fondo Social Europeo e polo Fondo Europeo de Desenvolvemento Rexional no marco dos programas operativos FSE Galicia 2014-2020 e Feder Galicia 2014-2020), establece no artigo 2, punto 1, a dotación orzamentaria das partidas destinadas a subvencionar os proxectos e actuacións obxecto da convocatoria, e no punto 2 prevese que poderase ampliar a contía máxima dos créditos dispoñibles cando o aumento veña derivado dunha xeración, ampliación ou incorporación de crédito, cando existan remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo.
Dado que o crédito previsto na Orde do 13 de xuño non resultou suficiente para atender todas as solicitudes recibidas e que existe crédito dispoñible nas aplicacións orzamentarias 12.03.312C.481.0 e 12.03.313C.481.6 que cumpre os requisitos establecidos no artigo 30.2 do Decreto 11/2009, do 8 de xaneiro, parece oportuno incrementar o importe destinado á dotación orzamentaria consignada destinada a financiar as prestacións do servizo de apoio á inclusión sociolaboral e destinada á atención dirixida a fomentar a inclusión social e o acceso e permanencia no mercado de traballo da poboación inmigrante, en liña cun dos obxectivos de Plan estratéxico de Galicia 2015-2020, na Estratexia de inclusión social de Galicia 2014-2020 e na Lei 10/2013, do 27 de novembro, de inclusión social de Galicia.
Por todo o exposto e no uso das facultades que me foron conferidas,
RESOLVO:
Artigo único. Incremento dos créditos
Increméntase o crédito destinado ao financiamento das axudas previstas na Orde do 13 de xuño de 2018 pola que se establecen as bases que rexen a concesión de subvencións a entidades de iniciativa social para a promoción de actuacións de servizos sociais comunitarios e inclusión social e se procede á súa convocatoria para os anos 2018, 2019 e 2020 (cofinanciada parcialmente polo Fondo Social Europeo e polo Fondo Europeo de Desenvolvemento Rexional no marco dos programas operativos FSE Galicia 2014.2010 e Feder Galicia 2014.2020). O importe total do dito incremento, que se realizará na aplicación orzamentaria 12.03.313C.481.6, e 12.03.312C.481.0, é de 1.868.321,41 €, distribuído en dúas anualidades; corresponden 388.277,41 € en 2018 e 1.480.044 € á que se desenvolve en 2019.
A publicación desta orde non supón a apertura dun novo prazo de presentación de solicitudes.
Disposición derradeira única. Entrada en vigor
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 29 de novembro de 2018
Fabiola García Martínez
Conselleira de Política Social