En cumprimento do disposto polo artigo 37 da Lei 4/2015, do 17 de xuño, de mellora da estrutura territorial agraria de Galicia e a Lei 10/1985, de concentración parcelaria para Galicia, a Dirección Xeral de Desenvolvemento Rural resolveu dar a toma de posesión provisional dos novos predios resultantes do proceso de concentración parcelaria da zona do Burgo-Vilamaior-Camba (Castro Caldelas-Ourense) con data do 20 de marzo de 2019.
As datas para tomar posesión dos predios son as seguintes:
1. Para terreos de prado, pasteiro, labradío sen colleita e monte, o día 3 de xuño de 2019.
2. Para os restantes terreos, no momento, en que segundo a costume, se retiren as colleitas actuais.
Para o caso de que se pretenda retirar arboredo, a data límite é o día 4 de setembro de 2019, e debe contarse co preceptivo permiso do Servizo de Montes; o aproveitamento xestionarase con suxeición ao establecido no Decreto 50/2014, do 10 de abril, e na Orde do 20 de abril de 2018, que modifica os seus anexos II, III e VI.
(Información no enderezo https://mediorural.xunta.gal/es/areas/forestal/ordenación/distritos/)
No prazo de dous meses contados a partir do seguinte á data establecida para a posta á disposición dos predios, poderase reclamar por defecto de superfice nos predios atribuídos xuntando unha medición pericial asinada por técnico competente, sobre diferenzas de superficie superiores a unha marxe de tolerancia variable entre a medición in situ e a que conste no boletín de atribucións dos novos predios, conforme o disposto no antedito artigo 37.
Importante. As persoas propietarias das parcelas de achega deben permitir aos titulares dos novos predios o acceso a eles para proceder no prazo dos dous meses enriba sinalado a medilos.
Debe terse en conta que:
1. A falta de superficie dun predio non será compensada cando exista exceso de superficie no conxunto dos predios atribuídos ao mesmo propietario e esta sexa suficiente para compensar en valor de puntuación o conxunto das atribucións.
2. A falta de superficie en terreos de núcleo rural (total ou parcialmente) será compensada nesta mesma clase. No caso de non existir dispoñible terreo deste tipo e o mesmo titular ter exceso de superficie en terreos doutra clase, a compensación farase sobre os ditos terreos.
3. Non se admitirá reclamación no caso de que o predio obxecto dela coincida exactamente, na súa delimitación cartográfica, coa parcela achegada polo mesmo titular.
4. Impedir ou obstaculizar a toma de posesión é considerada unha infracción moi grave (artigo 90 da Lei 4/2015) sancionada con multa de 1.501 a 6.000 euros.
5. Sen prexuízo do indicado no punto anterior, a toma de posesión poderá darse, logo de apercibimento, mediante compulsión directa sobre a/s persoa/s que o impidan.
6. Os planos do acordo e as coordenadas dos marcos están acesibles na internet na páxina web da Consellería do Medio Rural no enderezo:
http://mediorural.xunta.gal/areas/infraestruturas/concentraciónsparcelarias/publicacions
Ourense, 10 de maio de 2019
Yago Borrajo Sánchez
Xefe territorial de Ourense