BDNS (Identif.): 454794.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (http://www.pap.minhap.gob.es/bdnstrans/index).
Primeiro. Beneficiarias
Aquelas familias con alumnado matriculado en centros docentes da Comunidade Autónoma de Galicia sostidos con fondos públicos nas modalidades de gratuidade solidaria que se relacionan a seguir:
a) Fondo solidario de libros de texto do alumnado matriculado en 3º, 4º, 5º e 6º de educación primaria (EP), e en 1º, 2º, 3º e 4º de ensinanza secundaria obrigatoria (ESO).
b) Axudas para adquirir libros de texto destinadas ao alumnado matriculado en 1º e 2º de EP, e en educación especial (EE), así como as axudas que pode recibir o alumnado incluído na disposición adicional primeira da orde.
c) Axudas para material escolar destinadas ao alumnado matriculado en EP, ESO e EE.
Segundo. Obxecto
As distintas modalidades de axudas teñen como obxecto apoiar as familias con menos ingresos para dispoñer dos libros de texto e material escolar.
Terceiro. Bases reguladoras
Orde do 3 de maio de 2019 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos, para o curso escolar 2019/20 (código de procedemento ED330B).
Cuarto. Importe
Fondo solidario de libros de texto: 128.000 alumnos beneficiarios, cunha dotación total de 1.800.000,00 euros para o ano 2019 e de 300.000,00 euros para o ano 2020.
Axudas libros de texto: 33.056 alumnos beneficiarios, cunha dotación total de 4.200.000 euros para o ano 2019 e de 400.000 euros para o ano 2019. Esta actuación está cofinanciada polo Ministerio de Educación e Formación Profesional.
Material escolar: 100.000 alumnos beneficiarios, cunha dotación total de 5.000.000 euros para o ano 2019 e de 400.000,00 euros para o ano 2020.
Quinto. Prazo de presentación de solicitudes
Iniciarase o día seguinte ao da publicación desta orde no Diario Oficial de Galicia e rematará o día 21 de xuño de 2019. O alumnado que se incorpore ao centro docente fóra deste prazo disporá dun mes contado a partir do día seguinte ao da formalización da matrícula. Non se poderán presentar solicitudes despois do 31 de marzo de 2020.
Santiago de Compostela, 3 de maio de 2019
Carmen Pomar Tojo
Conselleira de Educación, Universidade e Formación Profesional