O artigo 28 do vixente Estatuto de autonomía de Galicia establece no seu ordinal 2º a competencia da Comunidade Autónoma galega no desenvolvemento lexislativo e execución da lexislación do Estado en materia de expropiación forzosa.
Con data do 7 de setembro de 2017, a Xunta de Galicia declarou a utilidade pública e a urxente ocupación dos bens e dereitos afectados polo proxecto de construción do itinerario peonil e ciclista na AC-543, treito Roxos-Aldea Nova, punto quilométrico 4+150 ao 5+040, coa clave AC/16/086.06 nos concellos de Santiago de Compostela e Ames, mediante o Decreto 88/2017, publicado no Diario Oficial de Galicia do 21 de setembro.
A tramitación do expediente expropiatorio débese axustar ao disposto no artigos 52 da vixente Lei de expropiación forzosa, do 16 de decembro de 1954, e 56 e seguintes do seu regulamento, do 26 de abril de 1957.
En consecuencia, este servizo, en virtude da competencia delegada mediante a Orde do 7 de setembro de 2017 sobre delegación de competencias no secretario xeral técnico e noutros órganos e entidades públicas adscritos a esta consellería, publicada no DOG nº 179, do 20 de setembro, resolveu convocar os titulares de bens e dereitos afectados que figuran na relación exposta no taboleiro de anuncios do Concello de Santiago de Compostela e no Concello de Ames, para que comparezan no lugar, data e horas que se detallan a continuación, co fin de proceder ao levantamento das actas previas á ocupación, nas cales se recollerán os datos necesarios para determinar os dereitos afectados, o valor destes e os prexuízos determinantes da rápida ocupación, sen prexuízo de se trasladaren ao lugar dos predios se o consideran necesario.
Termo municipal de Santiago de Compostela.
Lugar: Centro Sociocultural Santa Marta (Antonio Rama Seoane, nº 6, 15706 Santiago de Compostela).
Data: 3 de setembro de 2019, ás dez horas e trinta minutos (10.30 horas).
Termo municipal de Ames.
Lugar: casa do concello.
Data: 3 de setembro de 2019, ás doce horas e trinta minutos (12.30 horas).
A relación de titulares cos bens e dereitos afectados, así como o plano parcelario correspondente estarán expostos no Concello de Santiago de Compostela e no de Ames, e no Servizo Provincial da Axencia Galega de Infraestruturas da Coruña (r/ Vicente Ferrer, nº 2, 8º andar, 15071 A Coruña), e publicarase na seguinte lizagón da páxina web da consellería:
https://infraestruturasemobilidade.xunta.gal/avisos?p_p_id=ipecos_opencms_portlet_INSTANCE_Ps5C&p_p_lifecycle=0&p_p_state=normal&p_p_col_id=column-1&p_p_col_count=1&_ipecos_opencms_portlet_INSTANCE_Ps5C_content=%2Fopencms%2FPortal-Web%2FContidos%2FAviso%2Faviso_0104.html
Ao dito acto deberán acudir os titulares afectados, persoalmente ou ben representados pola persoa debidamente autorizada para actuar no seu nome, e xuntar os documentos acreditativos da súa titularidade, documento nacional de identidade e o último recibo da contribución, así como certificado de conta con códigos IBAN e BIC, co fin de proceder aos sucesivos pagamentos que sexan procedentes mediante transferencia bancaria. Se o consideran oportuno, poderán ir acompañados pola súa conta dos seus peritos e notarios.
A Coruña, 22 de xullo de 2019
Felipe de la Vega Gándaras
Xefe do Servizo Provincial da Coruña