De conformidade co establecido no Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, e na Orde do 24 de maio de 2006 (DOG núm. 106, do 5 de xuño), pola que se establecen as bases do procedemento para a provisión dos postos de xefatura e coordinación das institucións sanitarias do Servizo Galego de Saúde, e no uso das atribucións conferidas polo Decreto 43/2013, do 21 de febreiro, polo que se establece a estrutura orgánica do Servizo Galego de Saúde (DOG núm. 47, do 7 de marzo), e a Orde do 28 de setembro de 2011 pola que se desenvolve a estrutura organizativa de Xestión Integrada de Pontevedra e O Salnés e se delegan competencias nos seus órganos directivos (DOG núm. 188, do 30 de setembro), modificada pola Orde do 5 de xullo de 2012 (DOG núm. 139, do 20 de xullo), o xerente de Xestión Integrada de Pontevedra e O Salnés,

RESOLVE:

Primeiro. Anunciar a convocatoria para cubrir, polo procedemento de concurso de méritos e defensa pública dun proxecto técnico de xestión da respectiva unidade, postos de supervisión de Unidade e Xeral na área sanitaria de Pontevedra e O Salnés, que se relacionan no anexo.

Segundo. As retribucións dos postos ofertados serán as que correspondan de acordo coa orde anual pola que se ditan instrucións sobre a confección de nóminas do persoal ao servizo da Administración autonómica.

Terceiro. As solicitudes para participar nesta convocatoria presentaranse, preferentemente, no Rexistro de Entrada da Xerencia de Xestión Integrada de Pontevedra e O Salnés, sito na rúa Loureiro Crespo nº 2 de Pontevedra, ou a través de calquera dos procedementos do artigo 16 da Lei 39/2015, do 1 de outubro, do procedemento administrativo común das administracións públicas, no prazo dun mes natural contado a partir do día seguinte ao da publicación deste anuncio no Diario Oficial de Galicia.

Cuarto. As bases íntegras da convocatoria estarán expostas nos taboleiros de anuncios da Dirección do Complexo Hospitalario Universitario de Pontevedra e do Hospital do Salnés, así como na páxina web do Servizo Galego de Saúde (www.sergas.es) e na intranet da EOXI de Pontevedra e O Salnés.

Pontevedra, 18 de setembro de 2019

José Ramón Gómez Fernández
Xerente de Xestión Integrada de Pontevedra e O Salnés

ANEXO

• Supervisión da Unidade de Medicina Interna M-I (Complexo Hospitalario Universitario de Pontevedra).

• Supervisión da Unidade de Dixestivo (Complexo Hospitalario Universitario de Pontevedra).

• Supervisión da Unidade de Información e Atención ao Usuario (Complexo Hospitalario Universitario de Pontevedra).

• Supervisión da Unidade do Servizo de Transfusión (Complexo Hospitalario Universitario de Pontevedra).

• Supervisión da Unidade de Quirófanos (Hospital do Salnés).

• Supervisión da Unidade de Consultas e Servizos Centrais (Hospital do Salnés).

• Supervisión da Unidade de Hospitalización II (Hospital do Salnés).

• Supervisión da Unidade de Hospitalización III (Hospital do Salnés).

• Tres supervisións xerais (EOXI de Pontevedra e O Salnés).