De conformidade co artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade da seguinte encomenda coas seguintes características:

– Resolución do 2 de outubro de 2019, do Servizo Galego de Saúde, pola que se encarga á empresa pública Empresa de Transformación Agraria, S.A., S.M.E., M.P. (Tragsa), como medio propio personificado, a execución dos traballos descritos no proxecto de derruba de dous edificios no Barrio da Residencia (Lugo).

– Actividade: Tragsa asumirá a execución dos traballos descritos no proxecto de derruba de dous edificios no Barrio da Residencia (Lugo) que se anexa á resolución da encomenda.

– Natureza e alcance da xestión encomendada:

O encargo ten natureza de encargo a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13 da Lei 14/2013, do 26 de decembro, de racionalización do sector público autonómico.

Tal condición de medio propio vén recollida na disposición adicional vixésimo cuarta da Lei 9/2017, do 8 de novembro, de contratos do sector público, a cal establece que Tragsa e a súa filial Tragsatec terán a consideración de medios propios personificados e servizos técnicos da Administración sempre que se cumpran os requisitos establecidos no punto 2º da letra d) do número 2 do artigo 32, e nas letras a) e b) do número 4 do mesmo artigo, e virán obrigadas a realizar, con carácter exclusivo, os traballos que estes lles encomenden nas materias sinaladas nos números 4 e 5, dando unha especial prioridade a aqueles que sexan urxentes ou que se ordenen como consecuencia das situacións de emerxencia que se declaren.

A empresa pública Tragsa encargarase de realizar as seguintes tarefas:

1. Executar os traballos derivados deste encargo a medio propio con suxeición ao proxecto correspondente, achegando os medios que resulten necesarios.

2. Proporcionarlle ao Servizo Galego de Saúde información periódica (mensualmente) sobre os avances das diferentes actuacións e os posibles atrancos do obxecto do encargo así como canta información se lle solicite sobre a realización dos traballos.

3. Manter aberta en Santiago de Compostela unha oficina de enlace coa Administración.

4. Proporcionar os medios materiais que sexan necesarios ao persoal que execute materialmente a prestación. O persoal dependerá exclusivamente da empresa Tragsa, a cal terá todos os dereitos e deberes inherentes á súa condición de empregador.

A empresa encargarase da dirección de obra e da execución e coordinación do plan de seguridade e saúde.

Así mesmo, para conseguir o máximo aproveitamento dos materiais resultantes da derruba (residuos), para que estes poidan ser transformados nun produto limpo e eficaz para a fabricación de novos materiais para empregar en novas construcións, mellorando a protección do ambiente e contribuíndo á conservación dos recursos naturais, e conseguir, así mesmo, unha redución dos custos da demolición, a empresa pública Tragsa encargarase do procedemento necesario para o seu alleamento.

– Financiamento: o orzamento de execución material ascende a 278.001,99 €. Á dita cantidade teranse que engadir 11.120,08 € de taxas de licenza municipal e 12.705,00 € de dirección facultativa e coordinación de seguridade e saúde, polo que para a realización dos traballos obxecto deste encargo a medio propio o Servizo Galego de Saúde destinará, como máximo, a cantidade de 301.827,07 € con cargo á aplicación orzamentaria 50.01.412B.621.0 dos orzamentos xerais da Comunidade Autónoma de Galicia para o ano 2019.

– Prazo de vixencia: tres meses, que se contarán desde a sinatura da acta de implantación, non considerándose neste encargo a posibilidade de recepcións parciais de traballos executados.

A empresa Tragsa está obrigada ao cumprimento do prazo fixado para o encargo. Poderán ser acordadas as prórrogas do prazo de execución que sexan necesarias sempre e cando estean xustificadas as causas do atraso e sen que supoñan en ningún caso incremento do importe total do encargo.

Santiago de Compostela, 3 de outubro de 2019

Jesús Vázquez Almuíña
Presidente do Servizo Galego de Saúde