O Pleno municipal, na sesión que tivo lugar o 5 de decembro de 2019, adoptou, entre outros, o seguinte acordo:

Primeiro. Aprobar definitivamente o estudo de detalle de ordenación de volumes de condicións da edificación da parcela dotacional pública QG-41. Xuño 2019 (matadoiro municipal), redactado polo arquitecto César Fernández Bellón, núm. col. 3743 do COAG, promovido por Carniceiros da Coruña, S.A. (Carnicosa).

Segundo. Ordenar as publicacións e a realización dos trámites administrativos recollidos no artigo 82 e 88 da Lei 2/2016, do 10 de febreiro, do solo de Galicia, e concordantes do regulamento de desenvolvemento desta, para proceder á eficacia do acto de aprobación definitiva e á entrada en vigor do estudo de detalle aprobado.

Terceiro. Notificar este acordo ao promotor da actuación e aos departamentos municipais interesados na aprobación do documento.

O contido íntegro do estudo de detalle aprobado pódese consultar nas dependencias municipais de Urbanismo, no enderezo electrónico coruna.gal/urbanismo, na epígrafe «planeamiento/planeamento vixente ou ben, desde a mesma web, a través de «Visor estado desenvolvemento PXOM 2013».

Contra este acordo, con carácter de disposición administrativa de carácter xeral, pódese interpoñer directamente recurso contencioso-administrativo ante a sala correspondente do Tribunal Superior de Xustiza de Galicia (artigo 84.1 da Lei do solo de Galicia e artigo 201.1 do seu regulamento), no prazo de dous meses que se contarán a partir do día seguinte ao da publicación deste anuncio, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de interpoñer calquera outro recurso que se entenda máis procedente e sexa conforme a dereito.

A Coruña, 20 de decembro de 2019

A alcaldesa
P.D. (Decreto 3847/19, do 27.6.2019)
María Hernández García
Directora da Área de Urbanismo