DOG 30 do 13/02/2020 - ANUNCIO do 5 de febreiro de 2020, da Xerencia da Área Sanitaria da Coruña e Cee, polo que se dá publicidade á resolución da mesma data para a provisión, polo procedemento de avaliación colexiada, dun posto de xefe/a do Servizo de Medicina Interna do Hospital Público de Cee.

IV. Oposicións e concursos

Servizo Galego de Saúde

ANUNCIO do 5 de febreiro de 2020, da Xerencia da Área Sanitaria da Coruña e Cee, polo que se dá publicidade á resolución da mesma data para a provisión, polo procedemento de avaliación colexiada, dun posto de xefe/a do Servizo de Medicina Interna do Hospital Público de Cee.

De conformidade co establecido no Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, así como no artigo 3 da Orde do 24 de maio de 2006 (DOG núm. 106, do 5 de xuño) pola que se establecen as bases do procedemento para a provisión dos postos de xefatura e coordinación das institucións sanitarias do Servizo Galego de Saúde, en virtude das competencias atribuídas polo Decreto 137/2019, do 10 de outubro (DOG núm. 208, do 31 de outubro), polo que se establece a estrutura orgánica do Servizo Galego de Saúde; no Decreto 134/2019, do 10 de outubro (DOG núm. 204, do 25 de outubro), polo que se regulan as áreas sanitarias e os distritos sanitarios do Sistema público de saúde de Galicia, de acordo co establecido na Orde do 5 de xullo de 2012 (DOG núm. 139, do 20 de xullo) sobre delegación de competencias en órganos centrais e periféricos do Servizo Galego de Saúde, a Xerencia da Área Sanitaria da Coruña e Cee

RESOLVE:

Primeiro. Anunciar a convocatoria para a provisión, mediante o procedemento de avaliación colexiada, dun posto de xefe/a do Servizo de Medicina Interna.

Segundo. As solicitudes para participar nesta convocatoria, xunto coa documentación a que se refiren as súas bases, deberanse dirixir á Xerencia da Área Sanitaria da Coruña e Cee e poderanse presentar no Rexistro do Hospital Universitario A Coruña (Edificio Hotel de Pacientes; As Xubias de Arriba, 84, 15006 A Coruña), así como a través de calquera dos procedementos do artigo 16.4 da Lei 39/2015, do 1 de outubro, do procedemento administrativo común das administracións públicas. O prazo de presentación de solicitudes será dun mes, contado a partir do día seguinte ao da publicación do anuncio desta convocatoria no Diario Oficial de Galicia.

Terceiro. As bases íntegras da convocatoria estarán expostas na páxina web do Servizo Galego de Saúde (www.sergas.es) e na páxina web do Espazo do Profesional da Área Sanitaria da Coruña e Cee.

A Coruña, 5 de febreiro de 2020

Luis Verde Remeseiro
Xerente da Área Sanitaria da Coruña e Cee