O 13 de marzo de 2020 publicouse no Diario Oficial de Galicia número 50 o Acordo do 11 de marzo de 2020, da Dirección Xeral de Mobilidade, polo que se establece a primeira expansión territorial do ámbito de aplicación da tarifa específica Xente Nova no transporte público interurbano de competencia da Xunta de Galicia, que recollía a previsión de aplicación da tarifa Xente Nova a partir do 23 de marzo.
Con data do 14 de marzo de 2020 publicouse no Boletín Oficial del Estado o Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, que entrou en vigor no mesmo momento da súa publicación.
O dito real decreto ten como un dos seus piares, como principal ferramenta para loitar contra a extensión do COVID-19, o confinamento da poboación, e resulta pouco acorde con esta a implantación dunha medida de expansión territorial da tarifa Xente Nova no transporte público interurbano, cuxo obxectivo é precisamente o contrario, facilitar a mobilidade da mocidade.
Polo que,
ACORDO:
Deixar sen efecto o Acordo do 11 de marzo de 2020, da Dirección Xeral de Mobilidade, polo que se establece a primeira expansión territorial do ámbito de aplicación da tarifa específica Xente Nova no transporte público interurbano de competencia da Xunta de Galicia.
Este acordo producirá efectos desde a data da súa adopción, sen prexuízo da súa publicación polas mesmas canles de que foi obxecto o acordo que deixa sen efecto.
Santiago de Compostela, 20 de marzo de 2020
Ignacio Maestro Saavedra
Director xeral de Mobilidade