I. Por Resolución do 2 de outubro de 2019, do presidente do Servizo Galego de Saúde (feita pública no DOG núm. 193, do 10 de outubro) encargouse á empresa pública Empresa de Transformación Agraria, S.A., S.M.E, M.P. (Tragsa), como medio propio personificado, a execución dos traballos descritos no proxecto de derriba de dous edificios no Barrio da Residencia (Lugo).
II. De conformidade co establecido na condición básica número 6 «Duración», o encargo tiña prevista unha vixencia de tres meses contados desde a sinatura da acta de implantación, podendo ser acordadas as prórrogas do prazo de execución que sexan necesarias sempre e cando estivesen xustificadas as causas do atraso e sen que supuxese, en ningún caso, incremento do importe total do encargo.
III. A acta de implantación asinouse o 21 de xaneiro de 2020, polo que a vixencia prevista inicialmente para o encargo remataba o pasado 21 de abril de 2020.
IV. Por Resolución desta Presidencia do 17 de abril de 2020, e logo de solicitude do xerente de zona de Transformación Agraria, S.A., S.M.E, M.P. (Tragsa), prorrogouse, por un período dun mes, a vixencia do encargo que rematará o vindeiro 21 de maio de 2020.
V. Por escrito do 18 de maio de 2020, o xerente de zona de Transformación Agraria, S.A., S.M.E, M.P. (Tragsa) solicita unha nova prórroga dun mes, xustificando as causas do atraso en que a finais de abril, unha vez que se retiran os 4 depósitos enterrados de fuel óleo, aparecen de forma inesperada entre 800-1000 t de material contaminado non recollido no proxecto orixinal, sendo necesaria a publicación dun expediente de licitación de urxencia para o transporte e xestión das terras contaminadas que se adxudicará en breve.
Á vista destas circunstancias e no exercicio das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia, e o artigo 4 do Decreto 137/2019, do 10 de outubro, polo que se establece a estrutura orgánica do Servizo Galego de Saúde
RESOLVO:
Prorrogar, por un período dun mes, a vixencia do encargo á empresa pública Empresa de Transformación Agraria, S.A., S.M.E, M.P. (Tragsa), como medio propio personificado, para a execución dos traballos descritos no proxecto de derriba de dous edificios no Barrio da Residencia (Lugo), cuxa vixencia rematará o vindeiro 21 de xuño de 2020, mantendo inalteradas o resto das condicións previstas para o encargo na Resolución do 2 de outubro de 2019.
Santiago de Compostela, 20 de maio de 2020
Jesús Vázquez Almuíña
Conselleiro de Sanidade
e presidente do Servizo Galego de Saúde
