En cumprimento do disposto no artigo 82 da vixente Lei 2/2016, do 10 de febreiro, do solo de Galicia, faise público que o Pleno do Concello, na sesión extraordinaria que tivo lugar o día 9 de xuño de 2020, adoptou, entre outros, o seguinte acordo:

Aprobar definitivamente o Plan especial de protección das Catedrais, documento de aprobación definitiva de maio de 2020 que consta no expediente administrativo tramitado, segundo os informes emitidos e que tamén constan no procedemento.

Igualmente, xunto á publicación deste acordo publicarase a indicación das medidas adoptadas para o seguimento dos efectos no ambiente da aplicación do plan e a referencia ao enderezo electrónico en que figurará o contido íntegro do plan á disposición do público.

Cuestións ambientais

Efectos sobre os elementos estratéxicos

Unha vez aprobado o plan especial prevense os seguintes efectos sobre os elementos estratéxicos identificados nesta memoria:

• Modificación da accesibilidade e da mobilidade, incluído o traslado das zonas de aparcadoiro que elimine os impactos visuais e ambientais actuais sobre o propio monumento natural e corrixa as disfuncionalidades detectadas nos fluxos de circulación en períodos de máxima afluencia.

• Provisión de equipamentos integrados na paisaxe que acollan actividades de divulgación e difusión do monumento e faciliten a inserción territorial de usos que hoxe se dispoñen de xeito ventureiro ou presentan un alto impacto visual, coma o restaurante ou os postos de venda ambulante.

• Deseño dunha estratexia de participación pública que asegure a complicidade da cidadanía cos obxectivos e intereses do plan especial.

• Inclusión de xeito prioritario das determinacións do Plan de ordenación do litoral, que regula as actividades e uso dentro das áreas que delimita e que, no ámbito que nos ocupa son catro: área de mellora ambiental e paisaxística, área de protección costeira, dentro da cal se sitúan tamén a área de espazos de interese e a rede de espazos naturais.

• Inclusión de xeito prioritario das determinacións do Decreto 37/2014 polo que se aproba o Plan director da Rede Natura 2000 de Galicia, do Decreto 11/2005, do 20 de xaneiro, polo que se declara a praia das Catedrais monumento natural, e do Decreto 80/2015, polo que se aproba o Plan de conservación do monumento natural da praia das Catedrais.

A xustificación de como se tomaron en consideración no plan o estudo ambiental estratéxico, os resultados da información pública e das consultas e a declaración ambiental estratéxica, así como as discrepancias xurdidas no proceso.

Aplicación do procedemento de avaliación ambiental estratéxica simplificada

No artigo 6.2 da Lei 21/2013, do 9 de decembro, de avaliación ambiental, defínese o ámbito de aplicación da avaliación ambiental estratéxica simplificada:

• As modificacións menores dos plans e programas que deben ser obxecto de avaliación ambiental ordinaria.

• Os plans e programas que cumpran as condicións para ser sometidos a avaliación ambiental ordinaria, pero establecen o uso, a nivel municipal, de zonas de reducida extensión.

• Os plans e programas que, establecendo un marco para a autorización no futuro de proxectos, non cumpran os demais requisitos exixidos para ser obxecto de avaliación ambiental ordinaria.

Así mesmo, a Lei 2/2016, do solo de Galicia, prescribe no artigo 46.2 o procedemento de avaliación ambiental estratéxica abreviada para os plans especiais como o que se presenta, confirmado polos artigos 185 e 186 do Regulamento da Lei do solo de Galicia, aprobado polo Decreto 143/2016.

Polos motivos expostos anteriormente xustifícase o sometemento desta modificación puntual á avaliación ambiental simplificada. Esta motivación é compartida polo órgano ambiental no seu requirimento de emenda de solicitude de inicio da AEE do plan especial (expediente 2016AEE1866) e confirmada posteriormente coa emisión do informe ambiental estratéxico (IAE) do 22 de agosto de 2016, que dá por finalizada a avaliación ambiental estratéxica simplificada. As prescricións do IAE deberán incorporarse ao plan especial para a súa aprobación e son as seguintes:

a) Estender o ámbito do plan especial á totalidade dos terreos incluídos na declaración do monumento natural da praia das Catedrais.

b) En todo o ámbito de influencia visual do monumento natural, os proxectos de construción ou infraestruturas deberán conter un estudo de impacto e integración paisaxística, conforme o sinalado no artigo 11 da Lei 7/2008, do 7 de xullo, de protección da paisaxe de Galicia.

c) As actuacións previstas no desenvolvemento do plan especial que poidan afectar o monumento natural (como a substitución das sendas interiores por plataformas sobreelevadas, o novo acceso ao areal, ou os labores de restauración de parcelas) deben realizar unha avaliación axeitada das súas repercusións no espazo, garantindo a non afección aos hábitats e especies protexidos, e contar co informe favorable da Dirección Xeral de Conservación da Natureza.

d) O plan deberá prestar especial atención ao deseño da área de solo dotacional, onde se prevé a implantación dos aparcadoiros, o centro de interpretación e a zona de recepción de visitantes, para acadar un bo grao de naturalización coa contorna. Así, o tratamento destas áreas terá un impacto mínimo sobre o solo, a cuberta vexetal e a iluminación natural da zona.

e) Incorporaranse as medidas de seguimento ambiental do plan, o seguimento do fluxo de visitantes e do uso das diferentes infraestruturas, identificando posibles efectos imprevistos.

O contido íntegro do dito plan queda á disposición do público na sede electrónica do Concello de Ribadeo, http://ribadeo.gal/.

Ribadeo, 29 de xuño de 2020

Fernando Suárez Barcia
Alcalde