O 20 de febreiro de 2020 publicouse no Diario Oficial de Galicia a Resolución do 31 de decembro de 2019 pola que se establecen as bases reguladoras para a concesión, en réxime de concorrencia competitiva, das subvencións para a consolidación de unidades mixtas de investigación aliñadas cos retos estratéxicos e prioridades identificados na RIS3 para Galicia, cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020, e se procede á súa convocatoria para o ano 2020 (código de procedemento IN853B).
Os artigos 3 e 4 desta resolución de convocatoria establecen os requisitos que deben cumprir, respectivamente, os beneficiarios e as unidades mixtas de investigación para poderen optar ás axudas.
A Comisión de Selección prevista no artigo 16 das bases reguladoras, reunida o 14 de xullo de 2020, elaborou unha proposta de financiamento das solicitudes por orde decrecente da puntuación acadada, tendo en conta os informes de valoración emitidos polos avaliadores. A proposta da Comisión de Selección prevé axudas que superan o importe da convocatoria, coa previsión de que se poida ampliar o crédito de acordo co disposto no artigo 2 das bases reguladoras.
Neste senso, o artigo 2 establece a aplicación orzamentaria e o importe previsto para o financiamento das devanditas subvencións, así como a posibilidade de ampliar os créditos dedicados a esta convocatoria, logo de declaración de dispoñibilidade de crédito, como consecuencia das circunstancias establecidas no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, e, se é o caso, logo de aprobación da modificación orzamentaria que proceda.
Actualmente, na aplicación orzamentaria correspondente existe crédito dispoñible procedente de remanentes da convocatoria para a creación e posta en marcha de unidades mixtas de investigación do ano 2020 financiada con cargo ao mesmo crédito e o mesmo código de proxecto, polo que se considera oportuno ampliar a dotación orzamentaria consignada inicialmente e incrementar o importe total da axuda convocada nas cantidades necesarias para atender a proposta da Comisión de Selección.
No artigo 20 da convocatoria regúlanse a resolución e a notificación destas axudas unha vez que a Comisión de selección seleccione as solicitudes admitidas e emita un informe no cal se concrete o resultado da avaliación efectuada e a contía da axuda proposta, conforme os criterios establecidos nos artigos 17 e 18.
De acordo co anterior, unha vez declarada a dispoñibilidade de crédito, vista a Lei 9/2007, do 13 de xuño, de subvencións de Galicia, e de acordo co establecido no artigo 30.2.b) do Decreto 11/2009, do 8 de xaneiro, polo que se aproba o seu regulamento,
RESOLVO:
1. Ampliar o importe total do crédito das axudas establecidas na Resolución do 31 de decembro de 2019 pola que se establecen as bases reguladoras para a concesión, en réxime de concorrencia competitiva, das subvencións para a consolidación de unidades mixtas de investigación aliñadas cos retos estratéxicos e prioridades identificados na RIS3 para Galicia, cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020, e se procede á súa convocatoria para o ano 2020 (código de procedemento IN853B).
Na táboa seguinte detállase o crédito definitivo:
Aplicación orzamentaria |
Ano 2020 (€) |
Ano 2021 (€) |
Ano 2022 (€) |
Ano 2023 (€) |
Total (€) |
|
Inicial |
09.A3.561A.781.0 2016 00015 |
240.800,00 |
679.600,00 |
679.600,00 |
400.000,00 |
2.000.000,00 |
Ampliación |
09.A3.561A.781.0 2016 00015 |
80.203,01 |
142.163,56 |
64.968,30 |
0,00 |
287.334,87 |
Total |
09.A3.561A.781.0 2016 00015 |
321.003,01 |
821.763,56 |
744.568,30 |
400.000,00 |
2.287.334,87 |
2. Conceder as axudas para a consolidación das unidades mixtas de investigación que figuran como anexo a esta resolución, por orde decrecente de puntuación, por un importe total de 2.287.334,87 euros coa seguinte distribución por anualidades:
Aplicación orzamentaria |
Ano 2020 (€) |
Ano 2021 (€) |
Ano 2022 (€) |
Ano 2023 (€) |
Total (€) |
09.A3.561A.781.0 2016 00015 |
321.003,01 |
821.763,56 |
744.568,30 |
400.000,00 |
2.287.334,87 |
Estas axudas están cofinanciadas no marco do programa operativo Feder Galicia 2014-2020: eixe 1, Potenciar a investigación, o desenvolvemento tecnolóxico e a innovación, prioridade de investimento 1.2, Fomento do investimento empresarial en I+i, desenvolvemento de vínculos e sinerxías entre as empresas, os centros de investigación e desenvolvemento e o sector do ensino superior, en particular mediante o fomento do investimento no desenvolvemento de produtos e servizos, a transferencia de tecnoloxía, a innovación social, a innovación ecolóxica, as aplicacións de servizo público, o estímulo da demanda, a interconexión en rede, as agrupacións e a innovación aberta a través dunha especialización intelixente, e mediante o apoio á investigación tecnolóxica e aplicada, liñas piloto, accións de validación precoz dos produtos, capacidades de fabricación avanzada e primeira produción, en particular, en tecnoloxías facilitadoras esenciais e difusión de tecnoloxías polivalentes, obxectivo específico 1.2.3, Fomento e xeración de coñecemento de fronteira e de coñecemento orientado aos retos da sociedade, desenvolvemento de tecnoloxías emerxentes e actuación CPSO 1.2.3.2, Actividades de investigación e innovación para o desenvolvemento de proxectos estratéxicos público-privados: centros mixtos de I+D+i.
O pagamento destas axudas realizarase conforme o establecido no artigo 27 da resolución de convocatoria.
Para a xustificación da subvención deberá presentarse a documentación indicada no artigo 26 da convocatoria nos prazos establecidos no punto 2 do citado artigo.
Contra esta resolución, sen prexuízo de que os interesados poidan exercer calquera outro que consideren procedente, poderán interpoñer recurso de alzada no prazo dun mes desde o día seguinte ao da publicación desta resolución no Diario Oficial de Galicia, perante o presidente da Axencia Galega de Innovación.
Santiago de Compostela, 20 de xullo de 2020
Patricia Argerey Vilar
Directora da Axencia Galega de Innovación