A Xunta de Goberno local da cidade de Santiago de Compostela, na sesión ordinaria que tivo lugar o día 6 de xullo de 2020, adoptou o seguinte acordo:
a) Aprobar inicialmente o estudo de detalle para a mellora da accesibilidade e as condicións xerais nas edificacións do grupo de vivendas Diego Xelmírez (Santa Marta de Arriba, números 25 a 33), segundo o proxecto redactado pola arquitecta Natalia Seoane Bueno, presentado con data 28 de abril de 2020.
O estudo de detalle contén a delimitación espacial do ámbito da actuación, para os efectos do disposto polos artigos 24 do Real decreto lexislativo 7/2015 e 13.2 da Lei 1/2019, de rehabilitación, rexeneración e renovación urbanas de Galicia, que habilitan para a ocupación do dominio público e das superficies comúns de uso privativo para a instalación de ascensores ou outros elementos que aseguren a accesibilidade universal, así como para a realización de obras ou instalacións que reduzan a demanda enerxética.
Ao abeiro do disposto polo artigo 13.5 da citada Lei 1/2019, acórdase que as actuacións dirixidas á mellora das condicións de accesibilidade e da eficiencia enerxética previstas no estudo de detalle non computarán para os efectos de edificabilidade, volume máximo edificable e ocupación de parcela, nin de distancias mínimas a lindeiros, outras edificacións, espazos públicos e vías públicas, ou cumprimento de aliñacións.
b) En aplicación do procedemento regulado polos artigos 80.2 da Lei 2/2016, do solo de Galicia, e 194 do seu regulamento, o estudo de detalle inicialmente aprobado someterase a información pública durante o prazo dun mes, mediante anuncios que para o efecto se publicarán no Diario Oficial de Galicia e nun xornal dos de maior circulación na provincia. Simultaneamente, practicarase notificación individual aos titulares catastrais das parcelas afectadas.
Durante o trámite de información pública solicitarase o informe da Dirección Xeral de Patrimonio Cultural.
O que se publica co fin de que, durante o prazo dun (1) mes contado a partir do día seguinte ao da publicación deste anuncio, os interesados poidan consultar o expediente e formular as alegacións que xulguen oportunas. A documentación sometida a exposición pública estará ao dispor dos interesados no Servizo de Planeamento e Xestión do Concello de Santiago de Compostela (Pazo de Raxoi, 2º andar), de luns a venres, das 9.00 ás 14.00 horas; e na páxina web do concello https://transparencia.santiagodecompostela.gal/Estudo-de-detalle-mellora-accesibilidade-condicions-xerais-edificacions-grupo-vivendas-DiegoXelmirez/gl
Santiago de Compostela, 21 de xullo de 2020
O alcalde
P.D. (DEC/4742/2019, do 17 de xuño)
Mercedes Rosón Ferreiro
Concelleira delegada de Urbanismo, Vivenda e Cidade Histórica