O artigo 26 do Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación (Boletín Oficial del Estado núm. 316, do 31 de decembro), regula a revisión das autorizacións ambientais integradas.

Os artigos 15 e 16 do Real decreto 815/2013, do 18 de outubro, polo que se aproba o Regulamento de emisións industriais e de desenvolvemento da Lei 16/2002, do 1 de xullo, de prevención e control integrados da contaminación (Boletín Oficial del Estado núm. 251, do 19 de outubro de 2013), regulan o procedemento de revisión das autorizacións ambientais integradas.

Para os efectos previstos no artigo 15.5.a) do Real decreto 815/2013, do 18 de outubro, sométese a información pública, durante un período de vinte (20) días hábiles contados a partir do día seguinte ao da publicación deste anuncio no Diario Oficial de Galicia, o documento titulado Memoria de renovación de autorización ambiental integrada Monte Lodoso. Explotación avícola de galiñas reprodutoras, para que calquera persoa interesada poida consultalo e, de ser o caso, presentar dentro do citado prazo as alegacións, suxestións ou observacións que considere convenientes.

Os documentos estarán á disposición dos administrados nas dependencias da Dirección Xeral de Calidade Ambiental, Sostibilidade e Cambio Climático, Servizo de Prevención e Control Integrados da Contaminación, en horario de atención ao público (rúa de San Lázaro, s/n, Santiago de Compostela).

Ademais, tamén se poderá consultar na páxina web da Consellería de Medio Ambiente, Territorio e Vivenda (http://cmatv.xunta.gal/>>medio ambiente e sostibilidade>>prevención e control de actividades>>autorización ambiental integrada>>proxectos en información pública).

As alegacións, suxestións ou observacións dirixiranse ao Servizo de Prevención e Control Integrados da Contaminación.

Santiago de Compostela, 19 de outubro de 2020

María Sagrario Pérez Castellanos
Directora xeral de Calidade Ambiental, Sostibilidade e Cambio Climático

ANEXO

Expediente: 2019-IPPC-M-156.

Número da autorización ambiental integrada: 2015-IPPC-70-305.

Categoría principal da actividade: anexo I, categoría 9.3.a), do Real decreto lexislativo 1/2016, do 16 de decembro.

Titular: Sociedad Cooperativa Unimiño, S.C.G.

NIF: F32390593.

Localización da instalación: lugar de Monte Lodoso, s/n, 27229 Friol (Lugo).

Referencias catastrais das parcelas: 27020A302000540000QD, 27020A302000550000QX, 27020A30300120000QI, 27020A30200060000QJ.

Actividade principal: explotación avícola de galiñas reprodutoras destinada á produción de ovo para a súa posterior incubación.

Descrición: a explotación está conformada por 5 naves de 120,6×14 m con capacidade para 52.920 aves e unha nave de 30,5×10,5 m para galos. Cada nave dispón de 2 silos de almacenamento de penso de 16 m3.

O proceso produtivo empeza coa entrada nas naves dun lote de galiñas con 15 a 20 semanas de idade procedentes de explotacións de recría. A duración dos ciclos produtivos é de aproximadamente 45 semanas. Os ovos producidos polas galiñas serán conducidos a unha nave de clasificación para o seu posterior envío a plantas de incubación. Unha vez finalizado o ciclo, os animais serán levados ao matadoiro e procederase á limpeza e desinfección das naves e dos equipamentos, despois do cal haberá un baleiro sanitario de entre 15-30 días antes de introducir un novo lote de animais.

A totalidade do esterco sólido producido na explotación será enviado a un xestor autorizado. Para o almacenamento do esterco, a explotación contará cunha esterqueira impermeable cuberta con depósito de lixiviados.

Verteduras:

– Augas de limpeza das naves de aloxamento de aves e da nave de procesado de ovo, que se recollerán nun depósito estanco de 200 m3 para o seu posterior envío a un xestor autorizado.

– Augas residuais xeradas nos aseos e vestiarios do persoal e augas da vivenda do encargado, as cales son conducidas a un sistema de depuración que consta dunha fosa séptica.

– Augas xeradas no vao sanitario e arco de desinfección, as cales son enviadas a un depósito estanco de 2 m3 para o seu posterior envío a un xestor autorizado.

As augas pluviais discorrerán pola parcela; para evitar a incorporación das augas de escoamento de chuvia procedentes do exterior do recinto da explotación existen desvíos de auga como foxos perimetrais.