O 17 de febreiro de 2021 publicouse no Diario Oficial de Galicia núm. 32 a Resolución do 3 de febreiro de 2021, pola que se establecen as bases reguladoras para a concesión, en réxime de concorrencia competitiva, de subvencións a entidades organizadoras de congresos, seminarios, convencións, incentivos ou calquera outro evento relativo ao turismo de reunións en Galicia, e se procede á súa convocatoria para os anos 2021 e 2022, que serán susceptibles de financiamento no marco do eixe REACT-UE do programa operativo Feder Galicia 2014-2020 (código de procedemento TU403A).
Advertidos determinados defectos na referida resolución, procede facer as seguintes concrecións e modificacións de cara a proporcionarlles unha maior seguridade xurídica ás entidades solicitantes:
Por todo o exposto,
RESOLVO:
Primeiro
Modifícase a terceira categoría de gastos subvencionables do número 2 do artigo 2, que pasa a estar redactado da seguinte maneira:
«– Gastos de sede e equipamento como: alugueiros de locais, salóns, carpas e similares; sede de congresistas e poñentes; iluminación, megafonía e servizos audiovisuais; rotulación exterior e interior do evento, paneis e carteis indicativos. Así mesmo, considérase gasto aquel que vén motivado pola adecuación das medidas hixiénico-sanitarias á normativa vixente no momento de celebración do evento, así como, de ser o caso, das probas analíticas correspondentes aos participantes (PCR, antíxenos, serolóxicos..)».
Segundo
Modifícanse as letras A.1, B.1 e D.1 do artigo 12, que pasan a estar redactadas da seguinte maneira:
«1. Os proxectos valoraranse ata 100 puntos de acordo cos seguintes criterios obxectivos de outorgamento:
A) Tipoloxía do evento e ámbito xeográfico do congreso (ata 45 puntos):
A.1. Tipo de congreso, evento ou reunión (ata 10 puntos):
Congreso/incentivo/corporativo: 10 puntos.
Outros: 5 puntos».
«B.1. Volume da reunión (asistentes) (ata 10 puntos):
– Máis de 601 asistentes: 10 puntos.
– Entre 301 e 600 asistentes: 7 puntos.
– Entre 151 e 300 asistentes: 4 puntos.
– Entre 50 e 150 asistentes: 2 puntos».
«D.1. Valoración da traxectoria da entidade solicitante (ata 10 puntos).
Nesta epígrafe avaliarase a súa traxectoria segundo o número de eventos promovidos nos últimos 5 anos e o ámbito xeográfico destes:
a) De ámbito internacional: 5 puntos.
– Entre 1 e 3 eventos: 3 puntos.
– Máis de 3 eventos: 5 puntos.
b) De ámbito nacional: 3 puntos.
– Entre 1 e 3 eventos: 2 puntos.
– Máis de 3 eventos: 3 puntos.
c) De ámbito autonómico: 2 puntos.
– Máis de 3 eventos: 2 puntos».
Terceiro
Suprímese o último parágrafo do artigo 12 in fine: «Terán o carácter de congreso ou evento virtual aquel que se desenvolva a través de medios tecnolóxicos na súa totalidade».
Cuarto
Esta modificación implica un novo prazo de presentación de solicitudes, que será dun mes contado a partir do día seguinte ao da publicación desta resolución no Diario Oficial de Galicia. Entenderase como último día do prazo o correspondente ao mesmo ordinal do día da publicación.
Se o último día de prazo é inhábil, entenderase prorrogado ao primeiro día hábil seguinte e, se no mes do vencemento non hai día equivalente ao inicial do cómputo, entenderase que o prazo remata o último do mes.
Santiago de Compostela, 11 de marzo de 2021
Mª Nava Castro Domínguez
Directora da Axencia Turismo de Galicia