Expediente-e: IN407A 2020/174-1.

Promotora: Industrial Barcalesa, S.L.

Denominación da instalación: LMT, CST e LBT Choupana, no lugar da Choupana.

Concello: Santa Comba.

Feitos:

1. O 9 de novembro de 2020, a empresa promotora solicitou a autorización administrativa previa e a autorización administrativa de construción do proxecto de execución da dita instalación de distribución eléctrica. Achegan o proxecto que inclúe memoria, planos e orzamento, ao abeiro do artigo 123 do Real decreto 1955/2000 que abrangue os seguintes documentos:

• Proxecto de execución nomeado: LMT, CST e LBT Choupana.

2. O proxecto non se someteu ao trámite de información pública, segundo o artigo 38 da Lei 5/2017, do 19 de outubro, de fomento da implantación de iniciativas empresariais en Galicia (DOG núm. 203, do 25 de outubro).

3. Solicitouse o preceptivo informe ás distintas administracións, organismos ou, de ser o caso, empresas de servizo público ou de servizos de interese xeral afectadas, isto é, o Servizo Provincial da AXI-Xefatura Territorial da Consellería de Infraestruturas e Mobilidade da Coruña e o Concello de Santa Comba. A empresa promotora manifestou a súa conformidade co condicionado establecido pola AXI. A día da elaboración do informe técnico, non consta no expediente resposta do organismo afectado, é dicir, o concello, á solicitude do condicionado solicitado.

4. Os servizos técnicos da xefatura territorial emitiron informe favorable sobre a dita solicitude.

Consideracións legais e técnicas:

1. O xefe territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia, e o artigo 39.a) do Decreto 230/2021, do 11 de xaneiro, polo que se establece a estrutura orgánica da Vicepresidencia Segunda e Consellería de Economía, Empresa e Innovación.

2. A lexislación que se aplica neste expediente é a que a seguir se relaciona:

a) A Lei 24/2013, do 26 de decembro, do sector eléctrico.

b) O Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

c) O Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

d) O Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

e) O Real decreto 842/2002, do 2 de agosto, polo que se aproba o Regulamento electrotécnico para baixa tensión.

f) A Lei 5/2017, do 19 de outubro, de fomento da implantación de iniciativas empresariais en Galicia (DOG núm. 203, do 25 de outubro).

3. As características técnicas da instalación son as que a seguir se describen:

• Construción dun centro de seccionamento e transformación (CST) cun transformador de potencia de 100 kVA, dúas celas de entrada, unha cela de protección de transformador, cadro de baixa tensión, equipamentos de telexestión, equipamentos de telemando e demais aparellaxe para o seu correcto funcionamento. O CST transforma tensión de 20 kV a 400/230 V para manter a RBT existente dos lugares da Choupana/Fontecada/San Martiño.

• O CST fará a función de seccionamento da LMT existente Babión-Catro Ventos (expedientes INA407A 1998/409-1 e IN407A 2020/63-1), mediante dúas celas de entrada que permiten a alimentación alternativa desde o punto fronteira Catro Ventos, establecido coa distribuidora Eléctrica de Santa Comba ou polo punto fronteira Babión, establecido coa distribuidora Unión Fenosa Distribución.

• A entrada desde o punto fronteira Catro Ventos ao CST realizarase mediante conexión en LMTS desde un apoio C-2000/14, número 32-33 (obxecto de substitución no expediente IN407A 2020/63-1) e pertencente á liña Babión-Catro Ventos mediante un paso aéreo soterrado (PAS), instalándose para iso seccionadores unipolares SXS/coitelas e pararraios. Desde o PAS chega ao CST proxectado PFU-4 de Ormazábal ata a cela de entrada, en condutor RHZ1- 2OL 3×(1×240) mm² Al, cunha lonxitude de 21,28 m.

• A entrada desde o punto fronteira Babión ao CST realizarase mediante conexión en LMTS desde a cela de entrada, en condutor RHZ1-2OL 3×(1×240) mm² Al, cunha lonxitude de 143 m ata a arqueta proxectada número 2, onde se realizará empalme coa LMTS existente pertencente á liña Babión-Catro Ventos en condutor RHZ1-2OL 3×(1×95) mm² Al. Desmantélase o apoio existente número G2-32 e realízase un empalme entre a liña soterrada existente e o treito soterrado proxectado.

• Respecto da LMT, desmantelaranse 119 m de LMTA en condutor LA-30 desde o apoio número G2-32 que se retira ao número 32-33.

4. No expediente consta un informe favorable dos servizos técnicos desta xefatura territorial.

De acordo con todo o sinalado,

RESOLVO:

1. Conceder a autorización administrativa previa e a autorización administrativa de construción á dita instalación de distribución eléctrica.

2. A instalación executarase no prazo dun ano, contado a partir do día seguinte ao da publicación da presente resolución no Diario Oficial de Galicia.

3. Para a posta en funcionamento da instalación autorizada, deberá achegar ante esta xefatura territorial unha solicitude coa cal xuntará a seguinte documentación:

I. As declaracións de conformidade relativas ao material ou equipamento, e as certificacións ou homologacións, se procede.

II. Un certificado do/da director/a da montaxe en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas oportunas na montaxe da instalación e posta a punto.

4. Esta aprobación outórgase sen prexuízo doutras que sexan de aplicación segundo a lexislación vixente, en especial as relativas á ordenación do territorio e ao ambiente.

Contra esta resolución, que non é definitiva en vía administrativa, poderase interpor recurso de alzada ante o vicepresidente segundo e conselleiro de Economía, Empresa e Innovación, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que considere pertinente.

Mediante este documento notifícaselle á empresa promotora esta resolución, segundo o exixido no artigo 40.1 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

A Coruña, 19 de febreiro de 2021

Isidoro Martínez Arca
Xefe territorial da Coruña