O día 26 de febreiro de 2021 publicouse no Diario Oficial de Galicia número 39 a Orde do 31 de decembro de 2020 pola que se establecen as bases reguladoras das axudas para accións silvícolas de prevención dos danos causados aos bosques por incendios, desastres naturais e para o incremento da capacidade de adaptación e do valor ambiental dos ecosistemas forestais, cofinanciadas polo Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2021 (código de procedemento MR605A).

O prazo para a presentación de solicitudes era de trinta días hábiles contados a partir do día seguinte ao da publicación desta orde no Diario Oficial de Galicia, prazo que remataba o vindeiro día 14 de abril de 2021.

A expansión do SARS-Cov-2 xerou unha crise sanitaria sen precedentes recentes que motivou a declaración dun novo estado de alarma para conter a propagación de infeccións causadas por este virus mediante o Real decreto 926/2020, do 25 de outubro, que se prorrogou ata o 9 de maio de 2021, conforme o artigo 2 do Real decreto 956/2020, do 3 de novembro.

No momento actual, a situación epidemiolóxica e sanitaria de Galicia determina a adopción e o mantemento de medidas no territorio da Comunidade Autónoma para conter a propagación de infeccións causadas polo SARS-Cov-2. De feito, no Decreto 31/2021, do 25 de febreiro, da Presidencia da Xunta de Galicia, e na Orde do 25 de febreiro de 2021, da Consellería de Sanidade, mantense a maioría das medidas de prevención específicas que abranguen, entre outras, a limitación de reunións.

Debido a estas circunstancias, e tendo en conta que a dita convocatoria vai dirixida a sociedades de fomento forestal (Sofor), propietarios particulares de forma individual, asociacións e agrupacións de propietarios particulares formalmente constituídas e inscritas no Rexistro de Asociacións da Xunta de Galicia, cooperativas agrarias, pro indivisos, pro indivisos legalmente constituídos, montes de varas, abertais, de voces, de vocerío e fabeo, comunidades de bens, outras persoas xurídicas, entidades locais e comunidades de montes veciñais en man común (en diante, CMVMC) que requiren, na súa maior parte, de reunións de persoas non conviventes para a toma de decisións antes de presentar a solicitude axuda.

En consecuencia, de conformidade co previsto no artigo 30.1.3 do Estatuto de autonomía de Galicia, e en uso das facultades que me confiren os artigos 7 e 14 da Lei 9/2007, do 13 de xuño, de subvencións de Galicia, e de acordo co disposto na Lei 1/1983, do 22 de febreiro, de normas reguladoras da Xunta e da súa Presidencia, e demais normativa concorrente,

DISPOÑO:

Artigo único. Modificación do prazo de presentación de solicitudes

Modifícase o número 1 do artigo 12 no referente ao prazo de presentación de solicitudes, que pasa a ser de corenta e cinco días hábiles.

Disposición derradeira única. Entrada en vigor

Esta orde entrará en vigor o día da súa publicación no Diario Oficial de Galicia.

Santiago de Compostela, 25 de marzo de 2021

José González Vázquez
Conselleiro do Medio Rural