A Orde do 9 de xullo de 2021 pola que se regula e se inicia o procedemento de acreditación das/dos enfermeiras/os para a indicación, uso e autorización da dispensación de medicamentos e produtos sanitarios de uso humano, publicada no Diario Oficial de Galicia núm.134, do 15 de xullo de 2021, estableceu o procedemento aplicable para a obtención, por parte das/dos enfermeiras/os de coidados xerais e especializados que exercen a súa actividade profesional no ámbito da Comunidade Autónoma de Galicia, da acreditación necesaria para proceder á indicación, uso e autorización da dispensación de medicamentos e produtos sanitarios de uso humano.
Este procedemento, regulado con base na previsión establecida polo artigo 10 do Real decreto 954/2015, do 23 de outubro, polo que se regula a indicación, uso e autorización de dispensación de medicamentos e produtos sanitarios de uso humano por parte dos/das enfermeiros/as, iníciase de oficio, de xeito que todos aqueles profesionais que reúnan e xustifiquen estar en posesión dos requisitos establecidos na orde poderán ser acreditados directamente mediante resolución da persoa titular da Secretaría Xeral Técnica da Consellería de Sanidade.
A acreditación outorgada configúrase como unha actuación administrativa automatizada, de xeito que as persoas titulares da Secretaría Xeral Técnica da Consellería de Sanidade e dos centros directivos do Servizo Galego de Saúde con competencias en materia de desenvolvemento, xestión e seguimento do expediente profesional electrónico, e de asistencia sanitaria, adoptarán as medidas necesarias para que a súa emisión se realice integramente a través de medios electrónicos.
A Lei 40/2015, do 1 de outubro, de réxime xurídico do sector público, integra as materias que demandaban unha regulación unitaria das relacións ad intra de cada Administración e das relacións entre elas, como a sinatura e as sedes electrónicas, o intercambio electrónico de datos en contornos pechados de comunicación e a actuación administrativa automatizada.
O artigo 41.1 da citada lei define a actuación administrativa automatizada como calquera acto ou actuación realizados integramente a través de medios electrónicos por unha Administración pública no marco dun procedemento administrativo e na cal non interviñese de forma directa un empregado público.
O artigo 41.2 da dita lei determina que, en caso de actuación administrativa automatizada, se deberá establecer previamente o órgano ou os órganos competentes, segundo os casos, para a definición das especificacións, a programación, o mantemento, a supervisión e o control de calidade e, se for o caso, a auditoría do sistema de información e do seu código fonte. Así mesmo, indicarase o órgano que debe ser considerado responsable para efectos de impugnación.
A Lei 4/2019, do 17 de xullo, de administración dixital de Galicia, establece no artigo 76.4 que as actuacións administrativas automatizadas se deberán declarar mediante unha resolución conxunta do órgano competente para a definición das especificacións, a programación, o mantemento, a supervisión e o control de calidade e, se é o caso, a auditoría do sistema de información e do seu código fonte, así como do órgano responsable para os efectos de impugnación. Nesta resolución especificarase a identificación de tales órganos e os sistemas de sinatura utilizados, de ser o caso, para a actuación administrativa automatizada. Así mesmo, o artigo 76.5 indica que se publicará na sede electrónica da Xunta de Galicia e no Diario Oficial de Galicia o texto íntegro das resolucións indicadas no punto anterior.
Por todo o exposto,
RESOLVO:
Primeiro. Declarar como actuación administrativa automatizada, a través de sistemas de información no ámbito da Consellería de Sanidade e do Servizo Galego de Saúde, a emisión da acreditación dos/das enfermeiros/as para a indicación, uso e autorización da dispensación de medicamentos e produtos sanitarios de uso humano.
Segundo. Os órganos responsables en relación coa actuación administrativa automatizada sinalada no punto anterior serán:
a) A Secretaría Xeral Técnica da Consellería de Sanidade como órgano responsable da definición das especificacións desta actuación administrativa automatizada.
b) A Consellería de Sanidade como órgano responsable para os efectos de impugnación.
Terceiro. Autorizar a Subdirección Xeral de Sistemas e Tecnoloxías da Información da Consellería de Sanidade para xestionar a solicitude de creación dun selo electrónico denominado «Acreditación dispensación de medicamentos» ante a autoridade de servizos de certificación que corresponda.
A titularidade, así como a responsabilidade do seu uso, corresponderalle á Secretaría Xeral Técnica da Consellería de Sanidade.
O selo electrónico estará baseado nun certificado electrónico recoñecido ou cualificado e as súas características técnicas xerais serán as que consten na declaración de prácticas de certificación do emisor do certificado.
Os datos necesarios para acceder ao servizo de validación para a verificación do certificado estarán incluídos no certificado. Os datos que deberán constar no selo electrónico son os seguintes:
a) NIF do organismo subscritor: S1511001H.
b) Organismo subscritor: Consellería de Sanidade.
c) Nome do selo: «Acreditación dispensación de medicamentos».
Cuarto. Autorizar a Secretaría Xeral Técnica da Consellería de Sanidade para utilizar o selo electrónico denominado «Acreditación dispensación de medicamentos» para asinar a actuación administrativa automatizada declarada nesta resolución e para realizar as tarefas técnicas precisas para a súa implantación efectiva nos sistemas automatizados que dan soporte á actuación e ao procedemento mencionado.
Quinto. Autorizar a Subdirección Xeral de Sistemas e Tecnoloxías da Información para a renovación do selo electrónico «Acreditación dispensación de medicamentos» sempre e cando continúe vixente a actuación administrativa automatizada declarada nesta resolución.
Sexto. A presente resolución producirá efectos a partir do día seguinte a súa publicación no DOG.
Santiago de Compostela, 26 de xullo de 2021
Alberto Fuentes Losada
Secretario xeral técnico da Consellería de Sanidade