Examinada a solicitude de deslindamento formulada polos representantes do MVMC Monte Grande, pertencente á CMVMC das parroquias de Garabelos (San Xoán), de Nigueiroá (Santiago), do Ribeiro (San Pedro Fiz) e de Vilar (San Pedro Fiz); e o MVMC Monte Grande e Cancelo, Coutada, Foxo e Campo Escuro, pertencente á CMVMC de Carpazás, no concello de Bande, resultan os seguintes
Feitos:
Primeiro. O día 26 de febreiro de 2021 a CMVMC das parroquias de Garabelos (San Xoán), de Nigueiroá (Santiago), do Ribeiro (San Pedro Fiz) e de Vilar (San Pedro Fiz) presentou un escrito no rexistro electrónico da Xunta de Galicia (nº 2021/427050). Nel solicita solicita que se tramite o deslindamento realizado entre os MVMC Monte Grande e o MVMC Cancelo, Coutada, Foxo e Campo Escuro, no concello de Bande.
Coa solicitude achegou a seguinte documentación:
– Memoria (inclúe anexos e planos).
– Shape de liña de deslindamento.
– Shape de vértices de deslindamento.
Segundo. O día 4 de marzo de 2021 a CMVMC interesada presentou no rexistro electrónico da Xunta de Galicia (nº 2021/486606) unha modificación ou mellora voluntaria da solicitude coa cal presentou a seguinte documentación:
– Demanda de conciliación.
– Sentenza de conciliación.
Terceiro. O día 17 de xuño de 2021 a CMVMC interesada presentou no rexistro electrónico da Xunta de Galicia (nº 2021/1471998) unha nova modificación ou mellora voluntaria da solicitude coa cal presentou a seguinte documentación:
– Escrito xustificativo.
– Memoria corrixida.
Cuarto. O informe do Servizo de Montes da Xefatura Territorial de Ourense do 22 de xuño de 2021 considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.
En consecuencia, o Servizo de Montes propuxo ao Xurado a aprobación do deslindamento, ben que coas seguintes condicións:
Exclúese o vértice 1 denominado Penedo do Arando, por entender que afecta a confluencia do perímetro estremeiro destes dous MVMC co MVMC Monte Grande (1251), pertencente á CMVMC da parroquia de Bande (San Pedro). Este punto de confluencia, por tanto, deberá establecerse mediante un novo procedemento de deslindamento que inclúa tamén o acordo desta CMVMC.
O vértice 7 servirá unicamente para definir a dirección da liña do perímetro estremeiro, desde o vértice 6 ata o límite coas propiedades particulares.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que seguir no deslindamento entre montes veciñais en man común e establece que o xurado provincial de clasificación de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, o Xurado Provincial acordou por unanimidade o día 22 de setembro de 2021:
Aprobar o acto de conciliación acadado polas xuntas reitoras dos MVMC Monte Grande, pertencente á CMVMC das parroquias de Garabelos (San Xoán), de Nigueiroá (Santiago), do Ribeiro (San Pedro Fiz) e de Vilar (San Pedro Fiz); e o MVMC Cancelo, Coutada, Foxo e Campo Escuro, pertencente á CMVMC de Carpazás, no concello de Bande, de acordo coas consideracións realizadas no informe do Servizo de Montes do 22 de xuño de 2021.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 27 de outubro de 2021
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense