O Club Náutico de Rianxo presentou unha solicitude de concesión para a construción e explotación dunhas instalacións náutico-deportivas no porto de Rianxo e achegou a documentación necesaria para a súa tramitación, que inclúe unha memoria económica financeira e o estudo de viabilidade, un anteproxecto das obras e o estudo de impacto ambiental.

O día 20 de agosto de 2021, a presidenta de Portos de Galicia acordou arquivar o expediente concesional iniciado en decembro de 2016 tras a solicitude presentada polo Club Náutico de Rianxo e iniciar un novo procedemento de avaliación de impacto ambiental ordinaria do novo proxecto presentado acolléndose ao suposto que establece o artigo 7.1.d) da Lei 21/2013, do 9 de decembro, de avaliación ambiental.

En cumprimento do disposto no artigo 36 da Lei 21/2013, do 9 de decembro, de avaliación ambiental, Portos de Galicia, como órgano substantivo, fai público o proxecto e o seu estudo de impacto ambiental para que as persoas e entidades interesadas poidan examinalos e presentar por escrito as alegacións que consideren oportunas, que remitirán a Portos de Galicia (Departamento de Portos Deportivos) no prazo máximo de trinta (30) días hábiles, contados a partir do seguinte ao da publicación deste anuncio no Diario Oficial de Galicia.

A documentación está á disposición na web portosdegalicia.gal

Santiago de Compostela, 23 de novembro de 2021

Susana Lenguas Gil
Presidenta de Portos de Galicia