O director da Axencia Galega de Infraestruturas, por delegación da conselleira de Infraestruturas e Mobilidade (Orde do 7 de setembro de 2017, Diario Oficial de Galicia do 20 de setembro), vistos os informes das administracións afectadas no trámite de información pública, ditou o 24 de xaneiro de 2022 a seguinte resolución:
«Resolución pola que se aproba o expediente de información pública e definitivamente o proxecto de construción do Plan de seguridade viaria de Galicia 2016-2020: mellora da seguridade viaria (MSV) na contorna de treito de concentración de accidentes (TCA) na estrada PO-504, puntos quilométricos (pp.qq.) 1+300 a 3+000, de clave PO/18/115.06.
Antecedentes de feito.
Primeiro. O obxecto do proxecto é a definición e xustificación das actuacións necesarias para a mellora da seguridade viaria no TCA da estrada PO-504, comprendido entre os p.q. 1+300 e 3+000, no concello de Sanxenxo (Pontevedra).
Segundo. No Diario Oficial de Galicia núm. 57, do 22 de marzo de 2019, publicouse o Anuncio do 14 de marzo de 2019 polo que se somete ao trámite de información pública a separata para información pública do proxecto de construción do Plan de seguridade viaria de Galicia 2016-2020: mellora de seguridade viaria (MSV) na contorna de treitos de concentración de accidentes (TCA) na estrada PO-504, puntos quilométricos (p.q.) 1+300 a 3+000, de clave PO/18/115.06, así como a relación individual de bens, dereitos e propietarios afectados polo proxecto referenciado.
Terceiro. As administracións afectadas emitiron os correspondentes informes e no trámite de información pública formularon alegacións as persoas interesadas. A todas elas déuselles resposta motivada, segundo figura no informe que consta no expediente, que lles foi notificado ás administracións ás cales se lles deu trámite de informe e aos particulares que presentaron alegacións.
Fundamentos de dereito.
Primeiro. A conselleira de Infraestruturas e Mobilidade é competente para resolver os expedientes de información pública en materia de estradas e informes das administracións afectadas, de acordo co Decreto 26/2019, do 7 de marzo, polo que se establece a estrutura orgánica da Consellería de Infraestruturas e Mobilidade. Esta competencia atópase delegada na persoa titular da dirección da Axencia Galega de Infraestruturas, segundo o artigo 8.1.b) da Orde do 7 de setembro de 2017 sobre delegación de competencias no secretario xeral técnico e noutros órganos e entidades públicas adscritos a esta consellería (DOG núm. 179, do 20 de setembro).
Segundo. O artigo 21.4 da Lei 8/2013, do 28 de xuño, de estradas de Galicia, establece que, transcorridos os prazos dos trámites de información pública e informe das administracións afectadas e recibidas as alegacións e informes presentados, se dará resposta motivada ás alegacións formuladas. O informe resultante poñerase á disposición das persoas interesadas e notificaráselles ás administracións ás cales se lles dese trámite de informe e aos particulares que presentasen alegacións. Finalmente, resolverase tamén sobre a aprobación do expediente de información pública.
Logo de revisados os informes emitidos e as alegacións formuladas, procede introducir as seguintes modificacións relativas ao trazado sometido a información pública:
• A vía que entronca coa PO-504 na contorna da intersección do p.q. 2+740 manterase de dobre sentido de circulación e modificarase o deseño da intersección desta coa estrada autonómica PO-504, para adaptalo a tal circunstancia.
• Modificarase lixeiramente o deseño da intersección do p.q. 0+940, desprazando o paso de peóns e recortando a beirarrúa proxectada na entrada ao local da parcela sinalada no proxecto como 51-001.
• Non se realizará o traslado previsto da parada de bus do p.q. 1+250 e manterase no lugar existente.
• Desprazarase lixeiramente o paso de peóns proxectado no p.q. 2+070, para os efectos de mellorar a ordenación.
• Non se executará a glorieta prevista no p.q. 2+270, ao considerar que supón unha importante afección na contorna.
• Modificarase o deseño da intersección do p.q. 2+740 para manter o actual dobre sentido da vía municipal existente.
• Non se executará a glorieta prevista no p.q. 3+070. No seu lugar, executarase unha intersección en T canalizada.
• Modificarase o pintado do eixe da estrada e incluirase un tramo de liña descontinua para permitir o xiro á esquerda á altura do lugar da Vichona, 37 (contorna do p.q. 2+110) e na fronte da parcela 51-003 (p.q. 0+975).
Desestímanse as demais alegacións e modificacións propostas, de acordo coas xustificacións e fundamentos que constan no expediente de información pública.
O artigo 22.2 da citada Lei 8/2013, do 28 de xuño, establece que, no caso de estudos ou proxectos sometidos aos trámites de información pública e informe das administracións afectadas, unha vez emitido o informe sobre as alegacións presentadas, o órgano competente da Administración promotora da actuación debe adoptar a correspondente resolución, que pode ser de aprobación definitiva de todo o ámbito do estudo ou proxecto ou ben só dunha parte deste.
No seu número 5, o mesmo artigo indica que a aprobación definitiva dos anteproxectos, proxectos de trazado ou proxectos de construción implicará a declaración de utilidade pública, a necesidade de ocupación dos bens e de adquisición dos dereitos necesarios para a execución das obras, dos depósitos dos materiais sobrantes, dos préstamos necesarios para executalas e para a reposición de servizos afectados, así como para a traza de planta do proxecto e as modificacións desta que, de ser o caso, se puideren aprobar posteriormente, e a urxencia da ocupación, todo iso para os efectos de expropiación, ocupación temporal ou imposición ou modificación de servidumes.
No punto 6 do mesmo artigo 22 indícase que «logo de aprobados definitivamente os anteproxectos, proxectos de trazado ou proxectos de construción, as limitacións á propiedade e á titularidade doutros dereitos establecidos nesta lei serán efectivas respecto dos terreos que afecte a actuación correspondente».
De acordo co que establece o artigo 23 da citada Lei 8/2013, do 28 de xuño, os estudos e proxectos sometidos aos trámites de información pública en materia de estradas e informe das administracións afectadas, unha vez aprobados definitivamente, teñen a consideración de proxectos sectoriais de incidencia supramunicipal, segundo o disposto na lexislación autonómica de ordenación do territorio, e as determinacións que neles se conteñen terán forza vinculante para as administracións públicas e para os particulares e prevalecerán sobre as determinacións do planeamento urbanístico vixente, sen prexuízo de que as entidades locais en que se asenten as infraestruturas obxecto do proxecto deberán adaptar o seu planeamento urbanístico ao contido no proxecto.
Polo exposto, o Concello de Sanxenxo deberá adaptar o seu planeamento urbanístico na súa primeira modificación ou revisión ao contido no proxecto.
Terceiro. Que, simultaneamente ao trámite sinalado no parágrafo anterior e para os efectos previstos no artigo 56.1 do Regulamento de expropiación forzosa, se someteu a información pública a relación individual de bens, dereitos e propietarios afectados pola realización da obra correspondente.
De acordo con todo o exposto e tras os informes, alegacións e certificados presentados,
RESOLVO:
Primeiro. Aprobar o expediente de información pública del Plan de seguridade viaria de Galicia 2016-2020: mellora de seguridade viaria (MSV) na contorna de treitos de concentración de accidentes (TCA) na estrada PO-504, puntos quilométricos (p.q.) 1+300 a 3+000, de clave PO/18/115.06.
Segundo. Aprobar o proxecto de construción do Plan de seguridade viaria de Galicia 2016-2020: mellora de seguridade viaria (MSV) na contorna de treitos de concentración de accidentes (TCA) na estrada PO-504, puntos quilométricos (p.q.) 1+300 a 3+000, de clave PO/18/115.06, coas modificacións relativas ao trazado sometido á información pública que se indican no fundamento de dereito segundo.
Terceiro. Consonte establece o artigo 23 da Lei 8/2013, do 28 de xuño, de estradas de Galicia, o Concello de Sanxenxo deberá adaptar o seu planeamento urbanístico ao contido no proxecto, na súa primeira modificación ou revisión.
Contra esta resolución, que pon fin á vía administrativa, poderase interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados desde o día seguinte ao da publicación desta resolución no Diario Oficial de Galicia, de conformidade co establecido nos artigos 10, 14 e 46.1 da Lei 29/1998, do 13 de xullo, reguladora da xurisdición contencioso-administrativa».
O que se fai público para xeral coñecemento.
Santiago de Compostela, 25 de xaneiro de 2022
Carlos Lefler Gullón
Xefe da Área de Deseño de Infraestruturas