Dentro das actividades programadas para o ano 2022, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a realización dun curso selectivo de formación para vixilantes municipais, segundo o previsto no artigo 92.4 da Lei 4/2007, do 20 de abril, de coordinación das policías locais, e no artigo 49 do Decreto 243/2008, do 16 de outubro, que se deberá desenvolver de acordo coas seguintes bases:
1. Obxectivos.
Dotar os vixilantes municipais dunha formación específica que se lles facilite a competencia e a capacitación necesarias para o posterior desempeño da súa actividade profesional.
2. Destinatarios/as.
O curso vai dirixido a todas aquelas persoas que superasen as correspondentes probas de acceso ás prazas de vixilantes municipais dos diferentes concellos de Galicia.
3. Inscrición.
A inscrición é gratuíta.
A Academia reservará definitivamente a correspondente praza segundo a comunicación da inscrición por parte do concello de procedencia.
4. Prazas.
Sen límite.
O curso terá unha duración de 100 horas lectivas e desenvolverase de modo presencial.
O deseño deste curso inclúe os seguintes módulos:
– Módulo I: módulo xurídico.
– Módulo II: módulo técnico.
– Módulo III: módulo operativo.
– Módulo IV: módulo transversal.
A Academia poderá, ademais, homologar materias ou módulos do curso cando, logo de solicitude do/da alumno/a e a oportuna xustificación documental, se acredite ter desenvolvido ou superado esas materias ou módulos en cursos ou actividades de centros ou institucións dependentes das administracións públicas, ou de recoñecido prestixio e solvencia, noutro caso.
5. Datas.
A data de inicio do curso será o día 30 de maio de 2022, ás 9.30, horas e rematará o día 30 de xuño de 2022.
O curso desenvolverase, de luns a venres, na sede da Agasp.
6. Desenvolvemento do curso.
O alumnado da Academia Galega de Seguridade Pública, durante o seu período de permanencia nesta, rexerase polo seu regulamento de réxime interior, publicado pola Orde do 4 de febreiro de 2009, da Consellería de Presidencia, Administracións Públicas e Xustiza, no DOG número 30, do 12 de febreiro.
7. Certificado.
De acordo co previsto no artigo 19 do Decreto 243/2008, do 16 de outubro, de desenvolvemento da Lei 4/2007, unha vez superado o curso, a Agasp emitirá un informe en que certifique a dita superación, de modo que o concello de pertenza poida proceder ao nomeamento como persoal funcionario de carreira e á toma de posesión como vixilante municipal.
8. Modificacións.
A Academia Galega de Seguridade Pública poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 3 de maio de 2022
Santiago Villanueva Álvarez
Director xeral da Academia Galega de Seguridade Pública
