Para adaptar a organización dos centros docentes ás necesidades efectivas da poboación escolar e ás exixencias duns cadros de persoal que incidan na atención á diversidade coa introdución de profesorado especialista e a mellora da súa oferta educativa, deben revisarse as unidades e os postos de traballo docentes dos centros públicos dependentes desta consellería nos niveis de educación infantil, educación primaria e educación especial.
De conformidade co Decreto 119/2022, do 23 de xuño, que establece a estrutura orgánica da Consellería de Cultura, Educación, Formación Profesional e Universidades, e determina a competencia desta en materia de creación, supresión, transformación, clasificación, autorización e organización dos centros escolares, por proposta da Dirección Xeral de Centros e Recursos Humanos,
DISPOÑO:
Artigo 1. Modificación de unidades e postos de traballo docentes de centros educativos
Modificar as unidades e os postos de traballo docentes dos seguintes centros educativos:
– Escolas de educación infantil (EEI), colexios de educación primaria (CEP), colexios de educación infantil e primaria (CEIP) e centros públicos integrados (CPI) que se relacionan no anexo I desta orde.
– Centro de educación especial (CEE) que se detalla no anexo II.
– Colexios rurais agrupados (CRA) relacionados no anexo III.
Artigo 2 . Integración de centros
1. A EEI Nosa Señora do Carme, do Concello de Marín, código 36004538, intégrase no CEP de Sequelo-Marín do mesmo concello, código 36004496, do cal se modifica a denominación xenérica pola de CEIP.
2. A EEI Vagalume, do Concello de Vilagarcía, código 36015071, intégrase no CEIP Arealonga do mesmo concello, código 36012419.
Artigo 3. Supresión de centros
Suprimir os centros docentes que se relacionan no anexo IV .
Artigo 4. Situación do persoal docente
1. Aos centros que, como consecuencia das modificacións que se sinalan no artigo 1, incrementen o número de postos de traballo aplicaráselles o establecido na Orde do 30 de marzo de 1992, pola que se regula a mobilidade das funcionarias e dos funcionarios pertencentes ao corpo de mestras e mestres nos propios centros por incremento de postos de traballo.
Estes novos postos poderán ser solicitados polo profesorado con destino definitivo no centro que conte coa oportuna habilitación e accedese a este por concursos anteriores ao convocado no curso 1990/91, sempre que non acadase novo posto de traballo nel como consecuencia doutros procesos de adscrición ou de mobilidade no propio centro. Non obstante, poderaos solicitar o profesorado que, estando en posesión da correspondente habilitación, estea adscrito a postos de traballo que se vexan afectados por diminución nun número máximo igual á redución de postos.
2. Así mesmo, aplicarase o Decreto 140/2006, do 31 de agosto, polo que se determinan os criterios de perda do destino definitivo polas funcionarias e funcionarios docentes que prestan servizos nos centros educativos que imparten ensinanzas distintas das universitarias e o cómputo da antigüidade no centro en función das causas de acceso a el.
3. Os procesos de mobilidade, regulados na Orde do 30 de marzo de 1992, que se produzan como consecuencia desta orde desenvolveranse durante o mes de setembro de 2022 e terán efectos do primeiro día do mesmo mes.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 26 de xullo de 2022
Román Rodríguez González
Conselleiro de Cultura, Educación, Formación Profesional e Universidades