De conformidade co artigo 8 da Lei 19/2013, do 9 de setembro, de transparencia, acceso á información pública e bo goberno, dáse publicidade aos seguintes encargos ao medio propio:
1. Resolución do 28 de decembro de 2022, da Consellería do Medio Rural, pola que se encargan ao medio propio Empresa Pública de Servizos Agrarios Galegos, S.A. (Seaga) as actuacións para o control da erosión e mellora de infraestrutura nas zonas afectadas por grandes incendios forestais en 2022, cofinanciado con Feader no marco do Programa de desenvolvemento rural (PDR) de Galicia 2014-2020.
– Actividade: o obxecto do presente encargo consiste en actuacións específicas de consolidación como a cobertura do chan mediante mulching en 57,65 ha. Tamén se levará a cabo a mellora de infraestruturas forestais, reparando 192 km de pistas, incluídas as gabias e as obras de paso para mellorar a capacidade de evacuación das augas, así como a realización de 10,50 ha de faixas auxiliares de pista.
– Natureza e alcance da xestión encomendada: encomenda de xestión a medios propios ao ter a Empresa Pública de Servizos Agrarios Galegos, S.A. (Seaga), a consideración de medio propio instrumental e de servizo técnico da Administración xeral da Comunidade Autónoma de Galicia, en cumprimento do establecido nos artigos 10, 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
– Prazo de vixencia: desde a sinatura da acta de inicio ata o 31 de marzo de 2023.
– Financiamento: tramitouse con cargo aos orzamentos da Comunidade Autónoma de Galicia para o ano 2022; o orzamento de execución ascende á cantidade dun millón cento noventa e nove mil trescentos vinte e un euros con trinta e cinco céntimos (1.199.321,35 €), con cargo á aplicación orzamentaria 14.02.551B.601.1 (código proxecto 2016 00212).
Santiago de Compostela, 11 de xaneiro de 2023
José González Vázquez
Conselleiro do Medio Rural