Mediante as resolucións do 26, 27 e 28 de decembro de 2022, da Dirección Xeral de Recursos Humanos (Diario Oficial de Galicia núm. 4, do 5 de xaneiro de 2023), realizouse a convocatoria excepcional no proceso selectivo de estabilización, polo sistema de concurso de méritos, para o ingreso en diversas categorías de persoal estatutario.
Na base sétima das anteditas resolucións disponse que os tribunais cualificadores do concurso de méritos serán nomeados pola autoridade convocante; para este efecto, publicarase a oportuna resolución no Diario Oficial de Galicia.
O Decreto 81/2022, do 25 de maio, polo que se aproba a oferta de emprego público extraordinaria para a estabilización do emprego temporal do persoal do Sistema público de saúde de Galicia, en desenvolvemento da Lei 20/2021, do 28 de decembro, de medidas urxentes para a redución da temporalidade no emprego público, establece no seu artigo 4.5 que nos procesos selectivos que se convoquen mediante o sistema de concurso, en execución das disposicións adicionais quinta, sexta e oitava da Lei 20/2021, do 28 de decembro, de medidas urxentes para a redución da temporalidade no emprego público, e da disposición adicional deste decreto, poderá designarse un mesmo órgano de selección para varias categorías, respectando na súa composición os criterios sobre designación de tribunais establecidos pola lexislación de emprego público e demais normativa de selección.
A Lei 20/2021, do 28 de decembro, de medidas urxentes para a redución da temporalidade no emprego público (BOE núm. 312, do 29 de decembro), establece que os procesos selectivos para a cobertura de prazas incluídas nas ofertas de emprego público aprobadas no marco dos procesos de estabilización de emprego temporal deberán finalizar antes do 31 de decembro de 2024.
Co obxecto de dar cumprimento ao disposto nesta regulación e de conformidade coa base sétima das resolucións de convocatoria, esta dirección, como órgano convocante do proceso,
ACORDA:
Primeiro. En execución do artigo 4.5 do Decreto 81/2022, do 25 de maio, polo que se aproba a oferta de emprego público extraordinaria para a estabilización do emprego temporal do persoal do Sistema público de saúde de Galicia, designase un mesmo órgano de selección para varias categorías, atendendo á seguinte distribución:
Tribunal de área cirúrxica para a categoría de facultativo especialista de área nas especialidades de: Anxioloxía e Cirurxía Vascular, Cirurxía Cardiovascular, Cirurxía Pediátrica, Cirurxía Plástica, Estética e Reparadora, Cirurxía Xeral e Aparello Dixestivo e Neurocirurxía e Cirurxía Ortopédica e Traumatoloxía.
Tribunal de área clínica I para as categorías de: médico/a de hospitalización a domicilio, médico/a de urxencias hospitalarias e facultativo especialista de área nas especialidades de: Medicina do Traballo, Medicina Preventiva e Saúde Pública, Medicina Física e Rehabilitación, Farmacoloxía Clínica, Psicoloxía Clínica e Psiquiatría.
Tribunal de área clínica II para a categoría facultativo especialista de área nas especialidades de: Alergoloxía, Aparello Dixestivo, Cardioloxía, Hematoloxía e Hemoterapia, Endocrinoloxía e Nutrición, Medicina Intensiva, Medicina Interna, Nefroloxía, Neuroloxía, Oncoloxía Médica, Oncoloxía Radioterápica, Pediatría e as súas áreas específicas, Pneumoloxía, Reumatoloxía e Xeriatría.
Tribunal de área diagnóstica para a categoría de facultativo especialista de área nas especialidades de: Análises Clínicas, Anatomía Patolóxica, Farmacia Hospitalaria, Inmunoloxía, Medicina Nuclear, Microbioloxía e Parasitoloxía, Neurofisioloxía Clínica, Radiodiagnóstico e Radiofísica Hospitalaria.
Tribunal de área médico-cirúrxica para a categoría de facultativo especialista de área nas especialidades de: Anestesioloxía e Reanimación, Dermatoloxía Médico-Cirúrxica e Venereoloxía, Obstetricia e Xinecoloxía, Oftalmoloxía, Otorrinolaringoloxía e Uroloxía.
Tribunal de categorías do ámbito de atención primaria: médico/a de familia de atención primaria, técnico/a de saúde de atención primaria, farmacéutico/a de atención primaria e as categorías de médico/a coordinador/a 061 e médico/a de admisión e documentación clínica.
Tribunal de categorías de diplomados sanitarios: enfermeiro/a especialista en enfermaría do traballo, enfermeiro/a especialista en obstetricia-xinecoloxía (matrón/a), enfermeiro/a especialista en saúde mental, fisioterapeuta, logopeda e terapeuta ocupacional.
Tribunal técnicos superiores de formación profesional, categorías de: técnico/a superior en anatomía patolóxica e citoloxía, en dietética, en hixiene bucodental, en imaxe para o diagnóstico, en laboratorio de diagnóstico clínico e en radioterapia.
Tribunal de técnicos de formación profesional de grao medio categorías de: técnico/a en coidados auxiliares de enfermaría e técnico/a en farmacia.
Tribunal de categorías de persoal de xestión e servizos/oficios categorías de: albanel, calefactor/a, carpinteiro/a, cociñeiro/a, condutor/a, electricista, fontaneiro/a, lavandeiro/a, limpador/a, mecánico/a, pasador/a de ferro, peón, perruqueiro/a, pinche e pintor/a.
Tribunal de categorías de xestión e servizos nas categorías de: celador/a, grupo administrativo da función administrativa, grupo auxiliar da función administrativa, grupo de xestión da función administrativa, grupo técnico da función administrativa, persoal de servizos xerais, persoal técnico de grao medio en prevención de riscos laborais, persoal técnico superior, persoal técnico superior en prevención de riscos laborais, técnico/a especialista de sistemas e tecnoloxías da información, técnico/a grao medio, técnico/a superior de sistemas e tecnoloxías da información, técnico/a xestión de sistemas e tecnoloxías da información e traballador/a social.
Segundo. De conformidade co exposto no punto primeiro desta resolución, noméanse os membros do tribunal, titulares e suplentes, que xulgarán o proceso selectivo de estabilización, polo sistema de concurso de méritos, para o ingreso en diversas categorías, convocados polas resolucións da Dirección Xeral de Recursos Humanos do Servizo Galego de Saúde de 26, 27 e 28 de decembro de 2022 e que se relacionan no anexo desta resolución.
Terceiro. Declarar de aplicación a este proceso as normas de funcionamento e actuación dos tribunais e do persoal colaborador, negociadas e aprobadas na Mesa Sectorial de Sanidade, á disposición das persoas interesadas na páxina web do Servizo Galego de Saúde (www.sergas.es) en canto sexan compatibles coa natureza do proceso, e sen prexuízo das peculiaridades que resulten da aplicación da Lei 20/2021, do 28 de decembro, de medidas urxentes para a redución da temporalidade no emprego público.
Cuarto. Esta resolución producirá os seus efectos desde o mesmo día da súa sinatura.
Santiago de Compostela, 11 de maio de 2023
Ana María Comesaña Álvarez
Directora xeral de Recursos Humanos
