DOG 202 do 24/10/2023 - RESOLUCIÓN do 19 de outubro de 2023, do tribunal encargado de cualificar o proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso no corpo facultativo de grao medio de Administración especial da Administración xeral da Comunidade Autónoma de Galicia, subgrupo A2, escala de técnicos facultativos, especialidade educador/a infantil, convocado pola Resolución do 22 de decembro de 2022 (Diario Oficial de Galicia número 245, do 27 de decembro), pola que se dá publicidade de diversos acordos.

IV. Oposicións e concursos

Consellería de Facenda e Administración Pública

RESOLUCIÓN do 19 de outubro de 2023, do tribunal encargado de cualificar o proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso no corpo facultativo de grao medio de Administración especial da Administración xeral da Comunidade Autónoma de Galicia, subgrupo A2, escala de técnicos facultativos, especialidade educador/a infantil, convocado pola Resolución do 22 de decembro de 2022 (Diario Oficial de Galicia número 245, do 27 de decembro), pola que se dá publicidade de diversos acordos.

O tribunal nomeado pola Resolución do 17 de xullo de 2022 (DOG núm. 140, do 24 de xullo) para cualificar este proceso selectivo

ACORDOU:

Primeiro. Ao abeiro do previsto na base III.1.2.7 da convocatoria, en sesión que tivo lugar o 16 de outubro de 2023, logo de revisar as reclamacións presentadas, anular a pregunta 125. O seu lugar pasa a ser ocupado pola pregunta número 148. As restantes reclamacións desestímanse na súa totalidade.

Segundo. De conformidade co disposto na base II.1.1.1 da convocatoria, o primeiro exercicio da fase de oposición cualificarase de 0 a 30 puntos e para superalo será necesario obter un mínimo de quince (15) puntos.

Para estes efectos, de acordo co disposto na citada base, con corrección de erros publicada o 31 de marzo de 2023 (DOG núm. 64, do 31 de marzo), mediante a Resolución deste tribunal do 18 de setembro de 2023 deuse publicidade dos parámetros para a cualificación do primeiro exercicio, que establecen que superarán o exercicio as persoas aspirantes presentadas que acaden as mellores puntuacións ata completar un número máximo de persoas aspirantes determinado polo resultado de multiplicar por catro o número de prazas convocadas, sempre que logren, en cada unha das partes do exercicio, o mínimo do 50 % das respostas correctas (despois de feitos os descontos correspondentes) ou, subsidiariamente, un mínimo do 40 % das respostas correctas, en cada unha das partes, despois de feitas as deducións por respostas incorrectas, que descontarán un cuarto dunha pregunta correcta; as preguntas non contestadas non penalizan nin reciben puntuación.

O criterio expresado de obtención dunha porcentaxe mínima de acertos en cada unha das dúas partes está referido á primeira parte de contido teórico (30 preguntas) e á segunda parte de contido teórico e práctico (110 preguntas), sen que sexa posible compensar os acertos que excedan nunha parte cos que falten na outra.

Todas as persoas aspirantes con idéntica puntuación a aquela persoa aprobada que marque o corte considéranse igualmente aprobadas, aínda que se superase o número de aspirantes antes indicado.

Asignaráselles a valoración de 15 puntos ás persoas aspirantes que obteñan unha nota equivalente á nota de corte fixada. O resto das persoas declaradas aptas terá unha cualificación distribuída entre os 15 e os 30 puntos, proporcional ao número de respostas correctas. As persoas aspirantes que non superen o exercicio serán declaradas non aptas.

Terceiro. Realizada a corrección dos exames na sesión do 17 de outubro de 2023 de acordo coas normas e criterios anteriores, e feitas as deducións segundo o establecido na base II.1.1.1 da convocatoria, acadou a puntuación mínima de 15 puntos un total de 17 persoas aspirantes, e fixouse en 56 o número de respostas correctas para lograr a dita puntuación (12 da primeira parte e 44 da segunda parte do exercicio). Para obter o número de persoas aptas foi preciso aplicar o criterio subsidiario do mínimo do 40 % de respostas correctas netas en cada unha das partes, común e específica. As persoas que non acadaron a porcentaxe mínima nalgunha das partes non son cualificadas por non ser posible asignar unha puntuación homologable á do resto das persoas aspirantes.

Cuarto. Publicar no portal web corporativo funcionpublica.xunta.gal as puntuacións obtidas polas persoas aspirantes que superaron o primeiro exercicio do proceso selectivo, así como a relación daquelas que non acadaron os mínimos establecidos na base III.1.1.1. da convocatoria.

Quinto. De acordo co disposto na base III.1.2.8 da convocatoria, no prazo de dez (10) días hábiles, contados desde o día seguinte ao de publicación desta resolución no Diario Oficial de Galicia, as persoas aspirantes poderán formular as alegacións que consideren oportunas ás puntuacións, que se presentarán a través da aplicación Fides (https://fides.xunta.gal).

Sexto. De acordo co disposto na base V.13 da orde de convocatoria, contra este acordo poderase interpor recurso de alzada ante o conselleiro de Facenda e Administración Pública, nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 19 de outubro de 2023

Manuel Lage Cobas
Presidente do tribunal