En sesión que tivo lugar o 31 de outubro de 2023, o tribunal nomeado pola Resolución do 17 de xullo de 2023 (DOG núm. 140, do 24 de xullo) para cualificar o proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso no corpo facultativo de grao medio de Administración especial da Administración xeral da Comunidade Autónoma de Galicia, subgrupo A2, escala de técnicos facultativos, especialidade educador/a infantil, convocado pola Resolución do 22 de decembro de 2022 (DOG núm. 245, do 27 de decembro), e modificada polas resolucións do 20 de xaneiro de 2023 (DOG núm. 15, do 23 de xaneiro) e do 6 de febreiro de 2023 (DOG núm. 26, do 7 de febreiro), de conformidade co disposto na base III.1.2.6 da convocatoria, acordou que o segundo exercicio da oposición terá lugar o día 20 de novembro de 2023, en chamamento único que se iniciará ás 15.30 horas, na aula 2 da Escola Galega de Administración Pública en Santiago de Compostela.

As persoas aspirantes deberán presentarse provistas de bolígrafo de tinta azul e de NIF, NIE, pasaporte, permiso de condución ou outro documento fidedigno que, ao xuízo do tribunal, acredite a súa identidade.

Non se permitirá o acceso ás aulas en que se realice o exercicio con teléfonos móbiles, axendas electrónicas, reloxos intelixentes ou calquera outro material ou instrumento de que se poida valer a persoa aspirante para auxiliarse na realización do exercicio. Non se habilitará ningún servizo de recollida de móbiles.

Santiago de Compostela, 31 de outubro de 2023

Manuel Lage Cobas
Presidente do tribunal