Examinada a solicitude de deslindamento formulada polos representantes do monte veciñal en man común (MVMC) Os Montes e Campos, pertencente á Comunidade de Montes Veciñais en Man Común (CMVMC) de Pena de Outeiro e Santiago da Medorra, no termo de Montederramo, e mais MVMC Matanza e Serra de Pedrouzos, pertencente á CMVMC de Pedrouzos, no concello de Castro Caldelas, resultan os seguintes

Feitos:

Primeiro. O 29.9.2022 a CMVMC de Pena de Outeiro e Santiago da Medorra presentou un escrito (Rexel 2022/2391870) en que solicitan a aprobación dun deslindamento coa CMVMC de Pedrouzos.

Coa solicitude achegou a seguinte documentación:

– Acta de deslindamento.

– Certificacións de aprobación das respectivas asembleas xerais.

– Memoria e planos.

– Acta de conciliación levantada no Xulgado de Paz de Castro Caldelas.

Segundo. O informe do Servizo de Montes da Xefatura Territorial de Ourense do 12 de abril de 2023 fai constar que a documentación achegada corresponde ao deslindamento do perímetro estremeiro entre o MVMC Os Montes e Campos pertencente á CMVMC de Pena de Outeiro e Santiago da Medorra, no termo de Montederramo, e mais o MVMC Matanza e Serra de Pedrouzos pertencente á CMVMC da parroquia de Pedrouzos, no termo de Castro Caldelas, desde o vértice 1a (o situado máis ao N) ata o vértice aux18 (o situado máis ao S).

Logo de analizar os vértices e a súa localización, e tal e como se recoñece na propia acta da avinza, conclúese que o deslindamento propiamente comeza no vértice 1, tendo o vértice 1a a consideración de punto auxiliar que permite manter a coherencia xeométrica e pechar os esbozos afectados contra o perímetro do MVMC Covato pertencente á CMVMC de Bustelos; monte este último que non participa da avinza pero que conflúe teoricamente cos outros dous na posición do vértice 1.

Por outra banda, segundo se indica nas actas da avinza, o tramo entre os puntos 4 e aux18 deslindaría o MVMC Matanza e Serra de Pedrouzos de predios particulares. Porén, non se pode operar directamente o tal deslindamento na medida en que se trata dunha clase de procedemento distinto; en concreto, trataríase do procedemento de deslindamento de montes veciñais con propiedades particulares, regulado no artigo 54 da Lei 7/2012. En consecuencia, o tramo comprendido entre os vértices 4 e aux18 deberá deslindar inexorablemente ambos os montes e, no caso de resultar aprobada a avinza polo Xurado Provincial, o dito tramo debería ser obxecto, a posteriori, do procedemento do artigo 54 se os veciños considerasen que os terreos situados ao O dese tramo son de natureza non comunal.

Por outro lado, o tramo de lindes entre os vértices 2 e 3 vén definido nas actas como el curso de agua sen nome, afluente do Regato de Alenza, pero non se especifica referencia ningunha da traza do dito regato. Xa que logo, e para evitar calquera clase de equívoco, cómpre facer constar as referencias cartográficas que determinan este tramo de río; así, segundo a planimetría e mais os arquivos xeográficos achegados, defínese o tramo como a liña que comeza no vértice 2, segue ata o punto de coordenadas X: 627.341,8-Y: 4.687.318,9; deste segue ata o punto X: 627.341,8-Y: 4.687.298,4; e, a partir deste, segue ata o vértice 3 a través da aresta común das R.C. 32050A11500107 e 32024A06300264.

O citado informe considera que a solicitude se axusta ao establecido no artigo 53 da Lei 7/2012, de 28 de xuño, de montes de Galicia, polo que propón ao Xurado Provincial a súa aprobación entre os vértices 1 e aux18 indicados na acta de conciliación, aclarando que a liña, entre os vértices 2 e 3, discorre polos puntos intermedios X: 627.341,8-Y: 4.687.318,9; X: 627.341,8-Y: 4.687.298,4; e pola aresta común das R.C. 32050A11500107 e 32024A06300264.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, de 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se vai seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 12 de abril de 2023, o Xurado Provincial de Montes Veciñais en Man Común acordou por unanimidade o día 23 de outubro de 2023:

Aprobar o acto de conciliación acadado polas xuntas reitoras dos MVMC Os Montes e Campos pertencente á CMVMC de Pena de Outeiro e Santiago da Medorra, no termo de Montederramo, e mailo MVMC Matanza e Serra de Pedrouzos, pertencente á CMVMC da parroquia de Pedrouzos, no termo de Castro Caldelas.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 20 de novembro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense