A Lei 20/2021, do 28 de decembro, de medidas urxentes para a redución da temporalidade no emprego público (BOE núm. 312, do 29 de decembro), recolle no seu artigo 2 que a resolución dos procesos de estabilización do emprego temporal convocados ao abeiro de dita lei debe rematar antes do 31 de decembro de 2024.

Para os efectos de cumprir con esta obriga legal, cómpre iniciar os procesos de acreditación de méritos correspondentes á fase de concurso dos diferentes procesos selectivos convocados, para o que se fai necesario regular o contido, uso e acceso ao expediente electrónico do persoal empregado público da Administración xeral da Comunidade Autónoma e das súas entidades públicas instrumentais.

O expediente persoal electrónico permite instaurar un procedemento aberto á súa utilización polas persoas empregadas públicas e polos cidadáns e cidadás que teñan interese no acceso ao emprego público, mediante unha ferramenta que integra todos os seus datos curriculares nunha contorna electrónica interoperativa e multidisciplinar, que resulta ao mesmo tempo flexible, práctica, áxil e modificable e que evita a necesidade de repetir a entrega de documentación para todos e cada un dos procesos de selección, provisión e desenvolvemento profesional.

No expediente persoal electrónico queda integrada, nun formato electrónico e nun soporte único a información do persoal empregado público, o que facilita a súa xestión e a relación entre os profesionais e a Administración, permitindo tamén que o persoal dispoña dun instrumento que o habilite para a creación e actualización do seu propio currículo.

De conformidade co exposto, resolvo ditar e publicar as seguintes instrucións:

Primeira. Obxecto

1. Estas instrucións teñen por obxecto regular o contido, uso, acceso e efectos dos datos almacenados de forma electrónica no expediente persoal electrónico.

2. Para tal efecto, a Canle de emprego público de Galicia (FIDES) constituirá a plataforma de acceso ao expediente persoal electrónico.

Segunda. Ámbito de aplicación

Estas instrucións serán de aplicación ao persoal empregado público que teña a condición de persoal funcionario e laboral da Administración xeral da Comunidade Autónoma de Galicia e das entidades públicas instrumentais do sector público autonómico de Galicia enunciadas na letra a) do artigo 45 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, así como ás persoas que no pasado posuísen a citada condición ou a aquelas que no futuro vaian ter a dita condición, no decurso da súa traxectoria profesional.

Terceira. Definicións

Establécense as seguintes definicións:

a) Persoa interesada: persoal titular dos datos que se recollen no expediente persoal electrónico.

b) Persoal usuario: persoal encargado da xestión de recursos humanos da consellería competente en materia de función pública e das respectivas consellerías e entidades instrumentais cuxas funcións, por razón das súas competencias, garden relación co expediente persoal electrónico, ou outro persoal que por razón das súas funcións precise acceder á información presente no expediente electrónico persoal.

c) Persoal validador: persoal encargado da comprobación e posterior actualización no expediente persoal electrónico dos datos introducidos polas persoas interesadas, asegurando a validez da documentación acreditativa correspondente.

d) Persoal catalogador: persoal responsable da clasificación da información do expediente profesional, que establece catálogos e criterios comúns de clasificación e organización da información dos diferentes atributos definidos en cada epígrafe do expediente persoal electrónico.

e) Solicitude de actualización ou modificación do expediente: creación dun novo rexistro de datos ou modificación dun rexistro xa existente no expediente da persoa interesada.

Cuarta. Concepto de expediente persoal electrónico

1. O expediente persoal electrónico (en diante, expediente) é o instrumento onde se integran todos os datos e documentos persoais e profesionais do persoal incluído no ámbito de aplicación destas instrucións, nun soporte electrónico interoperable e multidisciplinar, que posibilita a xestión integral do seu currículo nun contorno propio, flexible, áxil e actualizable ao longo do tempo.

2. Os datos do expediente empregaranse na tramitación dos procesos de selección de persoal, provisión de postos de traballo, procesos de desenvolvemento profesional, así como aqueloutros necesarios para a xestión do persoal. Así mesmo, poderanse empregar en todos os procedementos en que interveña a persoa interesada e que a consellería competente en materia de función pública e as consellerías e entidades, respecto ao persoal dependente destas, consideren oportunos, independentemente da súa finalidade inicial, sempre que sexa necesario para o cumprimento das obrigas e o exercicio dos dereitos no ámbito do mantemento, cumprimento e desenvolvemento da relación que vincula o persoal con esta Administración.

Quinta. Contido do expediente persoal electrónico

1. O expediente incluirá datos persoais e identificativos, así como académicos ou profesionais, e calquera outro dato que se considere necesario para a xestión dos procedementos de persoal. Os datos de contacto que figuren no expediente usaranse de xeito preferente para as comunicacións e notificacións que teñan que realizar os órganos competentes, salvo que a normativa específica na materia estableza outras canles ou criterios.

2. No expediente incorporarase a información existente nos sistemas electrónicos de xestión de persoal, respecto do persoal empregado público que presta ou prestou servizos na Administración xeral da Comunidade Autónoma de Galicia e nas entidades públicas instrumentais do sector público autonómico de Galicia enunciadas na letra a) do artigo 45 da Lei 16/2010, do 17 de decembro, concernente aos seus datos persoais e curriculares. Así mesmo, incorporarase toda aquela información que a persoa interesada poida achegar para a actualización do seu expediente e tamén, de xeito paulatino, o acceso a outra información a medida que se vaia facendo efectiva a interoperabilidade semántica e técnica desta co expediente, segundo se establece na instrución décimo.primeira.

3. A información xerada nas relacións profesionais públicas das persoas empregadas públicas incluídas no ámbito de aplicación destas instrucións será incorporada ao expediente electrónico pola consellería competente en materia de función pública e polas consellerías e entidades respecto ao persoal dependente destas, que serán responsables de que a información achegada reflicta con exactitude a información en cada momento, de acordo cos estados recollidos no anexo II.

4. De acordo co establecido no artigo 20 da Lei 4/2019, do 17 de xullo, de administración dixital de Galicia, habilitaranse mecanismos de interoperabilidade do expediente coa Carpeta cidadá da Xunta de Galicia.

Sexta. Forma de acceso ao expediente persoal electrónico

1. O acceso ao expediente realizarase mediante a Canle do emprego público de Galicia (FIDES), que proporcionará un acceso seguro ao expediente, accesible coas preceptivas medidas de seguridade.

2. O acceso realizarase a través do enderezo https://fides.xunta.gal. Este enderezo poderá modificarse por resolución da dirección xeral competente en materia de función pública.

3. O persoal incluído no ámbito de aplicación destas instrucións accederá ao seu expediente persoal para a súa consulta, modificación e actualización.

4. A información recollida no expediente será accesible para:

a) A persoa interesada.

b) O persoal usuario.

c) O persoal validador.

d) O persoal catalogador.

5. O persoal que, por razón das súas competencias ou funcións, precise utilizar o expediente como ferramenta de traballo figurará como persoa usuaria debidamente rexistrada e autorizada para consultar ou tratar calquera información recollida no sistema que se determine para cada procedemento.

6. O sistema identificará individualizadamente o persoal que acceda á información contida no expediente electrónico.

7. Así mesmo, estableceranse medidas de control e auditorías en prol de garantir e preservar o deber de confidencialidade e sixilo das persoas usuarias do sistema.

8. O persoal usuario, validador e catalogador deberá gardar a debida confidencialidade e sixilo, nos termos establecidos na lexislación vixente, sobre a información a que teñan acceso na dita condición.

Sétima. Clasificación e estados da información recollida no expediente persoal electrónico

1. A información contida no expediente clasifícase, segundo a súa natureza, nos seguintes puntos, recollidos no anexo I:

a) Datos persoais.

b) Formación.

c) Experiencia profesional.

d) Actividade docente.

e) Idiomas.

f) Actividade investigadora.

g) Carreira administrativa ou complemento de desempeño.

h) Compatibilidades.

i) Representación do persoal.

j) Outros méritos.

En función do desenvolvemento do proceso de implantación do expediente, poderá incorporarse ao sistema información de natureza diferente á sinalada nos puntos anteriores.

2. Pola súa vez, a información relativa ao currículo e méritos do persoal visualizarase no sistema nalgún dos estados seguintes, de acordo co anexo II:

a) Pendente de presentar ou tramitar.

b) En trámite.

c) Validada.

d) Duplicada.

e) Acreditación documental incompleta.

f) Descartada.

g) Non catalogada.

Co avance e desenvolvemento do proceso de implantación do expediente poderán configurarse máis estados da información, que se irán incorporando ao sistema na medida en que sexa preciso e co contido que se determine.

Oitava. Solicitudes de actualización e/ou modificación do expediente pola persoa interesada

1. As persoas interesadas poderán solicitar a actualización ou modificación dos datos que consten no seu expediente. As persoas interesadas terán que iniciar este proceso electronicamente a través da Canle do emprego público de Galicia (FIDES) para actualizar a información nas epígrafes correspondentes a cada mérito e xerar o documento de solicitude a través do sistema.

2. Xunto coa solicitude de actualización ou modificación do expediente, a persoa interesada deberá achegar a documentación acreditativa dos méritos que figuren pendentes de validación ou tramitación nos termos que se indican no anexo III, salvo que o documento o xerase unha Administración pública e estea dispoñible para a súa consulta a través das plataformas de intermediación de datos ou outros sistemas electrónicos habilitados para o efecto.

3. A presentación da solicitude de actualización de méritos e a acreditación documental destes, cando se dispoña de copias electrónicas auténticas, farase obrigatoriamente por medios electrónicos a través da Canle do emprego público de Galicia (FIDES).

4. A presentación da solicitude de actualización de méritos e a acreditación documental dos méritos, cando non se dispoña de copias electrónicas auténticas, farase de maneira presencial acompañada dos documentos acreditativos, en calquera das formas previstas no artigo 16.4 da Lei 39/2015, do 1 de outubro.

5. A data de presentación da solicitude de actualización ou modificación do expediente para cada un dos datos determinará a consideración de méritos ou requisitos dos procesos de selección de persoal, provisión de postos de traballo, procesos de desenvolvemento profesional, así como aqueloutros necesarios para a xestión do persoal.

6. Non se permiten outros procedementos distintos aos descritos nesta instrución para a actualización ou modificación dos datos que consten no expediente. Non se terán por presentadas as solicitudes de actualización do expediente que non se iniciasen electronicamente a través da Canle do emprego público de Galicia (FIDES) ou que non se presentasen segundo o establecido nesta instrución.

7. Para a presentación electrónica das solicitudes empregarase calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e contrasinal e Chave365 (https://sede.xunta.gal/chave365).

Novena. Forma de acreditación da experiencia profesional, formación ou outros méritos

1. A acreditación da experiencia profesional, formación ou outros méritos farase de acordo co recollido no anexo III das presentes instrucións.

2. As certificacións ou documentos acreditativos que estean redactados nun idioma distinto a calquera dos oficiais da Comunidade Autónoma de Galicia deberán achegarse coa súa tradución para o castelán ou galego, que deberá efectuar:

a) Un tradutor xurado, debidamente autorizado ou inscrito en España.

b) Calquera representación diplomática ou consular do Estado español no estranxeiro.

c) A representación diplomática ou consular en España do país de que é cidadá a persoa interesada.

Décima. Tramitación das actualizacións dos méritos

1. No caso de que os documentos acreditativos presentados non garden relación directa co mérito que se solicita incluír no expediente, o mérito considerarase como «descartado» e a persoa interesada deberá volver presentar a solicitude de actualización do expediente relativa a ese mérito.

2. No caso de que os documentos acreditativos presentados para acreditar un determinado mérito sexan insuficientes, o mérito manterase no estado «acreditación documental incompleta» mentres a persoa interesada non presente a totalidade da documentación necesaria para unha acreditación veraz e completa do mérito rexistrado.

En todo caso, considerarase como acreditación documental incompleta cando se presenten presencialmente documentos que dispoñan de códigos de verificación electrónica que permitan o acceso e descarga dos documentos electrónicos orixinais, así como os documentos que carezan dos contidos mínimos esenciais exixidos para a súa acreditación segundo o anexo III.

3. Naqueles casos en que a actualización dos méritos teña relevancia na tramitación nalgún dos procesos descritos na instrución cuarta en que participe a persoa interesada, informarase dos prazos de actualización aplicables de conformidade co disposto no correspondente proceso.

Décimo primeira. Integración no expediente de información dispoñible en calquera Administración pública

Para dar cumprimento ao dereito das persoas interesadas de non achegar información que fose xerada ou que xa conste en poder das administracións públicas poderase habilitar a interoperabilidade entre o expediente electrónico a que se fai referencia nestas instrucións e a información que fose xerada ou conste en calquera Administración pública e que pola súa natureza estea relacionada co expediente electrónico (cursos realizados ou impartidos, servizos prestados,...).

Décimo segunda. Priorización das solicitudes de actualización do expediente persoal electrónico

Mediante resolución da dirección xeral competente en materia de función pública poderá modificarse a orde de tramitación das solicitudes de actualización do expediente electrónico persoal, coa finalidade de axilizar a resolución de procesos selectivos, provisión de postos ou carreira profesional, entre outros.

Décimo terceira. Protección de datos persoais

1. En relación coa política de protección de datos persoais, a recollida da información que consta no expediente realízase con base na normativa vixente sobre a materia, a Lei orgánica 3/2018, do 5 de decembro, de protección de datos persoais e garantía dos dereitos dixitais (BOE núm. 294, do 6 de decembro), e o Regulamento (UE) 2016/679 do Parlamento Europeo e do Consello, do 27 de abril, relativo á protección das persoas físicas no que respecta ao tratamento de datos persoais e á libre circulación deses datos e polo que se derroga a Directiva 95/46/CE (Regulamento xeral de protección de datos).

2. As persoas interesadas son titulares dos dereitos recollidos nos artigos 15 a 22 da Lei orgánica 3/2018, do 5 de decembro, entre os que se encontran os dereitos de acceso, rectificación, supresión, limitación do tratamento, portabilidade e oposición.

3. A condición de responsable do tratamento correspóndelle á consellería con competencias en materia de función pública.

4. Consonte o recollido na disposición adicional décimo segunda da Lei orgánica 3/2018, do 5 de decembro, o tratamento dos rexistros de persoal do sector público enténdese realizado no exercicio de poderes públicos conferidos ao seu responsable, de acordo co previsto no artigo 6.1.e) do Regulamento (UE) 2016/679.

5. Co fin de previr riscos para vítimas de violencia de xénero, protexerase a súa intimidade, en especial, os seus datos persoais, os dos seus descendentes e os de calquera persoa que estea baixo a súa garda ou custodia.

Disposición derradeira. Entrada en vigor

Estas instrucións serán de aplicación o día da súa publicación no Diario Oficial de Galicia.

Santiago de Compostela, 5 de decembro de 2023

José María Barreiro Díaz
Director xeral da Función Pública

ANEXO I

Epígrafes da información clasificada no expediente:
a) Datos persoais	Información de identificación e contacto da persoa interesada. Os datos de identificación (nome, apelidos, NIF, data de nacemento e número de afiliación á Seguridade Social) da persoa interesada non resultarán modificables, agás nos supostos establecidos na lexislación vixente. A información restante poderá ser editada e actualizada polos usuarios en calquera momento.
b) Formación	Información relativa a titulacións académicas oficiais e formación continuada da persoa interesada.
c) Experiencia profesional	Servizos prestados como persoal empregado público na Administración xeral da Xunta ou entidades públicas instrumentais do sector público autonómico de Galicia (artigo 45.a) da Lofaxga) ou en calquera outra Administración pública.
d) Actividade docente	Docencia impartida pola persoa interesada, relativa á formación continuada, formación especializada e universitaria e non universitaria.
e) Idiomas	Información relativa ao grao de coñecemento da lingua galega referida aos certificados oficiais acreditativos dos niveis de coñecemento da lingua galega (Celga) ou cursos de linguaxe administrativa e xurídica galegas, así como doutros idiomas segundo os niveis do Marco común europeo de referencia para as linguas, para os que se terán en conta as titulacións susceptibles de equivalencia cos niveis MERC recollidos na normativa aplicable., así como doutros cursos de idiomas.
f) Actividade investigadora	Información relativa á participación da persoa interesada en proxectos de investigación, publicacións, premios e outras actividades relacionadas coa Administración pública, a súa escala ou, se for o caso, especialidade, tales como patentes, estancias formativas ou a dirección de teses de doutoramento, bolsas de investigación convocadas e concedidas polas consellería e entes.
g) Carreira administrativa e complemento de desempeño	Información relativa ao grao recoñecido de carreira administrativa ou complemento de desempeño da persoa interesada.
h) Compatibilidades	Información relativa ás compatibilidades recoñecidas á persoa interesada para actividade pública ou para actividade privada.
i) Representación do persoal	Información relativa á condición de representante do persoal da persoa interesada.
j) Outros méritos	Información relativa a aspectos curriculares non definidos nas epígrafes precedentes.

ANEXO II

Estados da información rexistrada no expediente:
a) Pendente de presentar ou tramitar	P-Pendente de presentar ou tramitar. Información introducida no expediente electrónico pola persoa interesada ou pola persoa usuaria que está pendente de acreditar documentalmente mediante a presentación da solicitude de actualización do mérito xunto coa documentación acreditativa, ou que foi acreditada nun rexistro presencial e está pendente de tramitar.
b) En trámite	ET-En trámite. Información incluída no expediente electrónico pola persoa interesada ou pola persoa usuaria, que está pendente de tramitar.
c) Validada	V-Validada. Indica que a información rexistrada no expediente electrónico foi sometida ao proceso de validación, co resultado de comprobada e correcta, ou ben que procede dos propios sistemas de información do organismo. Este estado implica que a información rexistrada figura acreditada documentalmente e, polo tanto, existe unha coincidencia entre a información electrónica e a documental, logo da súa verificación polo persoal validador.
d) Duplicada	DPL-Duplicada. Indica que a información ou mérito rexistrado coincide con outro elemento idéntico xa incluído previamente no expediente electrónico, calquera que sexa o estado no cal se encontre este último. A información que figure neste estado non será valorada en ningún dos procesos formalizados pola Administración.
e) Acreditación documental incompleta	DI-Acreditación documental incompleta. Información rexistrada no expediente profesional que non pode ser validada, por non resultar suficiente a documentación achegada pola persoa interesada para acreditar a totalidade dos elementos do mérito rexistrado, o que se advertirá coa especificación da causa no correspondente campo do expediente. A información manterase neste estado mentres a persoa interesada non presente a totalidade da documentación necesaria para unha acreditación veraz e completa do mérito rexistrado no expediente electrónico, e aquela sexa revisada polo persoal validador. A información que figure neste estado non será valorada en ningún dos procesos formalizados pola Administración.
f) Descartada	DE-Descartada. Información rexistrada no expediente electrónico que non pode ser validada ao non se corresponder, nun ou varios elementos, cos datos que constan na documentación achegada pola persoa interesada para a súa acreditación e validación. A información que se encontre neste estado non resultará computable para ningún dos procesos formalizados pola Administración autonómica.
g) Non catalogada	Información rexistrada no expediente electrónico que, despois de ser sometida ao correspondente proceso de catalogación, non é susceptible de ser clasificada dentro do expediente por non constar como un atributo definido dentro do currículo profesional. A información que figure neste estado non será avaliable en ningún dos procesos formalizados pola Administración.

ANEXO III

Forma de acreditación dos méritos:
a) Formación académica	Acreditarase, segundo o suposto, mediante orixinal ou copia auténtica do título expedido polo órgano con competencias na materia, que deixe constancia de cada un dos méritos invocados pola persoa interesada e data en que foron causados. No relativo aos cursos de doutoramento, a certificación que se achegue deberá deixar constancia expresa de que a persoa aspirante realizou todos os cursos de doutoramento e indicar o programa e os créditos obtidos. No suposto de titulacións obtidas no estranxeiro, achegarase, xunto coa copia auténtica do título, tradución xurada deste ou equivalente e credencial de recoñecemento ou homologación da titulación expedida polo órgano con competencias na materia.
b) Formación continuada	Acreditarase mediante orixinal ou copia auténtica do certificado de asistencia ao curso, no cal deberán constar o organismo ou entidade que convocou e impartiu a dita actividade formativa, as datas de realización, o contido do curso e o número de horas e/ou créditos asignados.
c) Experiencia profesional	A experiencia profesional acreditarase mediante certificación orixinal ou copia auténtica emitida polas persoas titulares das unidades que teñan atribuídas as funcións de xestión de persoal no órgano correspondente aos servizos prestados, na cal deberá constar a seguinte información: grupo e categoría ou corpo escala e especialidade, réxime xurídico de vinculación (laboral, funcionario, estatutario), tipo de vínculo (fixo, temporal), carácter da cobertura (adscrición provisional, adscrición temporal, comisión de servizos, ocupación definitiva, ocupación temporal, superior categoría, ao dispor), nivel do posto, de ser o caso, data de inicio e fin de cada unha das vinculacións, porcentaxe de xornada no caso de ser inferior á xornada completa.
d)Situacións administrativas distintas de servizo activo	Acreditarase mediante orixinal ou copia auténtica emitida polas persoas titulares das unidades que teñan atribuídas as funcións de xestión de persoal, na cal deberá constar: modalidade de situación administrativa, data de inicio e fin, e de ser o caso, na alínea c) de experiencia profesional deberá figurar a información do posto reservado.
e) Actividade docente	Acreditarase mediante orixinal ou copia auténtica da certificación do organismo ou entidade convocante, na cal deberá constar o contido da actividade formativa, así como o número de horas de docencia impartidas.
f) Idiomas	Acreditarase mediante orixinal ou copia auténtica, en que deberán constar o nivel certificado e a data de emisión. Os cursos de idiomas acreditaranse do xeito indicado na alínea b) Formación continuada.
g) Actividade investigadora	Información relativa á participación da persoa interesada en proxectos de investigación, publicacións, premios e outras actividades relacionadas coa Administración pública, a súa escala ou, se for o caso, especialidade, tales como patentes, estancias formativas ou a dirección de teses de doutoramento, acreditados mediante orixinal ou copia auténtica.
h) Compatibilidades	Acreditarase mediante orixinal ou copia auténtica da resolución de compatibilidades recoñecidas á persoa interesada para actividade pública ou para actividade privada.
i) Representación do persoal	Acreditarase mediante orixinal ou copia auténtica da certificación da condición de representante legal do persoal da persoa interesada.
j) Outros méritos	Información relativa a aspectos curriculares non definidos nas epígrafes precedentes acreditados mediante orixinal ou copia auténtica.