A Consellería do Mar, dentro da súa estrutura orgánica, conta con catro centros públicos de ensinanzas náuticas e marítimo-pesqueiras nos cales se imparten ensinanzas tanto regradas como non regradas. Para o correcto funcionamento destes centros resulta imprescindible que os seus cadros de persoal docente permanezan estables, motivo polo que, en caso de vacante, enfermidade ou ausencia, a Consellería do Mar solicita a cobertura temporal dos postos coa maior brevidade posible, mediante o procedemento establecido no Decreto 37/2006, do 2 de marzo, polo que se regula o nomeamento de persoal interino para o desempeño con carácter transitorio de prazas reservadas a funcionarios e a contratación temporal de persoal laboral da Xunta de Galicia.

Estando vacante no Instituto Galego de Formación en Acuicultura da Illa de Arousa un posto reservado á escala de profesores/as numerarios/as de institutos politécnicos marítimo-pesqueiros, solicitouse a cobertura do posto polo procedemento establecido no Decreto 37/2006, do 2 de marzo, á Dirección Xeral da Función Pública, órgano competente para a selección e nomeamento de persoal funcionario interino, que non puido seleccionar o persoal axeitado por non existiren na lista da correspondente especialidade aspirantes que reunisen os requisitos establecidos; polo anterior e debido á urxente e inaprazable necesidade de cubrir o posto, tratándose dun servizo público de carácter esencial, a mesma dirección xeral autorizou excepcionalmente a Consellería do Mar para iniciar un procedemento similar ao establecido no artigo 7.5.b).2 do V Convenio colectivo único para o persoal laboral da Xunta de Galicia, para a cobertura do posto, e emitiu informe favorable sobre as súas bases, aprobadas por esta consellería.

En consecuencia, e de acordo co disposto no artigo 30.1.1 e 3 do Estatuto de autonomía de Galicia e en uso das facultades que me confire a Lei 1/1983, do 22 de febreiro, reguladora da Xunta e da súa Presidencia, e demais normativa de aplicación,

RESOLVO:

Anunciar a convocatoria do proceso selectivo para a cobertura temporal por persoal funcionario interino dun (1) posto reservado á escala de profesores/as numerarios/as de institutos politécnicos marítimo-pesqueiros, con destino no Instituto Galego de Formación en Acuicultura da Illa de Arousa.

As bases e as condicións constan na páxina web da Consellería do Mar:

http://mar.xunta.gal

Para participar nesta convocatoria as persoas interesadas utilizarán o modelo de solicitude que se inclúe nas bases da convocatoria.

Santiago de Compostela, 1 de marzo de 2024

O conselleiro do Mar
P.D. (Orde do 21.2.2022, modificada pola Orde do 15.3.2022)
Silvia Cortiñas Fernández
Secretaria xeral técnica da Consellería do Mar