Para os efectos previstos no artigo 5 do Decreto 62/2010, do 15 de abril, polo que se regulan o trámite de competencia e os criterios de valoración no suposto de concorrencia de dúas ou máis solicitudes de autorización administrativa de instalacións de transporte secundario e distribución de gas natural e redes de distribución de gases licuados do petróleo (GLP), a solicitude relacionada no cadro seguinte inicia o correspondente trámite de competencia.

Datos da solicitude:

Empresa solicitante:	Nedgia, S.A.
Data da solicitude:	8 de outubro de 2024
Contido da solicitude:	Autorización administrativa previa e aprobación do proxecto de execución
Tipo de instalación:	Rede de distribución de gas natural
Denominación do proxecto:	Proxecto de autorización administrativa e execución de instalacións para a distribución de gas natural ao polígono de Pena Partida e subministración á industria Cortizo, no termo municipal de Coirós (A Coruña)
Núcleo de poboación da rede:	Polígono de Pena Partida, no termo municipal de Coirós (A Coruña)

Ábrese un prazo de 30 días, contados desde o día seguinte ao da publicación desta resolución no Diario Oficial de Galicia, para que:

• Outras empresas distribuidoras de gas natural poidan presentar solicitudes en concorrencia con esta solicitude de Nedgia, S.A.

• A empresa Nedgia, S.A. poida completar, se o considera oportuno, a súa solicitude.

O trámite de competencia resolverase a favor da empresa cuxo proxecto obteña a maior puntuación, tras a súa valoración de acordo cos criterios establecidos no artigo 8 do Decreto 62/2010, do 15 de abril.

Santiago de Compostela, 11 de novembro de 2024

Pablo Fernández Vila
Director xeral de Planificación Enerxética e Minas