O artigo 91 da Lei 3/2012, do 2 de abril, do deporte de Galicia, configura o Comité Galego de Xustiza Deportiva como o órgano administrativo superior da xurisdición deportiva no ámbito territorial da Comunidade Autónoma de Galicia. Está adscrito ao órgano da Administración autonómica competente en materia de deporte e actúa con independencia funcional deste e da Administración xeral da Comunidade Autónoma.

A composición do Comité Galego de Xustiza Deportiva atópase regulada tanto no artigo 92 da Lei 3/2012, do 2 de abril, do deporte de Galicia, coma no artigo 4 do Decreto 120/2013, do 24 de xullo, polo que se aproba o Regulamento do Comité Galego de Xustiza Deportiva. De conformidade con estes preceptos, o Comité Galego de Xustiza Deportiva está integrado por unha presidenta ou por un presidente e catro vogais, todos eles licenciados/as en Dereito.

A competencia para o nomeamento dos membros do Comité Galego de Xustiza Deportiva, titulares e suplentes, correspóndelle ao órgano da Administración autonómica competente en materia deportiva, segundo o disposto no artigo 92.2 da Lei 3/2012, do 2 de abril, do deporte de Galicia.

Mediante a Resolución do 27 de outubro de 2020, da Secretaría Xeral para o Deporte (DOG núm. 224, do 5 de novembro), nomeáronse os membros titulares do Comité Galego de Xustiza Deportiva.

Segundo o artigo 4.5 do decreto que regula o Comité Galego de Xustiza Deportiva, o mandato dos seus vogais é de 4 anos, a partir do seu nomeamento, e se fosen nomeados para suplir unha renuncia ou cesamento, a duración do cargo será igual á que lle restase por cumprir ao membro a quen suplan, co fin de que o nomeamento do Comité Galego de Xustiza Deportiva se faga en bloque. O mandato dos actuais membros rematou o pasado 28 de outubro de 2024.

Por todo o exposto, e en uso das competencias atribuídas conforme o establecido no Decreto 136/2024, do 20 de maio, de estrutura orgánica da Consellería de Presidencia, Xustiza e Deportes (DOG núm. 101, do 27 de maio), e de acordo coa proposta da Secretaría Xeral para o Deporte,

RESOLVO:

Primeiro. Nomear como membros titulares do Comité Galego de Xustiza Deportiva a:

– María Dolores Rodríguez Rodríguez.

– Beatriz Seijo Méndez.

– Vicente Guzmán Ares.

– Julián Castaño Merodio.

– Ignacio López López.

Segundo. Nomear como membros suplentes do Comité Galego de Xustiza Deportiva a:

– Neil González Seoane.

– Teresa Sestelo Alborés.

Terceiro. Ordenar a publicación desta resolución no Diario Oficial de Galicia.

Contra esta resolución poderase interpoñer, potestativamente, recurso de reposición ante o conselleiro de Presidencia Xustiza e Deporte no prazo dun mes contado desde o día seguinte ao da súa publicación, de conformidade co establecido no artigo 123 da Lei 39/2015, do 1 de outubro, do procedemento administrativo común das administracións públicas, ou interpoñer directamente recurso contencioso-administrativo ante o Tribunal Superior de Xustiza de Galicia, no prazo de dous meses, de conformidade co establecido no artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 11 de decembro de 2024

Diego Calvo Pouso
Conselleiro de Presidencia, Xustiza e Deportes