Conforme os fins que lle asigna á Escola Galega de Administración Pública (EGAP) a normativa que a regula (Lei 4/1987, do 27 de maio, de creación da Escola Galega de Administración Pública, modificada pola Lei 10/1989, do 10 de xullo),
RESOLVO:
Anunciar a realización dos actos de conmemoración do Día das Letras Galegas conforme as seguintes bases:
Primeira. Obxectivos
A Real Academia Galega dedícalle o Día das Letras Galegas de 2025 á poesía popular oral, personificado en Adolfina e Rosa Casás Rama, Eva Castiñeiras Santos, e Manuela Lema Villar, Teresa García Prieto e Prudencia e Asunción Garrido Ameijende, integrantes estas catro das Pandeireteiras de Mens. Con esta elección quérese recoñecer a herdanza cultural das cantareiras e o seu papel na conservación do idioma galego ao logo da historia.
A EGAP, como institución pública galega, súmase á súa homenaxe organizando un acto conmemorativo, así como unha viaxe de interese cultural.
Segunda. Persoas destinatarias
No acto conmemorativo poderá participar calquera persoa interesada ata completar a capacidade do local.
Á viaxe cultural terá acceso só o persoal empregado público ao servizo de calquera das administracións públicas de Galicia (ata 50 prazas). No caso de se presentaren máis solicitudes que prazas, terá preferencia o persoal ao servizo da Administración da Xunta de Galicia.
Terceira. Desenvolvemento
1. O día 16 de maio, ás 12.30 horas, no salón de actos da EGAP terá lugar un acto conmemorativo no cal se proxectará un vídeo homenaxe, terá lugar un relatorio e haberá unha interpretación musical con motivo do día que se festexa. Para finalizar, convidaranse os asistentes a un cóctel.
2. Con posterioridade ao acto conmemorativo, realizarase unha viaxe de interese cultural.
O programa completo do acto conmemorativo, e da viaxe de interese cultural poderase consultar na páxina web da EGAP (https://egap.xunta.gal/).
Cuarta. Inscrición
As persoas interesadas en participar no acto deberán formalizar a súa inscrición a través da área de matrícula da web da EGAP (https://egap.xunta.gal/matricula/).
As persoas interesadas deberán seleccionar primeiro á área en que está integrada esta actividade (Lingua galega) e despois seleccionar no nome do curso Actos de conmemoración do Día das Letras Galegas.
O prazo estará aberto desde o primeiro día hábil seguinte ao da publicación desta resolución no Diario Oficial de Galicia, ata as 23.59 horas do día 12 de maio de 2025.
Unha vez formalizada a inscrición, as persoas interesadas en participar na viaxe cultural deberán, ademais, enviar un correo electrónico a novas.egap@xunta.gal, no cal se deben indicar o nome, apelidos e datos de contacto, así como o seu vínculo de pertenza a calquera das administracións públicas de Galicia.
Poderase obter calquera outra información, das 8.30 ás 14.30 horas, nos teléfonos 981 54 62 41 e 981 54 62 39.
Quinta. Información sobre a selección
A inscrición na viaxe implica necesariamente a asistencia previa ao acto conmemorativo. A selección das persoas participantes na viaxe cultural realizarase tendo en conta a orde de inscrición.
Na epígrafe desta actividade da páxina web da EGAP (https://egap.xunta.gal/) publicarase a listaxe de persoas seleccionadas, en reserva, no caso de que o número de solicitudes sexa superior ao número de prazas e, de ser o caso, as persoas excluídas nesta actividade, de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
No caso de non poder asistir á viaxe cultural, a renuncia deberá ser comunicada por correo electrónico dirixido a novas.egap@xunta.gal como máximo o día 15 de maio, ás 12.00 horas, indicando nome e apelidos.
Sexta. Protección de datos persoais e comprobación de datos
1. Os datos persoais proporcionados polas persoas interesadas para a xestión das solicitudes de participación no acto conmemorativo convocado a través desta resolución, así como aqueloutros que se recollan ou elaboren con motivo do desenvolvemento deste, serán tratados pola EGAP, na súa condición de responsable do tratamento, coa finalidade de levar a cabo a selección das persoas asistentes e a xestión xeral do acto.
A lexitimación para o tratamento dos datos é o cumprimento dunha misión realizada en interese público conforme o disposto no artigo 6.1.e) do Regulamento xeral de protección de datos (RXPD), con base no disposto na Lei 4/1987, do 27 de maio, de creación da Escola Galega de Administración Pública, e fundamentada nun interese público esencial (artigo 9.2.g) do RXPD. Os datos identificativos das persoas seleccionadas para participar no acto serán publicados conforme o detallado na base 5 desta resolución. Así mesmo, os datos relativos á súa participación neste acto poderán ser comunicados aos órganos da Administración xeral e do sector público autonómico de Galicia cando sexa estritamente necesario para o exercicio das súas competencias.
A sesión do acto conmemorativo será gravada de acordo coas finalidades que impulsan a actuación da EGAP. As persoas interesadas poderán solicitar, ante a persoa responsable do tratamento, o acceso, rectificación, limitación e supresión dos seus datos, así como opoñerse ao seu tratamento por motivos relacionados coa súa situación particular, a través da sede electrónica da Xunta de Galicia ou nos lugares e rexistros establecidos na normativa reguladora do procedemento administrativo común, segundo se recolle en https://www.xunta.gal/exercicio-de-dereitos?langId=gl_ES. Contacto delegado/a de protección de datos e información adicional en https://www.xunta.gal/informacion-xeral-proteccion-datos?langId=gl_ES
2. Conforme o disposto no artigo 28.2 da Lei 39/2015, do 1 de outubro, do procedemento administrativo común das administracións públicas, para a tramitación do procedemento de selección consultaranse automaticamente os datos das persoas solicitantes desta acción formativa necesarios para realizar o proceso de selección, salvo que a persoa interesada se opoña a iso.
3. No caso de que as persoas interesadas se opoñan a esta consulta, deberán indicalo expresamente incluíndo os motivos de oposición relacionados coa súa situación particular e enviar os documentos que indiquen a súa situación administrativa, tipo de persoal e antigüidade na Administración a través do correo electrónico <novas.egap@xunta.gal>.
4. Excepcionalmente, en caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.
5. A EGAP poderá pedir as certificacións necesarias para realizar a selección de acordo cos criterios recollidos nesta convocatoria.
Santiago de Compostela, 28 de abril de 2025
Sonia Rodríguez-Campos González
Directora da Escola Galega de Administración Pública