A Xunta de Goberno Local, na sesión ordinaria do 19 de decembro de 2025, adoptou o seguinte acordo:

«Primeiro. Prestar aprobación, con carácter inicial ao proxecto de expropiación, por taxación conxunta, dos terreos do Plan especial de infraestruturas para o novo acceso ao CEIP Párroco Don Camilo, en Santo André de Comesaña, documentación técnica redactada conxuntamente polas arquitectas do Servizo de Planeamento e Xestión da Xerencia Municipal de Urbanismo en outubro de 2025, e asinada electronicamente o 18 de novembro de 2025.

Segundo. Someter a información pública este expediente, con toda a documentación integrante del, polo prazo dun (1) mes, mediante a publicación de anuncios no Diario Oficial de Galicia e nun xornal dos de maior circulación da provincia, para que aquelas persoas que poidan resultar interesadas formulen as observacións e/sou reclamación que consideren convenientes, en particular no relativo á titularidade ou valoración dos seus respectivos dereitos. O remate do referido prazo computarase desde a data da publicación do anuncio no Diario Oficial de Galicia e a documentación exposta dilixenciaraa a Secretaría Xeral que ten atribuída a competencia.

Terceiro. Notificar as taxacións de xeito individual a todas aquelas persoas que aparezan como titulares de bens e dereitos no expediente, mediante traslado literal das correspondentes follas de valoración e da proposta de fixación dos criterios de valoración, para que formulen as alegacións que consideren convenientes no prazo dun mes a partir da súa debida notificación.

Cuarto. O contido íntegro do instrumento inicialmente aprobado estará dispoñible no seguinte enderezo electrónico: https://hoxe.vigo.org/movemonos/urbanismo_pxom_2025.php?lang=gal na epígrafe de Xestión/Execución do Planeamento».

Para os efectos de dar cumprimento ao punto segundo da parte dispositiva deste acordo, a documentación íntegra aprobada inicialmente, logo de disociación dos datos persoais, de conformidade co previsto no artigo 15 da Lei 19/2013, do 9 de decembro, de transparencia, acceso á información pública e bo goberno, e na normativa sobre protección de datos persoais, poderá consultarse na seguinte ligazón: https://hoxe.vigo.org/movemonos/urbanismo_pxom_2025.php?lang=gal na epígrafe de Xestión/Execución do Planeamento, e no Departamento de Información de Urbanismo, sito na planta baixa do edificio da Xerencia de Urbanismo (Praza do Rei, s/n, Vigo), para a súa consulta e a presentación de cantos documentos ou escritos de alegacións consideren convenientes.

* Poden poñerse en contacto co Departamento de Información de Urbanismo, para solicitar cita previa ou para resolver calquera dúbida ao respecto, no teléfono 986 81 03 49.

* Para presentar documentos ou escritos de alegacións poden solicitar, preferentemente, cita previa no Rexistro de Urbanismo, no teléfono 986 81 03 44.

Ante a eventualidade de que poidan existir interesados descoñecidos neste procedemento, se ignore o lugar de notificación ou ben, intentada esta, non se poida practicar, a publicación dese anuncio servirá de notificación co alcance e finalidade previstos no artigo 44 da Lei 39/2015, do 1 de outubro, do procedemento administrativo común das administracións públicas, sen prexuízo da perceptiva publicación no Boletín Oficial del Estado.

Vigo, 15 de xaneiro de 2026

O alcalde
P.D. (Resolución do 4.7.2023)
María José Caride Estévez
Concelleira delegada da Área de Goberno de Urbanismo e Vivenda