De conformidade co establecido na disposición adicional quinta do Decreto 206/2005, do 22 de xullo (Diario Oficial de Galicia núm. 145, do 29 de xullo), de provisión de prazas de persoal estatutario do Servizo Galego de Saúde, e con base nos criterios reitores para mobilidade interna no ámbito de atención especializada, aprobados na Mesa Sectorial de negociación do Servizo Galego de Saúde o 23 de decembro de 2009, modificados mediante o Acordo do 31 de xaneiro de 2014, unha vez negociada coa Xunta de Persoal do Salnés a convocatoria do procedemento de mobilidade interna voluntaria de persoal estatutario fixo das categorías de persoal sanitario grao/diplomado, sanitario de formación profesional e de xestión e servizos no Hospital Público do Salnés, correspóndelle á Xerencia da Área Sanitaria de Pontevedra e O Salnés convocar este procedemento de mobilidade interna voluntaria.

No uso das atribucións conferidas polo Decreto 145/2024, do 20 de maio, polo que se establece a estrutura orgánica do Servizo Galego de Saúde (Diario Oficial de Galicia núm. 101, do 27 de maio), e o Decreto 134/2019, do 10 de outubro, polo que se regulan as áreas sanitarias e os distritos sanitarios do Sistema público de saúde de Galicia (Diario Oficial de Galicia núm. 204, do 25 de outubro), o xerente da Área Sanitaria de Pontevedra e O Salnés

RESOLVE:

Primeiro. Anunciar a convocatoria do procedemento de mobilidade interna voluntaria do persoal estatuario fixo das categorías de persoal sanitario grao/diplomado, sanitario de formación profesional e de xestión e servizos no Hospital Público do Salnés.

Segundo. As solicitudes para participar nesta convocatoria presentaranse, preferentemente, no Rexistro de Entrada do Hospital Público do Salnés, sito na rúa Hospital do Salnés, 30, Rubiáns 36619 Vilagarcía de Arousa.

Así mesmo, tamén se poderán presentar en calquera dos rexistros a que se refire o artigo 16 da Lei 39/2015, do 1 de outubro, do procedemento administrativo común das administracións públicas, e demais lugares previstos no artigo 10 do Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia.

Terceiro. O prazo de presentación de solicitudes de participación esténdese desde o día seguinte ao da publicación deste anuncio ata o 8 de maio de 2026.

Cuarto. Os postos ofertados, a resolución de convocatoria e as bases do procedemento estarán publicados na intranet da Área Sanitaria de Pontevedra e O Salnés.

Pontevedra, 8 de abril de 2026

José Manuel Flores Arias
Xerente da Área Sanitaria de Pontevedra e O Salnés