Os centros residenciais prestan un servizo que contribúe eficazmente a facilitar o acceso ao ensino postobrigatorio non universitario do alumnado que debe realizar os seus estudos en localidade distinta á do domicilio habitual. E o normal funcionamento deste tipo de centros, tanto en aspectos relacionados coa orde interna e a convivencia como nos relativos ao desenvolvemento de accións formativas complementarias, exixe que, o persoal profesional que traballa na residencia conte co reforzo de colaboradores, alumnado universitario que compatibiliza os seus estudos co labor de apoio na residencia.

A disposición derradeira primeira do Decreto 43/1989, do 2 de marzo, polo que se transforman os centros de ensinanzas integradas en institutos de educación secundaria e profesional e en centros residenciais docentes, faculta a Consellería de Educación, Ciencia, Universidades e Formación Profesional para o seu desenvolvemento.

Na súa virtude, por proposta da Dirección Xeral de Centros e Recursos Humanos,

DISPOÑO:

CAPÍTULO I

Condicións xerais

Artigo 1. Obxecto e ámbito de aplicación

1. Este orde ten por obxecto establecer as bases reguladoras e o procedemento (ED308A) para adxudicar prazas de residencia ás persoas colaboradoras bolseiras nos centros residenciais docentes da Coruña, Ourense e Vigo para o curso académico 2026/27.

2. O número de prazas ofertadas é o seguinte:

Centro Residencial Docente da Coruña: 18 prazas.

Centro Residencial Docente de Ourense: 6 prazas.

Centro Residencial Docente de Vigo: 6 prazas.

3. As persoas adxudicatarias de prazas de colaboradora bolseira utilizarán os servizos da residencia de forma gratuíta, durante o período de funcionamento en que estean abertas as residencias.

Artigo 2. Requisitos persoais e dispoñibilidade

1. A persoa solicitante deberá ter os seguintes requisitos:

a) Dezaoito anos feitos, ou acadar esta idade dentro do ano natural 2026.

b) Estar empadroada ela e os demais membros computables da unidade familiar a que pertenza nun municipio da Comunidade Autónoma de Galicia; este requisito entenderase referido exclusivamente á persoa solicitante cando acredite vida independente nos termos previsto no artigo 5.3 desta orde.

c) Posuír a capacidade funcional para o desempeño do labor de apoio no desenvolvemento da actividade diaria da residencia.

2. A distancia entre o centro universitario onde curse os estudos e o centro residencial docente, así como os medios de comunicación existentes, deberán garantir a dispoñibilidade no horario en que teñan que realizar o devandito labor de apoio.

Artigo 3. Requisitos académicos

1. A persoa solicitante deberá estar matriculada en ensinanzas universitarias de grao, mestrado oficial, primeiro, segundo ou terceiro ciclo nunha facultade, escola superior, escola universitaria ou colexio universitario no curso 2026/27 con matrícula completa ou parcial.

2. Considéranse matrícula completa os seguintes casos:

a) Estudos de grao: 60 créditos ECTS ou máis por curso académico.

b) Estudos de primeiro e segundo ciclo: o número de créditos ECTS que resulte de dividir o total dos que integran o plan de estudos (agás os de libre elección) entre o número de anos que o compoñan.

3. Considéranse matrícula parcial os seguintes casos:

a) Estudos de grao: entre 30 e 59 créditos ECTS por curso académico.

b) Estudos de primeiro e segundo ciclo: o 50 % dos créditos indicados no número 2.b).

Artigo 4. Incompatibilidades

1. As persoas beneficiarias de praza de colaboradora bolseira non poderán realizar, mentres gocen desta, ningún tipo de traballo remunerado.

2. Así mesmo, será incompatible con estar en posesión ou reunir os requisitos necesarios para obter un título académico de nivel igual ou superior ao dos estudos que pretende realizar.

3. A condición de persoa beneficiaria será compatible coa obtención de axudas na convocatoria xeral de bolsas e axudas ao estudo, agás aquelas que teñan como compoñente o pagamento de gastos de comedor e/ou residencia.

CAPÍTULO II

Criterios de baremo: económicos, académicos e outros méritos

Sección 1ª. Valoración de criterios económicos: renda e deducións

Artigo 5. Membros computables da unidade familiar

1. A persoa solicitante deberá indicar os membros computables da unidade familiar na data de publicación desta convocatoria no Diario Oficial de Galicia cubrindo o anexo II desta orde.

2. Terán a consideración de membros computables da unidade familiar:

a) O alumnado solicitante.

b) As persoas proxenitoras non separadas legalmente nin divorciadas.

c) A persoa que, por novo matrimonio ou por convivencia en situación de unión de feito ou análoga, viva no domicilio familiar coa persoa proxenitora.

d) As irmás e irmáns solteiros menores de 25 anos que dependan das persoas proxenitoras, sempre que convivan no domicilio familiar.

e) As irmás e irmáns maiores de 18 anos con discapacidade sempre que convivan no domicilio familiar.

3. Cando a persoa solicitante alegue que vive de forma independente respecto da súa unidade familiar deberá acreditar: a dispoñibilidade da vivenda (en propiedade, en alugamento ...), que vive de forma efectiva nela (recibos de luz, auga ...), e que dispón de medios económicos suficientes para facer fronte aos seus gastos. Se non xustifica os aspectos indicados, non se considerará probada, para os efectos desta orde, a circunstancia de vida independente.

4. Non terán a consideración de membros computables da unidade familiar:

a) A persoa proxenitora separada legalmente ou divorciada que non conviva habitualmente co/coa fillo/a solicitante, agás se as persoas proxenitoras teñen (ou tiveron) a custodia compartida.

b) O agresor, nos casos de violencia de xénero constatada de acordo co artigo 5 da Lei 11/2007, do 27 de xullo, galega para a prevención e o tratamento integral da violencia de xénero.

Artigo 6. Renda da unidade familiar

1. Para os efectos desta orde, a renda da unidade familiar obterase pola suma das rendas de cada un dos membros computables da familia que obteñan ingresos de calquera natureza, calculados segundo indican os números seguintes e de conformidade coa normativa reguladora do imposto sobre a renda das persoas físicas; computaranse as rendas do exercicio fiscal 2024.

2. Cando o membro computable presentase declaración do imposto sobre a renda das persoas físicas, a renda da unidade familiar será a suma da base impoñible xeral (recadro 435) e a base impoñible do aforro (recadro 460); cando non a presente, teranse en conta os ingresos de acordo cos datos tributarios facilitados pola Axencia Tributaria.

3. Nos casos de separación legal ou divorcio, compútanse os ingresos de ambas as persoas proxenitoras se, durante a minoría de idade da persoa solicitante, houbo custodia compartida.

4. Os ingresos obtidos polo novo cónxuxe ou parella de feito da persoa proxenitora con que conviva habitualmente a solicitante compútanse para calcular a renda da unidade familiar.

5. Nos casos de violencia de xénero, quedan excluídos do cómputo os ingresos do agresor (artigo 38 da Lei 11/2007, do 27 de xullo, galega para a prevención e o tratamento integral da violencia de xénero).

Artigo 7. Deducións da renda familiar

Calculada a renda familiar segundo o indicado, aplicaranse as deducións seguintes:

1. 500 € por cada irmán, incluída a persoa solicitante, cando se trate de familias numerosas de categoría xeral, e 750 € para familias numerosas de categoría especial, en ambos os casos, sempre que convivan no domicilio familiar.

2. 1.800 € por cada irmán, incluída a persoa solicitante, que estea afectado de discapacidade legalmente cualificada de grao igual ou superior ao 33 %, e 2.900 € cando a discapacidade sexa de grao igual ou superior ao 65 %.

3. 1.200 € por cada irmán, incluída a persoa solicitante (menores de 25 anos), que curse estudos postobrigatorios, universitarios ou non, sempre que resida fóra do domicilio familiar por razón dos estudos.

Artigo 8. Limiar de renda e baremo

1. Terase en conta o limiar 2 fixado polo Real decreto 179/2026, do 11 de marzo, do Ministerio de Presidencia, Xustiza e Relacións coas Cortes, polo que se establecen os limiares de renda e patrimonio familiar e as contías das bolsas e axudas ao estudo para o curso 2026/27, recollido no seguinte cadro:

Número de membros da familia	Limiar (euros)
Familias de un membro	13.898
Familias de dous membros	23.724
Familias de tres membros	32.201
Familias de catro membros	38.242
Familias de cinco membros	42.743
Familias de seis membros	46.142
Familias de sete membros	49.503
Familias de oito membros	52.850
Cada membro adicional ao 8º	3.340

Cando a persoa solicitante sexa orfa absoluta e menor de 25 anos, o limiar da renda familiar incrementarase no 20 %.

2. Atendendo á porcentaxe que represente a renda da unidade familiar respecto dos limiares calculados segundo o número anterior, atribuiranse as seguintes puntuacións:

a) Ata o 50 %: 6 puntos.

b) Ata o 60 %: 5 puntos.

c) Ata o 70 %: 4 puntos.

d) Ata o 80 %: 3 puntos.

e) Ata o 90 %: 2 puntos.

f) Ata o 100 %: 1 punto.

g) A partir do 100 %: 0 puntos.

Sección 2ª. Valoración do rendemento académico

Artigo 9. Valoración do rendemento académico

1. Curso de referencia.

a) Para o alumnado que se matricule por primeira vez en estudos de grao no curso 2026/27, terase en conta a nota media do 2º curso de bacharelato ou do 2º curso do ciclo de formación profesional de grao superior realizado no ano académico 2025/26.

b) Para o alumnado que estivese matriculado en ensinanzas universitarias no curso 2025/26, terse en conta a nota media obtida neste.

c) Para o alumnado que non estivese matriculado no curso 2025/26, terase en conta a nota media do último curso que realizase nos termos respectivamente indicados nas letras a) e b).

2. Criterio para o cálculo da nota media.

a) Plans de estudos organizados por materias:

Σ cualificacións materias

Σ núm. materias

b) Plans de estudos organizados por créditos ECTS:

Σ (nota módulo/materia x créditos ECTS)

Σ créditos ECTS

A nota media arredondarase á centésima máis próxima e, en caso de equidistancia, á superior, e expresarase con dúas cifras decimais.

3. As materias ou módulos coa indicación «non presentado» non se terán en conta para o cálculo da nota media e asimilaranse, para os efectos da adxudicación de prazas, aos casos de matrícula parcial (artigo 22.2 da orde).

4. Cando non existan cualificacións numéricas, aplicarase a seguinte táboa:

a) Matrícula de honra = 10 puntos.

b) Sobresaliente = 9 puntos.

c) Notable = 7,5 puntos.

d) Aprobado = 5,5 puntos.

e) Suspenso ou non apto: 2,50 puntos

Sección 3ª. Outros méritos: experiencia e coñecementos

Artigo 10. Experiencia e coñecementos

1. Para asegurar a maior idoneidade das persoas solicitantes no desenvolvemento do labor de apoio na actividade da residencia, a comisión realizaralles unha entrevista que versará sobre: a) experiencia derivada da participación en cursos e/ou actividades educativas ou formativas; b) coñecemento de linguas estranxeiras e/ou de ofimática; c) experiencia na realización de actividades ou funcións similares, coa finalidade de avaliar a aptitude ou capacidade para o bo desempeño ou exercicio da actividade de apoio na residencia, así como a súa actitude persoal ou disposición de ánimo (responsable, organizativo, conciliador, solidario...).

2. Estes méritos acreditaranse documentalmente. O resultado da entrevista e a ponderación dos méritos reflectiranse nun informe.

3. A puntuación máxima que se poderá outorgar a estes méritos é de 4 puntos.

Artigo 10.bis. Experiencia específica no centro residencial

A comisión, logo de valorar a experiencia adquirida na realización do traballo de colaboración no propio centro residencial docente no curso inmediatamente anterior, poderá outorgar unha puntuación máxima de 4 puntos.

CAPÍTULO III

Procedemento para a adxudicación de praza en período ordinario

Artigo 11. Competencias

Na tramitación do procedemento de adxudicación de prazas de residencia a persoas colaboradoras bolseiras, a instrución corresponderá, ao respectivo centro residencial docente, e a valoración dos criterios de baremo, a resolución e publicación, á Comisión de Valoración que para tal efecto se constituirá en cada centro residencial.

Sección 1ª. Solicitude, prazo e documentación

Artigo 12. Presentación de solicitudes

1. As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia, https://sede.xunta.gal

A presentación electrónica será obrigatoria para o estudantado universitario e as persoas representantes deste por tratarse dun trámite que realizan motivado pola súa condición académica, porque para presentar a solicitude se exixe o requisito académico de estar matriculado en estudos universitarios (artigo 3.1 da orde).

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que sexa realizada a emenda.

Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

2. A solicitude deberá estar asinada pola persoa solicitante e implicará: que acepta as bases da convocatoria que reúne os requisitos exixidos nela e que son certos todos os datos que constan na solicitude.

Artigo 13. Prazo de presentación de solicitudes en período ordinario

O prazo de presentación de solicitudes en período ordinario será desde o día seguinte ao da publicación desta convocatoria ata o 7 de agosto de 2026 (este incluído).

Artigo 14. Documentación complementaria

1. As persoas interesadas deberán achegar coa solicitude (modelo normalizado anexo I) a seguinte documentación:

a) O anexo II (comprobación de datos dos membros computables da unidade familiar), de ser o caso.

b) Xustificante de inscrición ou matricula en ensinanzas universitarias no curso 2026/27.

c) O alumnado que se matricule por primeira vez en estudos de grao no curso 2026/27, o documento que acredite as notas obtidas en 2º de bacharelato ou en 2º do ciclo formativo de grao superior realizado no curso 2025/26.

d) O alumnado que estivese matriculado en ensinanzas universitarias no curso 2025/26, o documento que acredite as notas obtidas neste.

e) O alumnado que non estivese matriculado no curso 2025/26, o documento que acredite as notas obtidas no último curso realizado.

f) Copia do libro de familia ou documento equivalente onde figuren todos os membros computables. Se non ten libro de familia ou este non reflicte a situación na data de publicación desta convocatoria, poderá acreditar o número de membros da familia utilizando, entre outros, algún dos seguintes medios:

1º. Sentenza xudicial de separación ou divorcio e/ou convenio regulador onde conste a custodia do menor.

2º. Informe dos servizos sociais ou do órgano equivalente do concello onde resida a familia.

g) Certificado de convivencia da persoa solicitante e os demais membros computables da familia no domicilio habitual nun municipio de Galicia.

h) Certificado de discapacidade da persoa solicitante e dos demais membros da unidade familiar non expedido pola Administración autonómica.

i) Para acreditar vida independente respecto da unidade familiar (nos termos previstos no artigo 5.3 da orde): escritura de compra, contrato de alugueiro ou título que lexitima a ocupación da vivenda, recibos acreditativos do pagamento de subministracións (auga, luz, ...) e as retribucións ou calquera outro tipo de rendas que perciba suficientes para facer fronte aos gastos.

j) Calquera outro documento que consideren conveniente.

2. A documentación complementaria deberase presentar electronicamente.

Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase data de presentación aquela en que sexa realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.

3. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

4. No caso de que algún dos documentos que se presente de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

5. Os documentos achegados deberán ser válidos e eficaces no momento da súa presentación e reflectir a situación persoal e familiar na data de publicación desta convocatoria no Diario Oficial de Galicia, agás a renda da unidade familiar, que será a correspondente ao exercicio fiscal 2024. No caso de violencia de xénero, observarase o disposto na lexislación específica.

Artigo 15. Comprobación de datos

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoñan á súa consulta:

a) DNI ou NIE da persoa solicitante ou representante cando sexa menor de idade e do resto dos membros computables da unidade familiar.

b) Certificado da renda do exercicio 2024 da persoa solicitante e do resto dos membros computables da unidade familiar.

Consultaranse, ademais, os seguintes datos cando a persoa interesada faga constar na solicitude que lle é de aplicación a circunstancia que acredita o documento correspondente:

c) Certificado de discapacidade da persoa solicitante e do resto dos membros computables da unidade familiar expedido pola Administración autonómica.

d) Percepción de pensión por incapacidade permanente total, absoluta ou grande invalidez ou de pensión de clases pasivas por xubilación ou retiro por incapacidade permanente para o servizo ou inutilidade (equivale a discapacidade igual ao 33 %), da persoa solicitante e do resto dos membros computables da unidade familiar.

e) Consulta dos datos de defunción da persoa proxenitora do alumnado solicitante.

f) Consulta de datos de residencia con data da última variación, cando a persoa solicitante alegue vida independente.

2. No caso de que as persoas interesadas se opoñan á consulta, deberán indicalo no recadro habilitado no formulario correspondente e achegar os documentos.

Cando así o exixa a normativa aplicable solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilite a obtención dos citados datos poderase solicitar ás persoas interesadas a presentación dos documentos correspondentes.

Artigo 16. Trámites administrativos posteriores á presentación de solicitudes

Todos os trámites administrativos que as persoas interesadas deban realizar tras a presentación da solicitude deberán ser efectuados electronicamente accedendo á Carpeta cidadá da persoa interesada dispoñible na sede electrónica da Xunta de Galicia.

Artigo 17. Falta de xustificación de requisitos e/ou de criterios de baremo

A Comisión de Valoración poderá requirir a documentación complementaria que considere necesaria para constatar a concorrencia dos requisitos e dos criterios de baremo. A falta ou insuficiente xustificación dun requisito impedirá obter a praza e cando a omisión ou deficiente xustificación afecte un criterio de baremo, atribuiráselle neste 0 puntos.

Artigo 18. Publicación dos actos

Logo da publicación desta convocatoria no Diario Oficial de Galicia, de conformidade co establecido no artigo 45.1.b) da Lei 39/2015, do 1 de outubro, do procedemento administrativo común das administracións públicas, publicaranse na páxina web e/ou no taboleiro de anuncios do respectivo centro residencial docente as listaxes provisionais e definitivas previstas nesta orde coas indicacións necesarias para xestionar o procedemento.

Artigo 19. Notificacións

1. As notificacións de resolucións e actos administrativos efecturanse só por medios electrónicos, nos termos previstos na normativa reguladora do procedemento administrativo común.

2. De conformidade do artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal. Este sistema remitirá ás persoas interesadas avisos da posta á disposición das notificacións á conta de correo electrónico e/ou teléfono móbil que consten na solicitude. Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.

3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e as entidades instrumentais do sector público autonómico. En todo caso, a Administración xeral poderá de oficio crear o indicado enderezo, para os efectos de asegurar o cumprimento polas persoas interesadas da súa obriga de relacionarse por medios electrónicos.

4. As notificacións entenderanse practicadas no momento en que se produza o acceso ao seu contido, entendéndose rexeitada cando transcorra dez días naturais desde á posta a disposición da notificación sen que se acceda ao seu contido.

5. Se o envío da notificación electrónica non é posible por problemas técnicos practicarase a notificación polos medios previstos na normativa reguladora do procedemento administrativo común.

Sección 2ª. Comisión de Valoración

Artigo 20. Comisión de Valoración: composición e funcións

1. A Comisión de Valoración constituirase en cada centro residencial docente e estará formada por:

a) Presidente/a: a persoa titular da dirección do centro residencial.

b) Vogais: o/a xefe/a de residencia; un/unha educador/a ou profesor/a de actividades.

c) Secretario/a: un/unha funcionario/a do centro.

2. Á Comisión corresponderalle valorar os criterios de baremo e asignar as puntuacións e as demais funcións atribuídas nesta orde.

Sección 3ª. Listaxes provisionais, definitivas e adxudicación de prazas

Artigo 21. Publicación das listaxes de puntuacións provisionais das persoas admitidas e relación das excluídas e reclamacións

1. O día 20 de agosto de 2026, a Comisión de Valoración publicará no taboleiro de anuncios ou na páxina web do respectivo centro: a listaxe de puntuacións provisionais das persoas admitidas (a total por orde descendente, e a desagregada correspondente a criterios económicos, rendemento académico e outros méritos), e a relación provisional de persoas excluídas, indicando a causa.

2. As persoas solicitantes poderán formular reclamación ante a Comisión de Valoración no prazo de cinco (5) días hábiles contados a partir do día seguinte ao da súa publicación.

3. As reclamacións formuladas entenderanse estimadas ou desestimadas mediante a publicación das listaxes definitivas.

Artigo 22. Publicación das listaxes das puntuacións definitivas, da relación de persoas excluídas e da listaxe de suplentes e adxudicación de prazas

1. O día 28 de agosto de 2026, a Comisión de Valoración publicará no taboleiro de anuncios ou na páxina web do centro a listaxe de puntuacións definitivas das persoas admitidas (a total por orde descendente, e a desagregada correspondente a criterios económicos, rendemento académico e outros méritos), a relación definitiva de persoas excluídas, e a relación de suplentes.

2. En período ordinario, os estudantes con matrícula completa (artigo 3.2 da orde) terán preferencia na adxudicación, seguindo a orde de prelación que resulte da puntuación definitiva; a continuación, se seguise habendo pazas vacantes adxudicaranse aos estudantes con matrícula parcial, seguindo a orde de prelación que resulte da puntuación definitiva (artigo 3.3 da orde).

Así mesmo, a dirección do centro residencial docente expedirá a correspondente credencial ás persoas adxudicatarias.

3. Fronte a estas resolucións da Comisión de Valoración, as persoas interesadas poderán interpoñer recurso de alzada ante o conselleiro de Educación, Ciencia, Universidades e Formación Profesional no prazo dun (1) mes contado a partir do día seguinte ao da súa publicación na páxina web do centro residencial.

CAPÍTULO IV

Procedemento de adxudicación praza en período extraordinario

Artigo 23. Solicitudes, tramitación e adxudicación

1. Cando, feita a adxudicación de prazas en período ordinario, sigan existindo prazas vacantes, o centro residencial abrirá un prazo de presentación de solicitudes en período extraordinario entre o 31 de agosto e o 4 de setembro de 2026, ambos incluídos.

2. A tramitación destas solicitudes axustarase ao establecido nos artigos anteriores, agás no relativo ás datas e prazos, que serán os seguintes:

a) Publicación da listaxe provisional: o 11 de setembro de 2026.

b) Prazo para formular reclamación: ata o 18 de setembro de 2026 (este incluído).

c) Publicación da listaxe definitiva e da adxudicación de praza: o 25 de setembro de 2026.

3. A adxudicación de prazas en período extraordinario axustarse ao dito no artigo 22.2 desta orde.

CAPÍTULO V

Obrigas das persoas colaboradoras
bolseiras e causas de perda da praza

Artigo 24. Obrigas das persoas colaboradoras bolseiras

As persoas colaboradoras bolseiras teñen as seguintes obrigas:

1. Residir no centro residencial docente.

2. Colaborar no desenvolvemento das tarefas e actividades relacionadas con accións formativas complementarias durante o período de funcionamento en que estea aberto aos residentes.

3. Na súa condición de colaboradora ante o resto das persoas residentes, teñen a obriga de cumprir e facer cumprir as normas de réxime interno, as normas de convivencia e os horarios que permitan o normal desenvolvemento da vida residencial.

Artigo 25. Causas de perda da praza

1. As persoas colaboradoras bolseiras poderán perder a praza:

a) Por non incorporarse ao centro residencial na data de inicio da súa actividade, agás causa de forza maior debidamente xustificada.

b) Por non residir os días lectivos no centro residencial, agás causas debidamente xustificadas.

c) Por inexactitude ou falsidade nos datos ou na información achegada, cando afecte a concorrencia de requisitos exixidos na convocatoria.

d) Por inexactitude ou falsidade nos datos ou na información achegada cando, afectando criterios de baremo, a puntuación outorgada nese criterio fose determinante da adxudicación da praza.

e) Por incumprimento das normas de réxime interno do centro residencial, ou do deber de vixiar o cumprimento destas por parte dos residentes, cando se trate de condutas gravemente prexudiciais para a convivencia neste.

f) Por incumprir a obriga de permanecer no centro residencial e colaborar na actividade deste ata o remate do período de funcionamento en que estea aberto a residentes.

2. A perda da praza de residencia por calquera das causas indicadas é causa de exclusión da solicitude na convocatoria seguinte.

Artigo 26. Procedemento

1. Ante un incumprimento das obrigas indicadas nas letras a) a e) do artigo anterior, a dirección do centro residencial daralle audiencia á persoa interesada e advertiraa expresamente por escrito de que, en caso de reiteración, se incoará o procedemento.

En caso de incumprimento da obriga indicada na letra f) do artigo anterior, incoarase directamente o procedemento.

2. Iniciado o procedemento, a dirección do centro concederalle á persoa colaboradora un prazo de cinco (5) días hábiles para que presente as alegacións, documentos ou xustificacións que considere convenientes. Á vista destas, ou transcorrido o prazo concedido, solicitará informe motivado á xunta de residencia.

3. A continuación, a persoa titular da dirección do centro ditará resolución. En caso de incumprimento da obriga indicada na letra f) do artigo anterior, nesta resolución cuantificará a parte proporcional do custo do aloxamento e da manutención que terá que aboar a persoa colaboradora bolseira por referencia á contía de 3.848,81 € establecida na disposición adicional segunda da Orde do 20 de maio de 2026 pola que se convocan prazas de residencia nos centros residenciais docentes da Coruña, Ourense e Vigo para realizar estudos postobrigatorios non universitarios no curso 2026/27.

4. Fronte a esta resolución, a persoa interesada poderá interpoñer recurso de alzada ante o conselleiro de Educación, Ciencia, Universidades e Formación Profesional no prazo dun (1) mes contado a partir do día seguinte ao da súa notificación.

Disposición adicional primeira. Período de funcionamento dos centros residenciais docentes

1. O período de funcionamento dos centros residenciais docentes coincidirá co calendario escolar que a consellería competente en materia de educación aprobe e publique no Diario Oficial de Galicia para o curso 2026/27. En todo caso, o centro residencial permanecerá pechado a partir do 30 de xuño de 2027.

2. Así mesmo, permanecerán pechados os fins de semana (desde o venres pola tarde ao domingo pola noite), tal e como establezan as normas de réxime interno do centro.

Disposición adicional segunda. Deber de confidencialidade

O persoal que preste servizos nos centros residencias docentes que, con motivo do desenvolvemento das súas funcións, acceda a datos persoais e económicos do alumnado e das familias, quedará suxeito ao deber de confidencialidade e á lexislación sobre protección de datos.

Disposición derradeira primeira. Recurso

Contra esta orde, que pon fin á vía administrativa, poderase interpoñer recurso potestativo de reposición ante o conselleiro de Educación, Ciencia, Universidades e Formación Profesional no prazo dun mes contado a partir do día seguinte ao da súa publicación no Diario Oficial de Galicia (artigos 123 e 124 da Lei 39/2015, do 1 de outubro, do procedemento administrativo común das administracións públicas) ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados desde a mesma data (artigos 8, 10 e 46.1 da Lei 29/1998, do 13 de xullo, reguladora da xurisdición contencioso-administrativa).

Disposición derradeira segunda. Vixencia

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 20 de maio de 2026

Román Rodríguez González
Conselleiro de Educación, Ciencia,
Universidades e Formación Profesional