Ás 12.30 horas do día 6 de novembro de 2026, na sala de comisións número 1 do Edificio Administrativo do Reitorado, rúa Maestranza 9, A Coruña, terá lugar a poxa pública, á alza e con presentación de ofertas a viva voz, do inmoble situado na rúa Enrique Dequidt, núm. 16, 9º J, 15005 A Coruña.

Datos xerais do procedemento:

1. Órgano que realiza a poxa: Xerencia da Universidade da Coruña (UDC).

2. Forma e prazo para a presentación da solicitude de participación:

A presentación da solicitude de participación e documentación anexa poderá realizarse anticipadamente ata o día 22 de outubro de 2026 ou ben in situ ante a mesa da poxa no día da súa realización, aínda que neste último caso non se outorgará un prazo para emendar as deficiencias que se puidesen advertir.

A presentación anticipada da documentación realizarase no Rexistro Xeral da Universidade da Coruña, dirixida á Xerencia, ben de forma presencial no Edificio Administrativo do Reitorado, rúa Maestranza 9, 15001 A Coruña, durante o horario de apertura, ou de forma telemática no rexistro da sede electrónica da UDC (https://sede.udc.gal/). A presentación tamén poderá realizarse por calquera dos medios establecidos no artigo 16.4 da Lei 39/2015, do 1 de outubro, do procedemento administrativo común das administracións públicas.

No caso de que se presente a solicitude en lugares diferentes do rexistro xeral, deberase remitir o mesmo día da presentación un correo electrónico ao enderezo servizo.contratacion.administrativa@udc.gal coa indicación de que se presentou a solicitude e o lugar da súa presentación. No caso de non se recibir o devandito correo, non serán admitidas as solicitudes presentadas. Tampouco serán admitidas as solicitudes que se reciban pasados cinco días naturais desde a data final de presentación establecida no anuncio.

A presentación da documentación administrativa realizarase conforme o previsto na condición 8 do prego de condicións da poxa pública, que pode consultarse no taboleiro electrónico da UDC (https://sede.udc.gal/services/electronic_board).

3. Tipo de licitación: 450.125,00 €.

4. Lugar de consulta do prego de condicións:

Taboleiro electrónico da UDC (https://sede.udc.gal/services/electronic_board).

Para máis información: secretaria.xerencia@udc.gal

5. Prazo para solicitar unha visita ao inmoble:

A solicitude para visitar o inmoble deberá remitirse, antes do 9 de outubro de 2026 ás 14.00 horas, a secretaria.xerencia@udc.gal

6. Descrición do ben obxecto de poxa:

– Vivenda e rocho:

• Enderezo: rúa Enrique Dequidt, núm. 16, 9º J, 15005 A Coruña.

• Referencia catastral: 7914202NJ4071S0015BL.

• Superficie útil da vivenda: 126 m2.

• Superficie útil do rocho: 16 m2.

• Superficie construída: 157 m2.

• Ano de construción: 1982.

– Praza de aparcadoiro:

• Enderezo: rúa Enrique Dequidt, núm. 16, 9º J, 15005 A Coruña.

• Referencia catastral: 7914202NJ4071S0184WQ.

• Superficie útil: 14 m2.

• Superficie construída: 32 m2.

• Ano de construción: 1982.

– Valor da taxación:

• Vivenda e rocho: 405.218,31 €.

• Praza de aparcadoiro: 44.906,56 €.

• Total: 450.124,87 €.

7. Garantía:

Para tomar parte na poxa é requisito indispensable consignar o 5 % da cantidade sinalada como tipo de licitación na Caixa Xeral de Depósitos da Comunidade Autónoma de Galicia, conforme o previsto na condición 6 do prego.

8. Gastos:

Serán por conta da persoa adxudicataria os gastos dos anuncios e os restantes previstos nos pregos.

A Coruña, 24 de setembro de 2026

Ricardo José Cao Abad
Reitor da Universidade da Coruña