Unha vez aprobado polo Consello Reitor o programa de actividades formativas da Escola Galega de Administración Pública (en diante, EGAP) para o ano 2026, de conformidade co artigo 6.2 da Lei 4/1987, do 27 de maio, de creación da Escola Galega de Administración Pública, modificada pola Lei 10/1989, do 10 de xullo,
RESOLVO:
Convocar o Taller práctico de simulación de roles (role-play). Contratación pública en xogo: do prego á execución, que se desenvolverá de acordo coas bases que se indican a seguir:
Primeira. Obxectivos
O obxectivo xeral desta actividade é que o alumnado experimente, desde unha posición distinta á súa habitual, como as decisións adoptadas na preparación dun contrato determinan a súa execución, e que identifique o rastro documental que debe existir no expediente para soster cada unha desas decisións.
Obxectivos específicos:
1. Xustificar a necesidade e calcular correctamente o valor estimado e o orzamento base de licitación nun servizo intensivo en man de obra.
2. Distinguir que corresponde ao prego técnico e que ao prego administrativo, e detectar as contradicións habituais entre ambos.
3. Deseñar criterios de adxudicación vinculados ao obxecto, medibles e non discriminatorios, e valorar o peso relativo do prezo.
4. Manexar a subrogación e a información laboral asociada, e os seus efectos sobre o custo e sobre a licitación.
5. Identificar e tramitar unha oferta anormalmente baixa.
6. Recoñecer os motivos reais de acollemento dun recurso especial en materia de contratación.
7. Documentar o incumprimento en execución e aplicar o réxime de penalidades cando o prego o permite, así como identificar alternativas cando non o permite.
8. Delimitar cando un contrato se pode modificar sen nova licitación e cando a modificación é substancial.
9. Afrontar a prestación executada sen cobertura contractual previa: reparo, validación, enriquecemento inxusto e responsabilidades derivadas.
10. Anticipar o control posterior –interno, externo e, de ser o caso, penal– desde o momento en que se redacta o expediente.
Segunda. Contidos
Trataranse dunha forma práctica, consistente na realización de distintas tarefas que se propoñerán ao longo da actividade, e no uso de técnicas de dinámica de grupo como o role-play (simulación ou xogo de roles), as seguintes fases:
I. Preparación, redacción de pregos e licitación.
Encargo e presión de prazos. Mesa de discusión do prego. Consultas preliminares do mercado ou direccionamento. Licitación, oferta anormalmente baixa e recurso especial.
II. Execución do contrato.
«O arranque que non arrinca». O atraso e as penalidades. A modalidade contractual. A modificación executada antes de tempo. A prórroga tardía e a fin do contrato. Control e responsabilidade. Reflexión conxunta e mensaxes clave.
Terceira. Número de prazas
Trinta (30).
Cuarta. Persoas destinatarias
O taller está dirixido ao persoal empregado público, en situación de servizo activo ou asimilada, das administracións públicas da Comunidade Autónoma de Galicia e dos seus entes públicos instrumentais, que presten servizo en unidades de contratación.
No caso de non se cubrir a totalidade das prazas convocadas, ás vacantes que resulten poderá acceder o persoal empregado público, en situación de servizo activo ou asimilada, que preste servizo en unidades de contratación da Administración local e das universidades do Sistema universitario de Galicia, que interveña en calquera fase do ciclo contractual.
O persoal empregado público da Administración local e das universidades do Sistema universitario de Galicia deberá achegar documentación unha vez formalizada a súa inscrición e antes de que finalice o prazo de matrícula, tal como se indica na base sexta, número 6.
Este taller resulta especialmente indicado para:
– Persoal de servizos e unidades de contratación.
– Persoal técnico redactor de pregos de prescricións técnicas.
– Persoal de asesoría xurídica e secretarías.
– Persoal de intervención e control interno.
– Responsables de contratos e persoal de unidades usuarias.
– Persoal directivo con competencias en materia contractual.
Quinta. Desenvolvemento
Modalidade de impartición: presencial.
Lugar: Escola Galega de Administración Pública (EGAP), na rúa Madrid, 2-4, Santiago de Compostela.
Data: o venres 6 de novembro de 2026.
Horario: de mañá e tarde.
Duración: 6 horas lectivas.
Sexta. Inscrición
1. As solicitudes de participación nesta actividade formativa só se poderán realizar mediante o formulario de matrícula telemática dispoñible no enderezo <https://egap.xunta.gal/matricula>.
2. Antes de formalizaren a súa inscrición nesta actividade, todas as persoas deben introducir ou actualizar os datos da súa área de matrícula, de acordo coas persoas destinatarias e os criterios de selección establecidos nas bases cuarta e oitava, respectivamente, desta convocatoria.
3. As persoas que oculten ou falseen datos esenciais para a selección serán automaticamente excluídas da actividade solicitada e pasarán ao final das listaxes de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.
4. As persoas interesadas deberán seleccionar primeiro a área en que está integrada esta actividade (Réxime xurídico e actividade financeira das administracións públicas) e logo seleccionar en «Nome do curso»: Taller práctico de simulación de roles (role-play). Contratación pública en xogo: do prego á execución.
5. O prazo para a inscrición permanecerá aberto desde as 9.00 horas do primeiro día hábil seguinte ao da publicación desta resolución no Diario Oficial de Galicia ata as 23.59 horas do día 3 de novembro de 2026.
6. Antes de que finalice o prazo de inscrición, as persoas solicitantes da Administración local e das universidades do Sistema universitario de Galicia deberán enviar ao correo electrónico novas.egap@xunta.gal a documentación acreditativa de ser empregado público e estar a prestar servizo nunha unidade de contratación da Administración local ou dalgunha das universidades do Sistema universitario de Galicia: cabeceira de nómina, toma de posesión ou certificado asinado por quen corresponda.
Serán excluídas as solicitudes das persoas solicitantes que non envíen en prazo a documentación requirida.
Poderá obterse calquera outra información a través do correo electrónico novas.egap@xunta.gal ou, desde as 9.00 ata as 14.00 horas, nos teléfonos 981 54 62 39 e 981 54 62 41.
Sétima. Comprobación de datos
1. Conforme o disposto no artigo 28.2 da Lei 39/2015, do 1 de outubro, do procedemento administrativo común das administracións públicas, para a tramitación do procedemento de selección consultaranse automaticamente os datos das persoas solicitantes desta acción formativa necesarios para realizar o proceso de selección, salvo que a persoa interesada se opoña a iso.
2. No caso de que a persoa interesada se opoña a esta consulta, deberá indicalo expresamente –incluíndo os motivos de oposición relacionados coa súa situación particular– e enviar os documentos que indiquen a súa situación administrativa, tipo de persoal e antigüidade na Administración a través do seguinte enderezo electrónico: novas.egap@xunta.gal
3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.
4. A EGAP poderá pedir as certificacións necesarias para realizar a selección de acordo cos criterios recollidos nesta convocatoria.
Oitava. Criterios de admisión e selección
A admisión levarase a cabo de acordo co indicado para as persoas destinatarias na base cuarta desta convocatoria. A orde de selección virá determinada pola data e a hora de presentación das solicitudes ata completar o número de prazas.
Novena. Publicación das listaxes de persoas seleccionadas, en reserva e excluídas
1. A EGAP publicará no enderezo web https://egap.xunta.gal as listaxes das persoas seleccionadas, en reserva, no caso de que o número de solicitudes sexa superior ao número de prazas e, de ser o caso, as persoas excluídas nesta actividade, de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas.
Décima. Cambios ou substitucións na selección, renuncia e asistencia
1. En ningún caso serán admitidos cambios ou substitucións entre as persoas seleccionadas.
2. Renuncia:
a) As persoas seleccionadas poderán renunciar á actividade formativa. A renuncia debe ser comunicada por correo electrónico dirixido a novas.egap@xunta.gal o antes posible e, en todo caso e como máximo, antes das 11.00 horas do día 5 de novembro de 2026, sen prexuízo do disposto no artigo 16.4 da Lei 39/2015, do 1 de outubro, do procedemento administrativo común das administracións públicas. Na páxina web da Escola está dispoñible un modelo de renuncia.
b) As persoas que incumpran o prazo previsto pasarán ao final das listas de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade, agás que a renuncia teña algunha das seguintes causas:
– Por causa de forza maior suficientemente acreditada.
– Por necesidades do servizo debidamente motivadas por parte das persoas responsables dos centros directivos.
– Por razóns de conciliación familiar.
– Por outras causas xustificadas documentalmente.
3. A asistencia e a puntualidade:
a) Serán obrigatorias a asistencia a todas as sesións presenciais do curso e a puntualidade.
b) Durante a actividade formativa realizaranse controis de asistencia e puntualidade.
c) As faltas de asistencia:
1. Non poden superar en ningún caso o 10 % das horas lectivas presenciais. En todo caso, as faltas de asistencia deberán xustificarse documentalmente, ante as persoas responsables da actividade formativa, nun prazo máximo de dez (10) días contados a partir do día da falta de asistencia. As persoas que incumpran o especificado anteriormente perderán o dereito ao certificado final desta actividade formativa.
2. Aquelas persoas cuxas faltas de asistencia superen o 50 % das horas lectivas pasarán ao final das listas de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.
Décimo primeira. Certificado electrónico de aproveitamento
Ao final desta actividade emitiráselles un certificado electrónico de aproveitamento, descargable desde a área de matrícula (https://egap.xunta.gal/matricula/), a aquelas persoas inscritas que cumprisen a asistencia mínima requirida do 90 % das horas lectivas presenciais. Este documento estará asinado electronicamente pola EGAP e incluirá, de forma expresa, o contido, a carga lectiva, a modalidade de impartición, as datas e o lugar de realización, así como un código de verificación electrónica (CVE) para contrastar a súa autenticidade.
Décimo segunda. Facultades da EGAP
1. A EGAP reserva para si a facultade de interpretar e de resolver as incidencias que poidan xurdir no desenvolvemento desta actividade, así como a facultade de cancelala se o escaso número de solicitudes non xustifica a súa realización, caso en que se empregarán os medios de notificación ás persoas interesadas, previstos na normativa vixente.
2. A EGAP garantirá, na acción derivada desta convocatoria, a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.
Santiago de Compostela, 23 de outubro de 2026
Sonia Rodríguez-Campos González
Directora da Escola Galega de Administración Pública
