A institución do Valedor do Pobo, creada pola Lei de Galicia 6/1984, do 5 de xuño, baseándose na habilitación contida no artigo 14 do Estatuto de autonomía de Galicia, comezou a súa andada no segundo trimestre do ano l990, durante a terceira lexislatura.
Á devandita institución correspóndelle, como garante dos dereitos fundamentais e das liberdades públicas recoñecidos na Constitución, dos dereitos individuais e colectivos emanados do Estatuto de autonomía de Galicia, especialmente os sancionados no título preliminar, supervisa-la actividade da Administración da Comunidade Autónoma, dos seus entes e empresas públicas ou dependentes, así como a da Administración local naquelas materias que son competencia da nosa Comunidade Autónoma.
A magnitude acadada pola Administración autonómica galega desde a data da posta en funcionamento desta institución, como consecuencia do traspaso de competencias transferidas desde a Administración xeral do Estado, aconsella proceder ó incremento do número dos vicevaledores, como órganos auxiliares deste alto comisionado, que permitan implementa-la eficacia da actuación desta institución e coadxuvar, en definitiva, ó cumprimento dos fins para os que foi creada.
Por todo o exposto, o Parlamento de Galicia aprobou e eu, de conformidade co artigo 13.2º do Estatuto de Galicia e co artigo 24 da Lei 1/1983, do 23 de febreiro, reguladora da Xunta de Galicia e do seu presidente, promulgo en nome de El-Rei a Lei pola que se modifica a Lei de Galicia 6/1984, do 5 de xuño, do Valedor do Pobo.
Artigo único.-Modifícanse os artigos 8 e 9.1 da Lei de Galicia 6/1984, do 5 de xuño, do Valedor do Pobo, modificada pola Lei 3/1994, do 18 de xullo, que quedan redactados nos seguintes termos:
«Artigo 8
O valedor do pobo estará auxiliado por ata un máximo de tres vicevaledores, nos que poderá delega-las súas funcións, e que o substituirán no exercicio destas conforme a orde que se estableza no seu nomeamento, segundo o disposto no artigo 5.4 desta lei».
«Artigo 9
1. A Comisión de Peticións, por iniciativa dos grupos parlamentarios, proporalle ó valedor do pobo o nomeamento dos vicevaledores. Correspóndelle ó valedor do pobo o seu nomeamento e mailo seu cesamento».
Disposición derradeira
Esta lei entrará en vigor o día seguinte ó da súa publicación no Diario Oficial de Galicia.
Santiago de Compostela, vinteseis de marzo de dous mil dous.
Manuel Fraga Iribarne
Presidente
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA