No ano 1992 aprobouse o vixente Plan forestal de Galicia (PFG), que contiña as liñas de acción da Administración galega en materia de política forestal cun horizonte de 40 anos e deseñaba tamén un modelo de monte para conseguir en períodos de oito quinquenios.
Vinte anos despois da aprobación do plan, a Lei 7/2012, do 28 de xuño, de montes de Galicia, regula nos artigos 72 e 73 o procedemento para a elaboración e modificación ou revisión do Plan forestal de Galicia como instrumento básico para o deseño e a execución da política forestal galega, así como o procedemento requirido para a súa aprobación.
Pasaron case 25 anos desde a aprobación daquel Plan forestal de Galicia de 1992 como modelo de referencia ata o momento, pero despois do tránsito de século variaron substancialmente tanto o escenario dos espazos e recursos forestais en Galicia, os riscos e ameazas, ou as dificultades, problemas e conflitos que se suscitan no ámbito forestal, como as necesidades, retos e oportunidades de futuro que se presentan para o sector forestal galego. En todo este tempo transcorrido mudaron de xeito considerable as circunstancias, demandas e tendencias en materia de política forestal, tanto en Galicia como no ámbito nacional e internacional, como para considerar conveniente e pertinente proceder á primeira revisión do Plan forestal de Galicia.
Unha vez pasada a primeira década e media do presente século XXI, é imprescindible analizar o cumprimento do Plan forestal de Galicia e o seu modelo de monte para proceder á súa adecuación ás novas circunstancias, demandas e tendencias emerxentes, tanto en Galicia como a nivel nacional e internacional.
O Plan forestal de Galicia concíbese como instrumento de planificación estratéxica da política forestal galega que debe establecer os obxectivos, as directrices e os programas de actuación necesarios para o seu desenvolvemento e a súa execución, segundo as necesidades, demandas, retos e oportunidades que se presentan actualmente para o monte e o sector forestal galego, de acordo cos novos compromisos, requirimentos e tendencias emerxentes en materias de biodiversidade, cambio climático e desenvolvemento rural, no contexto actual sobre emprego e economía verde baixa en carbono existente no ámbito estatal e internacional a nivel mundial e paneuropeo e, en particular, da Unión Europea.
Con tal finalidade, en principio a revisión do Plan forestal de Galicia pretende suscitar a consecución dos seguintes obxectivos xerais da política forestal galega:
– Harmonizar e equilibrar as múltiples funcións, servizos e beneficios dos sistemas forestais para a satisfacción das diversas demandas ambientais, económicas e sociais, de acordo co principio universal de sustentabilidade e multifuncionalidade.
– Proporcionar o marco territorial, sectorial e estrutural necesario para conseguir unha actividade forestal competitiva e facilitar procesos viables dentro dos novos modelos de bioeconomía verde e consumo responsable, de maneira que permitan harmonizar o valor ambiental e socioeconómico dos montes.
– Crear o escenario normativo, administrativo, financeiro e fiscal propicio para xerar oportunidades de actividade económica e emprego no monte e no sector forestal galego, de modo que permitan emprender iniciativas empresariais e contribuír a paliar a actual crise económica, social e ambiental no medio rural.
– Procurar un desenvolvemento socioeconómico sustentable, intelixente e estable no medio rural, de xeito que a política forestal permita contribuír tanto ao desenvolvemento rural sustentable como á conservación e protección do ambiente e mellora da calidade de vida.
– Incorporar a programación da política forestal galega ao novo período de financiamento Feader da Unión Europea e establecer iniciativas e medidas de fomento para a mellora da produtividade e rendibilidade dos recursos forestais, a dinamización socioeconómica do monte e o sector forestal galego, no marco da aplicación do novo Plan de desenvolvemento rural (PDR) en Galicia para o período 2014-2020.
Correspóndelle á Consellería do Medio Rural a formulación da primeira revisión do Plan forestal de Galicia, de acordo coas súas propias competencias, a través da Dirección Xeral de Ordenación e Produción Forestal, como órgano promotor competente, na cal poderán colaborar outras consellerías, por razón de materia e coordinación institucional doutras políticas sectoriais relacionadas coa política forestal de Galicia.
Mediante esta resolución, en cumprimento do artigo 21.1 daLei 10/1995, do 23 de novembro, de ordenación do territorio de Galicia, faise público que o Consello da Xunta de Galicia, na súa reunión do día 9 de xuño de 2016, adoptou o seguinte acordo:
Primeiro. Iniciar o procedemento para a formulación e aprobación da primeira revisión do Plan forestal de Galicia, de conformidade co disposto no artigo 21 da Lei 10/1995, do 23 de novembro, de ordenación do territorio de Galicia, e no artigo 72.3 da Lei de montes de Galicia.
Segundo. Proceder á publicación deste acordo no Diario Oficial de Galicia e na páxina web da Consellería do Medio Rural.
Terceiro. Establecer o prazo dun mes, desde a publicación deste acordo, para a formulación do documento previo de revisión do Plan forestal de Galicia.
Cuarto. Encomendar á Consellería do Medio Rural a elaboración da primeira revisión do Plan forestal de Galicia e o impulso e a dirección do procedemento para a súa aprobación.
Santiago de Compostela, 10 de xuño de 2016
Tomás Fernández-Couto Juanas
Director xeral de Ordenación e Produción Forestal