Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 160 Xoves, 25 de agosto de 2016 Páx. 37876

III. Outras disposicións

Escola Galega de Administración Pública

RESOLUCIÓN do 6 de agosto de 2016 pola que se convoca un curso sobre a reforma do procedemento administrativo común das administracións públicas e do réxime xurídico do sector público e a súa incidencia no funcionamento das institucións de control externo para persoal do Consello de Contas de Galicia.

De acordo co Convenio de colaboración subscrito con data do 23 de febreiro de 2016, entre a Escola Galega de Administración Pública (en diante EGAP) e o Consello de Contas de Galicia para o desenvolvemento de actividades de formación, divulgación e investigación, convócase o seguinte curso titulado A reforma do procedemento administrativo común das administracións públicas e do réxime xurídico do sector público e a súa incidencia no funcionamento das institucións de control externo (CV16034).

RESOLVO:

Publicar a convocatoria do seguinte curso titulado A reforma do procedemento administrativo común das administracións públicas e do réxime xurídico do sector público e a súa incidencia no funcionamento das institucións de control externo, que deberá desenvolverse segundo as bases detalladas no anexo.

Santiago de Compostela, 6 de agosto de 2016

Sonia Rodríguez-Campos González
Directora da Escola Galega de Administración Pública

ANEXO

Primeira. Obxectivos

O obxectivo do curso é profundar nas principais novidades da reforma do procedemento administrativo común das administracións públicas e do réxime xurídico do sector público e a súa incidencia no funcionamento das institucións de control externo.

Segunda. Contido

1. Algunhas consideracións previas sobre as leis 39/2015 e 40/2015. Principais características e novidades máis relevantes respecto da lexislación anterior. Ámbito de aplicación, principios xerais e entrada en vigor.

2. Principios e réxime dos órganos administrativos. En especial, os órganos colexiados. A organización da Administración xeral do Estado. A reconfiguración do sector público institucional estatal.

3. O funcionamento electrónico das administracións públicas. A tramitación electrónica dos procedementos administrativos. Identificación e sinatura electrónica dos interesados. Os rexistros electrónicos. Os documentos electrónicos e as súas copias. O expediente electrónico.

4. A nova configuración do procedemento administrativo común. Aplicación aos órganos de control externo.

5. O acto administrativo. Eficacia e execución. A notificación. Réxime do silencio administrativo. Termos e prazos.

6. A nulidade e a anulabilidade dos actos administrativos. A revisión dos actos en vía administrativa. Os recursos administrativos.

7. A responsabilidade patrimonial das administracións públicas. Supostos, requisitos e procedemento para o recoñecemento desta.

8. Réxime dos convenios e relacións interadministrativas. En especial, a coordinación da actividade dos órganos de control externo autonómicos co Tribunal de Contas.

9. A elaboración das normas e a garantía da calidade normativa.

10. A potestade sancionadora da Administración. Os principios da potestade sancionadora. O procedemento sancionador.

Terceira. Destinatarios

Persoal do Consello de Contas de Galicia.

Cuarta. Desenvolvemento

Nº de edicións: unha.

Duración: 20 horas.

Prazas: 50.

Lugar: Escola Galega de Administración Pública, rúa Madrid, 2-4.

Datas: 15, 16, 22, 23 e 30 de setembro de 2016.

Horario: das 8.30 ás 10.30 e das 11.00 ás 13.00 horas.

Realizarase una proba final presencial de avaliación do aproveitamento do curso o día 30 de setembro.

Quinta. Solicitudes e prazos

1. O prazo de presentación de solicitudes será desde o día 26 de agosto ao 5 de setembro de 2016.

2. As solicitudes de participación nas actividades formativas só se poderán realizar mediante o formulario de matrícula telemática dispoñible no enderezo <http://egap.xunta.es/matricula> desde as 8.00 horas da data de inicio do prazo de presentación de solicitudes e ata as 12.00 horas da data de finalización. As solicitudes entenderanse presentadas unha vez que se complete correctamente o proceso de matriculación.

3. Serán excluídas automaticamente aquelas solicitudes que non se axusten ao formulario de solicitude, non teñan cubertos correctamente os datos precisos para a realización do proceso de selección ou sexan presentadas fóra de prazo.

4. As persoas que oculten ou falseen datos esenciais para a selección serán automaticamente excluídas das actividades solicitadas e pasarán ao final das listas de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.

5. As persoas interesadas en recibir mensaxes sobre o proceso de selección deberán facilitar un enderezo de correo electrónico e/ou un número de teléfono móbil.

6. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través dos números de teléfono 981 54 62 57, 981 54 62 54, 987 54 63 35 e do enderezo de correo electrónico <xestion.egap@xunta.es>.

Sexta. Criterios de selección

Orde de inscrición.

Sétima. Publicación das relacións do alumnado seleccionado

A EGAP publicará no enderezo <http://egap.xunta.es> unha relación das persoas seleccionadas para participar no curso, así como un número adecuado de reservas.

Entenderase que as persoas que non figuren na relación foron excluídas por algunha das razóns expresadas nas bases da convocatoria ou ocupan un posto máis afastado na listaxe de agarda, todo isto de acordo co disposto no artigo 59.6.b) da Lei de réxime xurídico das administracións públicas e do procedemento administrativo común.

Oitava. Facultades da EGAP

1. A EGAP e o Consello de Contas de Galicia poderán modificar o desenvolvemento, as datas e os lugares da actividade formativa, así como resolver todas as continxencias que poidan xurdir.

2. No suposto de que o número de admitidos sexa inferior ao 50 % das prazas convocadas, a EGAP e o Consello de Contas de Galicia resérvanse o dereito a suspender, cancelar ou agrupar varias edicións das actividades, caso no que empregará os medios de notificación ás persoas interesadas previstos na normativa vixente.

3. A EGAP e o Consello de Contas de Galicia garantirán na totalidade das actividades derivadas desta convocatoria a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.

Novena. Certificados

Ao remate do curso terán dereito á expedición dun certificado de aproveitamento aqueles alumnos inscritos que participasen asiduamente e sempre que a súa asistencia fose igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización do curso e o selo oficial da institución.