Medio Ambiente inviste 930.000 de euros nas obras que eviten os asolagamentos no concello de Valga

A conselleira de Medio Ambiente e Ordenación do Territorio, Beatriz Mato, asinou un convenio de colaboración neste sentido co alcalde da localidade

As obras consistirán en canalizar o río Soutiño, entre a estrada PO-548 e a confluencia co río Valga

Esta actuación está prevista no Plan de xestión de riscos de inundación como medida de natureza estrutural

Santiago, 27 de agosto de 2016
  • whatsapp whatsapp

A conselleira de Medio Ambiente e Ordenación do Territorio, Beatriz Mato, e o alcalde de Valga, José María Bello Maneiro, asinaron un convenio de colaboración para a execución dunha actuación que solucione os problemas de asolagamento neste concello e que prevé un importe de 930.000 euros

A actuación que se levará a cabo en base a dito convenio enmárcase como parte das medidas de natureza estrutural previstas no Plan de xestión de riscos de inundación elaborado por Augas de Galicia para a demarcación Galicia-Costa.

Na actualidade, a contorna do río Soutiño, na Devesa, ata a confluencia co río Valga, preto da desembocadura do Ulla, é unha zona asolagable, onde Augas de Galicia xa realizou diversas actuacións e canalizacións para previr estes episodios extremos. Esta actuación pretende acometer a última fase das melloras nos ríos Valga e Soutiño.

En definitiva, trátase de canalizar o río Soutiño, entre a estrada PO-548 e a confluencia co río Valga, diferenciando tres treitos: o Tramo 1: Desde o ferrocarril ata o tramo xa canalizado na fase I; o Tramo 2: Augas debaixo do tramo xa canalizado ata a estrada onde se coloca un novo marco, con capacidade suficiente para a avenida de 100 anos de período de retorno; e o Tramo 3: Ensánchase a canle na zona situada tras as casas, onde se construíron muros e galpóns a carón do río, reducindo a anchura da canle na actualidade a menos dun metro nalgúns puntos.

As obras tamén incluirá a prolongación da defensa da marxe esquerda nun pequeno tramo do río Valga, nuns 70 m de lonxitude (a marxe dereita xa se atopa canalizada) e a demolición do azude existente (feito con perpiaños) e prolongación da condución de toma existente que alimenta ao muíño ao longo da canle en 155 metros.

Imaxes relacionadas
Data de actualización: 27/08/2016