A Lei orgánica 1/1990, do 3 de outubro, de ordenación xeral do sistema educativo, establece na súa disposición derradeira primeira, apartado 2, que as Comunidades Autónomas que teñen recoñecida competencia para iso nos seus respectivos estatutos de autonomía, ou nas leis orgánicas de transferencias, poderán desenvolvela.

O artigo 31 do estatuto para Galicia atribúe a competencia plena desta Comunidade Autónoma para o regulamento e administración do ensino en toda a súa extensión, niveis e graos, modalidades e especialidades.

Establecido o currículo de bacharelato para a Comunidade Autónoma galega polo Decreto 275/1994, do 29 de xullo, e co fin de lle dar continuidade á implantación gradual das ensinanzas do novo sistema educativo procede arbitra-las medidas de ordenación académica que permitan a implantación anticipada do bacharelato en centros docentes desta comunidade.

Pola presente orde regúlanse as condicións de acceso, as medidas de promoción e titulación dos alumnos e alumnas, os horarios lectivos dos distintos cursos, a optatividade e as instruccións para regula-lo proceso de elaboración do proxecto curricular de centro.

En consecuencia co exposto anteriormente, a Consellería de Educación e Ordenación Universitaria facendo uso das competencias que ten atribuídas,

DISPÓN:

Artigo 1.-ÁMBITO DE APLICACIÓN. A presente orde será de aplicación nos centros dependentes da Consellería de Educación e Ordenación Universitaria que sexan autorizados para implantar con carácter anticipado as ensinanzas do bacharelato definidas polo Decreto 275/1994, do 29 de xullo.

Artigo 2.-ACCESO DOS ALUMNOS.

1.-Poderán acceder ó primeiro curso das novas ensinanzas do bacharelato, en calquera das súas modalidades, os alumnos que reúnan calquera dos requisitos que a continuación se sinalan:

a) Posuí-lo título de graduado en educación secundaria.

b) Ter superados os estudios do primeiro ciclo do programa experimental de reformadas ensinanzas medias (REM).

c) Posuí-lo título de técnico auxiliar de formación profesional de primeiro grao.

d) Ter aprobado o segundo curso do bacharelato unificado e polivalente ou con dúas materias non superadas como máximo.

e) Ter superados os cursos comúns dos estudios de artes aplicadas e oficios artísticos.

2.-Poderán acceder directamente ás modalidades que se determinen os alumnos que obtiveran o título de técnico tras cursa-la formación profesional específica de grao medio.

3.-Os alumnos que accedan ó bacharelato desde os ciclos formativos de grao medio e, se é o caso, desde os módulos profesionais de nivel 2 e desexen validar algunhas das materias cursadas, deberanlle solicitar á Dirección Xeral de Ordenación Educativa e Centros a correspondente validación, presentando unha certificación académica oficial dos estudios realizados.

Artigo 3.-MATRÍCULA DOS ALUMNOS.

1.-Os alumnos dos centros que anticipen o bacharelato non estarán sometidos a novo proceso de admisión.

2.-A matricula formalizarase para unha das modalidades do bacharelato.

3.-Terán prioridade para acceder ás prazas de bacharelato que oferten os centros os alumnos do propio centro que no curso anterior obtiveran o título de graduado en educación secundaria.

Artigo 4.-CAMBIO DE MODALIDADE. En relación co disposto no artigo 26 do Decreto 275/1994, do 29 de xullo, as condicións nas que un alumno que cursou o primeiro ano de bacharelato, nunha determinada modalidade poida pasar ó segundo nunha modalidade distinta serán as seguintes:

1.-Os alumnos deberán cursa-las materias comúns do segundo curso, e, se é o caso, as de primeiro que non superasen.

2.-Deberán cursar, ademais, as materias propias

da nova modalidade, tanto as de 1º como as de 2º, exceptuando aquelas que, por coincidir en ambas modalidades, xa as aprobasen no primeiro curso da modalidade que abandonan.

3.-Computaranse como materias optativas da nova modalidade: a optativa cursada e superada en primeiro, así como as materias propias da modalidade que se abandona cursadas e aprobadas en primeiro, e non coincidentes coas materias propias da nova modalidade.

Artigo 5.-PERMANENCIA.

1.-Os alumnos poderán permanecer escolarizados no bacharelato, en centros públicos ou privados, durante catro cursos académicos. Os alumnos que esgoten este prazo poderán remata-los estudios de bacharelato por algún dos procedementos previstos no artigo 53 da Lei orgánica 1/1990, do 3 de outubro, de ordenación xeral do sistema educativo.

2.-Coa finalidade de non esgota-los anos previstos no apartado anterior os alumnos poderán solicita-la anulación da matrícula ó director do centro, antes de remata-lo mes de abril, cando concorran circunstancias de enfermidade prolongada de carácter físico ou psíquico, prestación de servicio militar ou servicio social substitutorio, incorporación a un posto de traballo ou obrigas de tipo familiar que impidan a normal dedicación ós estudios.

As solicitudes de anulación de matrícula serán resoltas pola dirección do centro.

Artigo 6.-AXUSTE DE RATIOS. O número máximo de alumnos por aula será de 35, sen prexuízo do disposto na Orde do 6 de maio de 1992 (DOG do 21), pola que se establece o calendario de axuste dos centros educativos de niveis non universitarios ás ratios fixados na Lei orgánica de ordenación xeral do sistema educativo, agás no suposto do incremento de ratios derivado da repetición dalgúns alumnos.

Artigo 7.-PROXECTO CURRICULAR.

l.-Os centros educativos desenvolverán e concretarán o currículo da etapa aprobado polo Decreto 275/1994, do 29 de xullo, mediante o proxecto curricular e tomando como referente o proxecto educativo de centro.

2.-O proxecto curricular deberá conter:

a) A organización dos itinerarios propostos en cada unha das modalidades impartidas no centro.

b) A determinación das materias optativas que ofrece o centro.

c) A adecuación dos obxectivos xerais da etapa ó contexto socioeconómico e cultural do centro e ás características dos alumnos e das alumnas.

d) A contextualización dos obxectivos xerais de cada materia e a concreción dos contidos que posibilitan a súa consecución.

e) As decisións sobre a organización dos contidos que contemplen o tratamento coordinado das distintas materias.

f) A distribución, para cada materia que se imparte en ámbolos dous cursos, dos obxectivos por curso e a secuencia e distribución dos contidos e dos criterios de avaliación para cada un dos cursos. Para isto teranse en conta as decisións tomadas nos apartados d) e e).

g) Os criterios metodolóxicos de carácter xeral e os específicos das materias.

h) As decisións sobre o proceso de avaliación que comprenderá os procedementos para avalia-la progresión dos alumnos na aprendizaxe e os criterios de cualificación.

i) As decisións sobre as características e o tipo de informes que se utilizarán para transmiti-la información que se desprende da avaliación.

l) Os criterios para avaliar e para, se é o caso, revisa-los procesos de ensino e a práctica docente.

m) As orientacións xerais para incorporar a través das distintas materias os contidos da educación para a paz, para a saúde e a calidade de vida, para a igualdade entre os sexos, a educación ambiental, a educación sexual, a educación do consumidor, a educación para o lecer e a educación vial.

n) Os materiais curriculares e os recursos didácticos básicos que se van utilizar e os criterios metodolóxicos que sustentan a súa elección.

ñ) As liñas principais de orientación académica e profesional e o plan titorial que o centro vai desenvolver.

3.-Nos institutos de educación secundaria existirá unha comisión de coordinación pedagóxica que estará integrada polo director, que será o seu presidente, o xefe ou xefes de estudios, os xefes de departamento ou seminario e, se é o caso, os coordinadores de familias profesionais e o responsable do servicio de orientación.

4.-

4.1.-A comisión de coordinación pedagóxica organizará o proceso de elaboración, seguimento e avaliación do proxecto curricular de centro, propoñendo ó claustro de profesores para a súa aprobación as previsións relativas ó calendario de actuacións. Esta comisión responsabilizarase da redacción do proxecto curricular.

4.2.-Os equipos docentes dos centros, ó inicio do proceso de elaboración do proxecto curricular, elaborarán unha primeira proposta do mesmo que inclúa, polo menos, os epígrafes a, b, f, h e n do apartado 2 do artigo 7.

4.3.-Os centros remitirán ó Servicio Provincial de Inspección, unha vez aprobado polo claustro, o calendario de actuacións e as medidas organizativas, e a primeira proposta do proxecto curricular como anexo á programación xeral anual.

Ó longo do curso irase desenvolvendo a primeira proposta e completándoa coas restantes decisións que configuran o proxecto curricular.

4.4.-Os centros que teñan iniciada a elaboración do proxecto curricular remitirán ó Servicio Provin

cial de Inspección, logo de aprobación polo claustro, unha adecuación do traballo realizado ó disposto no apartado 2 deste artigo, xunto co calendario de actuacións previstas e as medidas organizativas como anexo á programación xeral anual.

Ó longo do curso irase completando e desenvolvendo o traballo realizado coas restantes decisións que configuran o proxecto curricular.

4.5.-Durante o proceso de elaboración ou revisión do proxecto curricular levantarase acta de cada unha das reunións que se celebren, facendo consta-los acordos parciais e as decisións acadadas. As actas gardaranse na secretaría do centro.

4.6.-Os centros educativos irán completando e revisando anualmente o proxecto curricular tendo en conta os datos que aporta a súa aplicación nas aulas. O proxecto curricular de centro debe garantir que, ó finaliza-la etapa, se contemplan tódolos aspectos establecidos no Decreto 275/1994, do 29 de xullo (DOG do 31 de agosto de 1994).

4.7.-O Servicio Provincial de Inspección en relación co proxecto curricular de centro desenvolverá as seguintes funcións:

-Revisa-la primeira proposta do proxecto curricular, tendo en conta o seu carácter provisional. Comprobar que se axusta á normativa vixente e formula-las recomendacións que considere oportunas.

-Realizar ó longo do curso un seguimento do proceso de elaboración ou de revisión do proxecto curricular, propoñendo e facilitando, de se-lo caso, os apoios necesarios para a súa adecuada realización.

-Supervisa-lo proxecto curricular, tendo en conta o seu carácter dinámico e comprobando o seu axuste á normativa vixente e comunicarlle ó centro as consideracións que coide oportunas.

4.8.-Os centros de formación continuada do profesorado apoiarán os centros no proceso de elaboración e revisión dos proxectos curriculares. Para realiza-los devanditos apoios os Servicios Provinciais de Inspección priorizarán as actuacións que se levarán a cabo, aplicando os criterios decididos conxuntamente cos centros de formación continuada do profesorado.

5.-Proxecto curricular, resultado do traballo de revisión realizado ó longo de cada curso e que contemplará, se é o caso, as decisións relativas á súa modificación, será aprobado polo claustro de profesores e remitirase ó Servicio Provincial de Inspección como anexo á memoria anual de curso.

Artigo 8.-SEMINARIOS OU DEPARTAMENTOS.

1.-Cada seminario ou departamento realizará o seu proxecto didáctico que contribuirá á elaboración do proxecto curricular coa toma de decisións específicas da súa materia en relación ós apartados e, f, g, h, 1, m do punto 2 do artigo 7, respectando sempre as decisións de carácter xeral acordadas previamente polo equipo docente.

2.-Así mesmo cada seminario ou departamento pro

gramará as actividades de recuperación para os alumnos con materias pendentes que formarán parte do seu proxecto didáctico.

Artigo 9.-ACCIÓN TITORIAL.

1.-O profesor titor exercerá as seguintes funcións:

a) Participar no desenvolvemento do plan titorial e nas actividades de orientación, baixo a coordinación do xefe de estudios e en colaboración co responsable do servicio de orientación.

b) Realiza-lo seguimento dos procesos de ensino-aprendizaxe.

c) Atender e, no posible, anticiparse ás dificultades máis xerais da aprendizaxe dos alumnos, así como ás súas necesidades educativas específicas.

d) Organizar e presidi-las sesións de avaliación do seu grupo, coordinando as informacións que os profesores posúen dos alumnos e das alumnas.

e) Informa-los alumnos, os profesores e os pais de todo aquilo relacionado coa actividade docente e co rendemento académico.

f) Asesora-los alumnos sobre as posibles orientacións académicas e profesionais.

g) Facilita-la integración do alumno no grupo e no centro e fomenta-lo desenvolvemento de actitudes participativas.

h) Contribuír á cooperación educativa entre os profesores e os pais dos alumnos.

2.-No plan titorial incluído no proxecto curricular establecerase o marco espacio-temporal axeitado para o seu desenvolvemento.

Artigo 10.-DISTRIBUCIÓN DAS MATERIAS. A distribución das materias nos dous cursos da etapa, e co horario asignado a cada unha, establécense no anexo I desta orde.

Artigo 11.-ITINERARIOS FORMATIVOS. Os centros organizarán as materias propias de modalidade e optativas de cada curso en itinerarios formativos, tendo en conta as preferencias dos alumnos, orientadas ás diferentes opcións de estudios universitarios e, se é o caso, ós ciclos formativos de grao superior, segundo o modelo que se establece no anexo II.

Artigo 12.-MATERIAS OPTATIVAS.

1.-A oferta de materias optativas no bacharelato, deberá servir para desenvolve-los obxectivos xerais da etapa, amplia-las posibilidades de elección de estudios superiores e para facilita-la orientación profesional dos alumnos.

2.-Os alumnos cursarán unha materia optativa no primeiro curso do bacharelato e dúas no segundo, elixidas entre as que ofreza o centro.

3.-As materias optativas que poderán ofrece-los centros serán as seguintes:

a) Materias optativas para tódalas modalidades de bacharelato: segunda lingua estranxeira e música.

b) Materias optativas vinculadas a cada modalidade.

Modalidade de artes: xeometría da arte, taller artístico I, taller artístico II, volume II.

Modalidade de ciencias da natureza e da saúde: xeoloxía e métodos estatísticos e numéricos.

Modalidade de humanidades e ciencias sociais: literatura galega, grego II, historia e xeografía de Galicia, introducción ás ciencias políticas e socioloxía, ética e filosofía do dereito, literaturas hispánicas e literatura universal contemporánea.

Modalidade de tecnoloxía: xeoloxía e métodos estatísticos e numéricos.

c) Materias propias da modalidade que se cursa non incluídas entre as que compoñen o itinerario elixido polos alumnos e alumnas e, sempre que a organización do centro o permita, as materias propias dunha modalidade distinta da cursada.

4.-O número de materias optativas irase ampliando a medida que vaian aprobándose os ciclos formativos de grao superior. O currículo das materias propias de modalidade que se cursen como optativas será o establecido no Decreto 275/1994, do 29 de xullo. O currículo das restantes materias optativas será establecido pola Dirección Xeral de Ordenación Educativa e Centros.

5.-As ensinanzas de materias optativas que oferten os centros só poderán ser impartidas se existe un número mínimo de quince alumnos matriculados.

6.-Excepcionalmente, a Dirección Xeral de Ordenación Educativa e Centros, logo de informe da Delegación Provincial e dos Servicios Provinciais da Inspección, poderá autoriza-la impartición de materias optativas a un número menor de alumnos do establecido con carácter xeral, cando as peculiaridades do centro o requiran ou circunstancias especiais así o aconsellen.

Artigo 13.-ENSINANZA RELIXIOSA.

1.-A materia de relixión católica será de oferta obrigatoria para os centros e de carácter voluntario para o alumnado.

2.-Do mesmo xeito e en aplicación do disposto na disposición adicional segunda da Lei orgánica 1/1990, do 3 de outubro, de ordenación xeral do sistema educativo para as ensinanzas relixiosas doutras confesións relixiosas estarase ó disposto nos acordos asinados polo Estado español en cada unha delas.

3.-Ó formaliza-la matrícula, os pais, nais ou titores dos alumnos, ou estes mesmos se fosen maiores de idade, manifestarán, voluntariamente, á dirección do centro a súa opción, sen prexuízo de que esta se poida modificar ó comezo de cada curso escolar.

4.-Para os alumnos e as alumnas que non opten por seguir ensinanzas de relixión os centros organizarán actividades de estudio alternativas, como ensinanzas complementarias, no mesmo horario que as ensinanzas de relixión.

A Dirección Xeral de Ordenación Educativa e Cen

tros determinará regulamentariamente as devanditas actividades.

Disposicións adicionais

Primeira.-Nos centros educativos nos que a implantación do novo bacharelato supoña a extinción paulatina das ensinanzas do bacharelato unificado e polivalente, da formación profesional de segundo grao ou do segundo ciclo experimental da reforma das ensinanzas medias, incorporaranse ó primeiro curso das novas ensinanzas de bacharelato os alumnos que deban repeti-lo primeiro curso de formación profesional de segundo grao polo réxime de ensinanzas especializadas, o curso de acceso ou o primeiro curso de segundo ciclo experimental.

Segunda.-Os centros poderán establecer grupos de alumnos repetidores nos cursos terceiro de bacharelato unificado e polivalente, curso de orientación universitaria, primeiro e segundo de formación profesional de segundo grao polo réxime xeral, segundo e terceiro curso de formación profesional de segundo grao do réxime de ensinanzas especializadas ou segundo curso do segundo ciclo experimental da reforma das ensinanzas medias, coa finalidade de facilita-la culminación dos estudios e a obtención dos títulos correspondentes, sempre que o número de alumnos por grupo sexa superior a 15.

Terceira.-Sen prexuízo do establecido na disposición anterior, os alumnos poderán incorporarse, se o desexan, ás novas ensinanzas do bacharelato no curso que lles corresponda conforme se establece no anexo III.

Disposición derradeira única

Autorízase o director xeral de Ordenación Educativa e Centros para dicta-las disposicións que sexan precisas para a aplicación do disposto nesta orde.

Santiago de Compostela, 16 de febreiro de 1995.

Juan Piñeiro Permuy

Conselleiro de Educación e Ordenación

Universitaria

Sr. Director Xeral de Ordenación Educativa e Centros