O artigo 6º, capítulo 1º do título II da Lei 13/1991, do 9 de decembro, de taxas, prezos e exaccións reguladoras da Comunidade Autónoma de Galicia, establece que os prezos privados serán fixados pola consellería correspondente atendendo ás condicións e circunstancias do mercado no que operen.

A Consellería de Cultura, a través do Centro Galego de Artes da Imaxe, vén desenvolvendo distintas actividades prestando unha serie de servicios a profesionais e ó público en xeral, destacando a realización de programación da exhibición das artes da imaxe na sala de proxección nos locais do devandito centro e onde é de destaca-la asistencia de público novo e estudiante, polo que se fai preciso regula-la percepción de prezos privados.

Por todo isto.

DISPOÑO:

Artigo 1º

Terán dereito a unha reducción do 50% no prezo da entrada os titulares do carné xove e equiparables, carné de estudiante e os correspondentes internacionais.

Esta reducción non será de aplicación ó importe dos abonos para dez sesións.

Artigo 2º

Para efectos do disposto na orde da Consellería de Economía e Facenda do 29 de xuño de 1994 pola que se regula o procedemento de recadación voluntaria de taxas e prezos da Comunidade Autónoma de Galicia, o código dos ingresos fixados na presente orde será o 362200.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 27 de febreiro de 1995.

Víctor Manuel Vázquez Portomeñe

Conselleiro de Cultura

Sr. Director Xeral de Cultura