De acordo co establecido no artigo 20.1 do Estatuto de autonomía de Galicia, en coherencia co artigo 149.1.7 da C.E., así como co mandado constitucional de realizar unha política orientada ó pleno emprego recollido no artigo 41.1, e tendo en conta a grave situación de desemprego que afecta a nosa Comunidade Autónoma, faise necesario o establecemento de medidas que comporten a creación de postos de traballo.

A Unión Europea coa finalidade de intentar palia-la elevada taxa de desemprego na Comunidade, a través do Fondo Social Europeo, prevé, entre outras medidas, o cofinanciamento xunto con diversos poderes públicos dos estados membros de programas tendentes á consecución do emprego.

Coa mesma finalidade, o Consello da Xunta aprobou no seu acordo do vinteún de abril de mil novecentos noventa e catro o Plan de Emprego Xuvenil, como medida de choque ó alto índice de desemprego.

O devandito plan establece, entre outras medidas, a posibilidade de celebrar contratos de traballo en empregos non productivos para actuacións de interese social, co obxectivo de crear postos de traballo, así como incentiva-la contratación por parte das corporacións locais, de servicios públicos de interese social con entidades de economía social dirixidas e constituídas integramente por mozos menores de 30 anos.

Para a posta en marcha dos proxectos presentados ante o citado fondo, e unha vez aprobado o texto definitivo do Plan de Emprego xuvenil, é preciso dicta-las normas que regulen a concesión destas axudas, con cargo ós orzamentos xerais da Comunidade Autónoma galega para 1995 e cos fondos reflectidos no Marco Comunitario de Apoio da Unión Europea a través do Fondo Social Europeo.

Na súa virtude, en uso das facultades que teño atribuídas, e para a debida aplicación dos créditos orzamentarios para o fin para o que foron establecidos,

DISPOÑO:

Artigo 1º.-

1. A presente orde ten por obxecto o establecemento dos seguintes programas do Plan Galego de Emprego Xuvenil, que desenvolverá durante o presente exercicio económico de 1995 a Consellería de Familia, Muller e Xuventude e que se indican a continuación:

-Creación de empregos suplementarios.

-Contratación de servicios públicos con empresas de economía social constituídas por mozos.

2. Esta convocatoria financiarase con cargo ás aplicacións orzamentarias 14.04.222A.460 e

14.04.222A.760 dos orzamentos xerais desta Comunidade Autónoma para 1995 e cos fondos establecidos no marco comunitario de apoio da CEE, a través do Fondo Social Europeo.

3. As solicitudes, tramitación e concesión das axudas obxecto da presente orde axustaranse ó disposto no Decreto 52/1994, do 4 de marzo.

CAPÍTULO PRIMEIRO

PROGRAMA DE CREACIÓN DE

EMPREGOS SUPLEMENTARIOS

Artigo 2º.-Obxecto

O obxecto da presente orde é a promoción directa do emprego, subvencionando o custo salarial de accións que creen postos de traballo en empregos non productivos para actuación de interese social.

Artigo 3º.-Beneficiarios

Poderán ser beneficiarias as entidades públicas galegas, así como as entidades sen ánimo de lucro que non estean constituídas por entidades con ánimo de lucro, da Comunidade Autónoma de Galicia, para a realización de obras ou servicios de interese social.

Artigo 4º.-Requisitos

1. Os contratos poderán ser realizados con desempregados maiores ou menores de 25 anos, debendo ser a xornada completa e cunha duración de, polo menos, seis meses, tendo como tope máximo o do exercicio orzamentario de 1995.

2. As tarefas que se van realizar ó abeiro desta contratación deberán favorece-la inserción ou reinserción profesional dos contratados.

3. As entidades beneficiarias quedarán sometidas ó cumprimento das instruccións que, para o desenvolvemento das obras ou servicios de carácter social que se van realizar, dicte no momento da resolución de concesión o órgano competente.

Artigo 5º.-Axudas

1. A contía da axuda, no exercicio de 1995, poderá alcanzar ata un máximo de 100.000 ptas. mensuais e terá a consideración de custo salarial bruto.

2. Os beneficios previstos na presente orde non poderán dar lugar a un financiamento que exceda dos gastos salariais pertinentes, polo que será obxecto de reducción cando o custo salarial bruto resulte inferior á axuda determinada.

3. O tope máximo de subvención por entidade non excederá de 1.800.000 ptas.

4. No momento de conceder estas axudas, de tratarse de concellos, terase en conta o seu número de habitantes e a súa taxa de desemprego.

Artigo 6º.-Solicitudes.

As solicitudes dirixiranse ó delegado provincial da Consellería de Familia, Muller e Xuventude da provincia en que radique o centro de traballo para o que se solicita subvención, e presentaranse por

triplicado no rexistro xeral das respectivas delegacións provinciais da Consellería de Familia, Muller e Xuventude, ou na forma prevista no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, acompañadas, se é o caso, da seguinte documentación:

a) Copia auténtica do DNI da persoa que asina a solicitude e, se é o caso, poder bastante para actuar en nome da sociedade debidamente inscrito no Rexistro Mercantil.

b) Fotocopia compulsada do NIF.

c) Ficha de transferencia bancaria, en modelo oficial, que será facilitada nas respectivas delegacións provinciais.

d) Certificado bancario de existencia de conta.

Artigo 7º.-Prazo

1. O prazo de presentación de solicitudes rematará o 15 de maio, reabríndose sucesivamente cantas veces fosen necesarias ata esgota-lo crédito orzamentario dedicado ó financiamento das citadas axudas.

2. Se a solicitude tivese algún defecto ou non se presentase algún dos documentos preceptivos, no prazo de 10 días requirirase o interesado para que no prazo doutros 10 días emende os defectos ou falta observada, advertíndoo de que, no caso contrario, será arquivada a súa solicitude sen máis trámite.

CAPÍTULO SEGUNDO

CONTRATACIÓN DE SERVICIOS PÚBLICOS

CON EMPRESAS DE ECONOMÍA SOCIAL

CONSTITUÍDAS POR MOZOS

Artículo 8º.-Obxecto

1. O obxecto deste programa é proporcionar axudas ás corporacións locais, para incentiva-la contratación por parte destas, de servicios públicos de interese social con entidades de economía social dirixidas e constituídas integramente por mozos menores de 30 anos.

2. Para os efectos do disposto no presente artigo entenderase por servicios públicos de interese social aqueles que redunden nunha mellora da calidade de vida e atención ó cidadán especialmente no ámbito rural, e por empresas de economía social, as cooperativas de traballo asociado, as sociedades anónimas laborais e os autónomos, sempre e cando sexan menores de 30 anos e teñan contratados como traballadores por conta allea, polo menos, dous menores de 30 anos.

Artigo 9º.-Requisitos

1. Poderán acceder a estas axudas as corporacións locais galegas de ata 15.000 habitantes de dereito, que desde a data de publicación desta orde e ata o prazo de finalización de presentación de solicitudes, contraten a prestación de servicios públicos de interese social con empresas de economía social constituídas por mozos menores de 30 anos, respectando en todo caso a lexislación vixente en materia de contratación de servicios por parte das administracións públicas, e non se estea xa prestando

por persoal propio ou contratado por parte da corporación local, e que o tempo mínimo de duración do servicio non sexa inferior a 6 meses.

2. Terán preferencia aquelas corporacións locais situadas en zonas especialmente deprimidas ou cunha taxa elevada de desemprego.

Artigo 10º.-Axudas

A axuda a que se refire o artigo anterior poderá acadar ata o 60% do custo da contratación do servicio, sen superar en ningún caso a contía de 1.671.000 pts, e tendo en conta que só se poderá conceder á contratación dun servicio por concello, e que non se poderá contratar cunha empresa de economía social que preste o seu servicio a outro concello.

Artigo 11º.-Solicitudes

A solicitude deberá ser presentada pola corporación local, e irá acompañada, por triplicado exemplar, da seguinte documentación:

a) Documento acreditativo do acordo adoptado polo órgano competente da corporación local no que se manifeste o outorgamento provisional da contratación, a súa duración e custo.

b) Memoria explicativa dos servicios que se van realizar, así como xustificante de que ese servicio non se está xa prestando por persoal propio ou contratado.

c) Datos identificativos da empresa concesionaria.

d) Fotocopia do DNI e certificado de empadroamento dos membros da empresa de economía social.

Artigo 12º.-Prazo

1. O prazo de presentación de solicitudes rematará o 31 de outubro. Sen embargo, e por razóns de eficacia, no mes seguinte a cada trimestre, excepto no cuarto, que se resolverá en novembro, resolveranse as solicitudes presentadas no trimestre anterior.

2. No suposto de que as solicitudes non cumpran os requisitos sinalados na presente orde ou a documentación aportada sexa insuficiente ou contivese erros, procederase da forma prevista no artigo 10.2 do decreto citado anteriormente.

CAPÍTULO TERCEIRO

NORMAS DE PROCEDEMENTO COMÚNS

Artigo 13º.-Incompatibilidades

As subvencións establecidas nesta orde serán incompatibles non só entre si, senón tamén con calquera outra que se poida percibir polo mesmo concepto provenientes de organismos ou institucións de carácter público ou privado.

Artigo 14º.-Exclusións.

Exclúense dos beneficios destes programas:

-Os contratos celebrados co cónxuxe, ascendentes, descendentes e demais parentes por consaguinidade ou afinidade, ata o segundo grao inclusive, das persoas que ocupen postos de alta dirección ou ostenten cargos representativos na entidade.

Artigo 15º.-Valoración

1. Unha vez completados os expedientes, remitiránselle, para o seu informe preceptivo, á comisión de valoración, que efectuará proposta de resolución, que se lle elevará ó delegado provincial da Consellería de Familia, Muller e Xuventude.

2. Para os efectos do disposto no parágrafo anterior, a comisión de valoración estará composta polo xefe do Servicio de Formación e Emprego, que actuará como presidente, e serán vocais o funcionario competente en materia de emprego, que ademais actuará como secretario, e un funcionario destinado na respectiva delegación provincial da Consellería de Familia, Muller e Xuventude, nomeado polo delegado.

Artigo 16º.-Resolución.

1. A resolución das axudas, unha vez informadas pola comisión de valoración e fiscalizadas as propostas polas respectivas intervencións, corresponderalles ós delegados provinciais da Consellería de Familia, Muller e Xuventude, debendo ser notificadas ós interesados, podéndose modificar estas pola alteración das circunstancias determinantes do seu outorgamento.

2. Non obstante o sinalado no parágrafo anterior, a conselleira de Familia, Muller e Xuventude poderá resolver sobre da concesión de axudas e subvencións que polas súas características así o aconsellen.

Artigo 17º.-Requisitos para o aboamento

Antes de proceder ó cobramento das axudas establecidas no capítulo primeiro, as entidades sen ánimo de lucro terán que acreditar que se atopan ó día nas súas obrigas tributarias e sociais, e que non teñen pendente de pagamento ningunha débeda, por ningún concepto, coa Administración pública da Comunidade Autónoma.

Artigo 18º.-Aboamento e xustificación

As subvencións faranse efectivas da seguinte forma:

1.-Para os empregos suplementarios:

-O 50% ó inicio da acción, logo de presentación do contrato e alta do traballador na Seguridade Social, así como os documentos seguintes:

a) Fotocopia do DNI do/s traballador/es que se pretende/n contratar.

b) Fotocopia da tarxeta de demanda de emprego e/ou declaración xurada do/s traballador/es da súa situación real de desemprego que se someterá a comprobación, previa á concesión da subvención, por parte dos servicios da Consellería de Familia, Muller e Xuventude.

-O restante 50% unha vez xustificada a totalidade do gasto, contra a presentación das nóminas do traballador, TC1 e TC2 ou fotocopias compulsadas, no caso de entidades sen ánimo lucro; ou no caso de entidades públicas certificación acreditativa dos ditos extremos do secretario da mesma, así como en ámbolos dous casos, unha memoria final da actuación realizada.

2.-Para a contratación de servicios públicos con empresas de economía social constituídas por mozos:

-O 50% ó inicio da acción, logo da presentación da copia da contratación efectuada, xunto co DNI e tarxeta de demanda de emprego ou declaración xurada do traballador, con indicación esta última do tempo que permaneceu desempregado.

-O 50% restante unha vez finalizado o servicio, e acreditando o dito extremo coa presentación dun certificado do secretario do Concello.

Artigo 19º.-Publicidade.

Nas accións que se leven a cabo ó abeiro desta orde, deberá figurar, no lugar onde se realicen, de forma visible, cartel publicitario no que se indique que esa acción se encontra cofinanciada pola Xunta de Galicia, Consellería de Familia, Muller e Xuventude e o Fondo Social Europeo, ámbalas dúas denominacións cos seus respectivos anagramas.

Disposicións adicionais

Primeira.-

Sen prexuízo das facultades inspectoras que teñan atribuídas outros órganos da Administración do Estado e da Comunidade Autónoma, o Fondo Social Europeo, a Unidade Administradora do Fondo Social Europeo no Ministerio de Traballo e Seguridade Social, a Consellería de Familia, Muller e Xuventude poderá realiza-las comprobacións e verificacións que considere precisas para a constatación do cumprimento do disposto nesta orde e demais normas vixentes que resulten de aplicación.

Segunda.-

O incumprimento total ou parcial de calquera das condicións, así como a duplicación da axuda con cargo a outros créditos dos orzamentos xerais do Estado, da Seguridade Social, Administración institucional, autonómica ou local ou da Unión Europea, constituirán causa determinante de revogación da axuda e do reintegro desta por parte do beneficiario ou solicitante, xunto co xuro de demora, de acordo co establecido no artigo 78.6 da Lei 11/1992, do 7 de outubro, de réxime financeiro e presupostario de Galicia.

Terceira.-

As delegacións provinciais da Consellería de Familia, Muller e Xuventude poderán requirir en todo momento a documentación orixinal que se considere necesaria para acreditar mellor o exacto cumprimento das condicións esixidas.

Cuarta.-

A concesión das axudas e subvencións reguladas na presente orde terán como límite global o crédito asignado nos orzamentos xerais para 1995, e os compromisos que se reflicten no Marco Comunitario de Apoio provenientes do Fondo Social Europeo.

Quinta.-

Se por calquera causa, no momento en que a comisión de valoración teña que examina-las solicitudes, algún dos seus compoñentes non puidese asistir, será substituído polo funcionario que para o efecto designe o delegado provincial da Consellería de Familia, Muller e Xuventude, e sempre que sexa posible, o nomeamento deberá recaer noutro funcionario do mesmo servicio có substituído.

Sexta.-

Aqueles concellos ós que no pasado exercicio de 1994 se lles concedese a subvención prevista no capítulo segundo da presente orde, poderán solicitar con cáracter excepcional, e por unha única vez, a prórroga durante 6 meses máis do mesmo servicio contratado, sempre e cando se acredite a necesidade de continuación del.

Para os efectos do disposto nesta disposición adicional, deberán presentar, en todo caso, antes do 15 de maio do presente exercicio, acompañando a solicitude, unicamente documento acreditativo da necesidade de continuar co servicio.

Disposicións derradeiras

Primeira.-

Facúltase o director xeral de Formación e Emprego para que dicte, no ámbito das súas competencias, as resolucións e aclaracións necesarias para o desenvolvemento e cumprimento desta orde.

Segunda.-

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 14 de marzo de 1995.

Manuela López Besteiro

Conselleira de Familia, Muller e Xuventude