Dentro das actividades da Escola Galega de Administración Pública para 1995 figura a realización dunha xornada de estudio sobre simplificación administrativa.
1. Obxecto.
O día 20 de xuño de 1995 terá lugar no salón de actos da Delegación da Consellería da Presidencia e Administración Pública na Coruña unha xornada de estudio sobre simplificación administrativa.
O obxectivo desta xornada é coñece-lo significado da simplificación administrativa no ámbito das administracións públicas entroncando co proceso de reforma e modernización, coñecendo á vez as experiencias en cada unha das tres administracións territoriais (local, autonómica e estatal).
2. Destinatarios.
Persoal ó servicio de calquera das administracións públicas, fundamentalmente dos grupos A e B, implicado no proceso de racionalización e interesados en xeral.
3. Desenvolvemento e duración.
A xornada abrirase o martes, día 20 de xuño, ás 10.15 horas, e rematará ás 18.30 horas da tarde dese mesmo día.
4. Inscrición.
-Prazo: remata o xoves, día 15 de xuño de 1995.
-Lugar de presentación: no rexistro xeral, da EGAP (Polígono das Fontiñas, rúa de Madrid, 2-4, 15703 Santiago de Compostela). Teléfono 57 08 00. Telefax número 57 15 40.
-Forma: as solicitudes de inscrición faranse por escrito, no modelo oficial que figura ó final destas bases. Serán rexeitadas todas aquelas peticións que non reúnan o dito requisito.
As peticións de admisión poderanse enviar por correo ordinario ou por telefax ó número consignado.
-Inscrición fóra de prazo: só se admitirán de quedaren prazas libres, coa condición de que se cumpran os requisitos xerais antes indicados.
A partir do 15 de xuño, os peticionarios poderán obter confirmación da súa posible admisión chamando por teléfono en días laborables, de 11.30 a 14.45 horas, ó seguinte número: (981) 57 08 00 (extensión 229), ou ben consultando a lista de admitidos que se expoñerá no taboleiro de anuncios da EGAP 24 horas despois do remate do prazo de presentación de solicitudes.
5. Certificación de asistencia.
Entregaráselles ó remate desta xornada a aqueles asistentes que concorresen asiduamente a ela, e expresarase neste documento a natureza da actividade e as datas da súa realización.
Santiago de Compostela, 18 de abril de 1995.
Jaime Rodríguez-Arana Muñoz
Director da Escola Galega de Administración
Pública
